ဖဲ ဖရဲး (Fred) အမါသံဝံၤအလီၢ်ခံန့ၣ်, တုၤမ့ၢ်အဝဲအီၣ်အီသကိးဘၣ် ဂီၤတၢ်အီၣ်ဒီးအတံၤသကိးတဖၣ်လၢ မုၢ်ဆၣ်ကိးနံၤဒဲးန့ၣ်ဒီး, အသးကလၢၢ်ဘၣ်ဝဲလၢ အတၢ်တူၢ်ခီၣ်ဘၣ် တၢ်သးဘၣ်ဒိဘၣ်ထံးတဖၣ်ကန့ၢ်ဒံးဝဲန့ၣ်လီၤ. အတံၤသကိးလၢ အအိၣ်ဘှံးတ့ၢ်လံလၢ တၢ်ဖံးတၢ်မၤတဖၣ် ကမၤမုာ်မၤဖှံထီၣ်အသးန့ၣ်လီၤ. ဖဲတၢ်သူၣ်အုးသးအုးမ့ၢ်ဟဲအိၣ်ထီၣ် တဘျီလၢ်လၢ်န့ၣ်, ဖရဲး ဆိကမိၣ်ထီၣ်ဝဲလၢ ကထံၣ်လိၥ်ဘၣ်ကဒီးအသးဒီးအတံၤသကိးတဖၣ် လၢခံတဘျီအဂ့ၢ်န့ၣ်လီၤ. အဝဲသ့ၣ် အီၣ်သကိးအီသကိးတၢ်အလီၢ် စီၢ်နီၤခိၣ်လၢ တၢ်အီၣ်ကျးအသနၢၣ်န့ၣ်, မ့ၢ်အတၢ်သူၣ်အုးသးအုးဟါမၢ်ဝဲအလီၢ်အကျဲန့ၣ်လီၤ.
ဘၣ်ဆၣ်တၢ်ဆၢကတီၢ်လဲၤပူၤဝဲ, ဒီးအဝဲသ့ၣ် အတၢ်ပၥ်ဖှိၣ်ထံၣ်လိၥ်အသးန့ၣ်ကတၢၢ်ဝဲဒၣ်န့ၣ်လီၤ. အတံၤသကိးတနီၤဆါဆိးက့, ဒီးတနီၤန့ၣ်လဲၤပူၤကွံၥ်ဟီၣ်ခိၣ် န့ၣ်လီၤ. တၢ်အိၣ်သယုၢ်အိၣ်သညိ ဆှၢ ဖရဲး ဒ်သိးကဃုထံၣ်တၢ်မၤမုၥ်ထီၣ်က့ၤအီၤဆူ, ကစၢ်ယွၤ လၢအထံၣ်န့ၢ်တ့ၢ်ဝဲလၢအသးစၢ်အကတီၢ်န့ၣ်လီၤ. ဖရဲး စံးဝဲ “ခဲကနံၣ်အံၤ, ယအီၣ်ဂီၤတၢ်အီၣ်ထဲတဂၤဧိၤဘၣ်ဆၣ်, ယသ့ၣ်နီၣ်လၢ ယကဘၣ်ဟံးဃၥ် တၢ်မ့ၢ်တၢ်တီလၢအမ့ၢ် ကစၢ်ယ့ၣ်ၡူးအိၣ်ဒီးယၤန့ၣ်လီၤ. ဒီးဖဲယအီၣ် ဟါတၢ်အီၣ်ဝံၤန့ၣ်ဒီး, ယတဘၣ်လဲၤခီဖျိ ယမုၢ်နံၤမုၢ်သီတဖၣ် ထဲတဂၤဧိၤဘၣ်န့ၣ်လီၤ.”
ဒ်ၦၤကွဲးထါ ပာ်ဖျါဝဲဖဲ စံး ၉၁:၂ အပူၤ- “ယတၢ်အိၣ်တဒၢအလီၢ်, ဒီးယတိၥ် တဖျၢၣ်န့ၣ်မ့ၢ်ယကစၢ်လီၤ. ယကသန့ၤယသးလၢအီၤလီၤ” အသိး, ဖရဲး ဃုထံၣ်န့ၢ် တၢ်ဘံၣ်တၢ်ဘၢ, ဒီးတၢ်မၤမုၥ်ထီၣ်က့ၤအီၤ ခီဖျိလၢယွၤအိၣ်ဒီးအီၤန့ၣ်လီၤ. အဆၢဖိ ၁ န့ၣ် ဖရဲး နၢ်ပၢၢ်ဝဲဒၣ်လၢ တၢ်ဘံၣ်တၢ်ဘၢန့ၣ် တမ့ၢ်နီၢ်ခိတၢ်အိၣ်တဒၢအလီၢ်အကျဲလၢ ပကအိၣ်ခူသူၣ်အဂီၢ်ဘၣ်. မ့မ့ၢ်ထံၣ်ဝဲတၢ်ဘံၣ်တၢ်ဘၢ ဒ်အမ့ၢ်ယွၤအိၣ်ဒီးၦၤအဂၢၢ် အကျၢၤ, လၢပနၥ်သန့ၤသးဒီးပအိၣ်ဘှံးဝဲသ့န့ၣ်လီၤ. ဖရဲးဒီးၦၤကွဲးထါခံဂၤလိာ် ထံၣ်န့ၢ်ဝဲတၢ်ကီတၢ်ခဲအမုၢ်နံၤတဖၣ်န့ၣ်, တမ့ၢ်လၢအဝဲသ့ၣ် ဘၣ်ကွၢ်ဆၢၣ်မဲၥ် ထဲအဝဲသ့ၣ်ဒၣ်ဝဲဘၣ်. ပဝဲနၤယၤစ့ၢ်ကီး လၢကစၢ်ယွၤအတၢ်ဒီတဒၢ, ဒီးအတၢ်မၤစၢၤအဂီၢ် ပနာ်, သန့ၤသးသ့လီၤတံၢ်ဝဲဒၣ်န့ၣ်လီၤ. အဆၢဖိ ၁၄-၁၆ စံးဘၣ်ပှၤ, ဖဲပဃၣ်ပသးဆူယွၤအအိၣ်လၢတၢ်နာ်အပူၤန့ၣ်ဒီး, ယွၤအၢၣ်လီၤဝဲလၢကစံးဆၢၦၤ, ဒီးကအိၣ်ဒီးပှၤန့ၣ်လီၤ.
ဖဲပတၢ်အိၣ်မူ ကီခဲအကတီၢ်, မ့ၢ်ပလဲၤဆူ တၢ်ဘံၣ်တၢ်ဘၢအလီၢ်, “စီၢ်နီၤခိၣ်အိၣ်လၢတၢ်အသနၢၣ်” န့ၣ်ဧါ. တၢ်လီၢ်အံၤတအိၣ်လီၤစိၤဘၣ် ကစၢ်ယွၤအိၣ်ဝဲလီၤစိၤ န့ၣ်လီၤ. ကစၢ်ယွၤ အိၣ်ခိးၦၤလၢ ပကလဲၤဆူအအိၣ်, ပတၢ်အိၣ်တဒၢအလီၢ် အမ့ၢ် အတီန့ၣ်လီၤ.
