ပတၢ်ဘါသရိာ်လၢညါတဖျၢၣ် အိၣ်လၢဘၢ်ကၠံနံယါ (Virginia) န့ၣ် တၢ်ဒိးဘျၢထံတၢ်ရဲၣ်တၢ်ကျဲၤန့ၣ် ပှၤမၤအီၤလၢထံကျိ ရံၣ်ဘၤနၤ (Rivanna), ဒီးအါတက့ၢ် မုၢ်အတၢ်ကပီၤန့ၣ်ကိၢ်လၢၤဝဲ, ဘၣ်ဆၣ် ထံန့ၣ်ခုၣ်ဒိၣ်မးန့ၣ်လီၤ. ဖဲ မုၢ်ဒဲးနံၤ တၢ်ဘါဝံၤ, ပသိလ့ၣ် ဒီးသိလ့ၣ် တီၣ်တၢ်ပိးတၢ်လီတဖၣ် လၢအအိၣ်ၦဲၤကတံၥ်ဒီးပှၤကညီတဖၣ်န့ၣ် ပလဲၤသကိးဆူဝ့ၢ်အဖီကရၢၢ်တတီၤ, တၢ်လီၢ်ဖဲၦၤအိၣ်ဝးတရံးတဖၣ် ကွံာ်လိာ်ကွဲတၢ် ဒီးဖိသၣ်တဖၣ် အိၣ်ပှဲၤလၢတၢ်လိၥ်ကွဲအပျီပူၤန့ၣ်လီၤ. ပလဲၤသကိးဆူထံကျိကၢၢ်ပၤနံၤ ကယီၤကယီၤန့ၣ်လီၤ. လၢထံကျိထံအခုၣ်ပူၤန့ၣ် ယဆၢထၢၣ်တဲဖျါလံၥ်စီဆှံအဂ့ၢ်, ဒီးဟ့ၣ်တၢ်ဒိးဘျၢထံလၢ အပၥ်ဖျါကစၢ်ယွၤအတၢ်အဲၣ် အမ့ၢ်အတီန့ၣ် ဆူၦၤလၢအဒိးဘျၢအသးတဖၣ်အအိၣ်န့ၣ်လီၤ. ဖဲအဝဲသ့ၣ်ဟဲက့ၤထီၣ်လၢထံကျါ, ဘၣ်စီၣ်ဒီးထံဒီဂၤ, ဒီးတၢ်ခုၣ်တုၤအဃံအကတီၢ်န့ၣ်, တၢ်ဆၢဂ့ၤဆၢဝါ, ဒီးတၢ်ဒဲစုအကလုၢ်တဖၣ် သီၣ်ထီၣ်ဝဲဒၣ်န့ၣ်လီၤ. ဖဲအဝဲသ့ၣ်က့ၤထီၣ်ဆူကၢၢ်ပၤနံၤလိၤန့ၣ်ဒီး, တံၤသကိးဒီးဟံၣ်ဖိဃီဖိတဖၣ် ဟဲဖိးဟု ၦၤဒိးဘျၢထံဝံၤသီသိဖိ တဖၣ်- ဘၣ်စီၣ်လၢထံခဲလၢၥ်န့ၣ်လီၤ. ပအီၣ်သကိးကိၣ်, အီသကိးတၢ်ဃူာ်ဒီးကိၣ်ကစဲးကစီးတဖၣ်န့ၣ်လီၤ. ၦၤအိၣ်ဝးတရံးပှၤတဖၣ် ထံၣ်ပှၤဒီးတမ့ၢ်လၢ ကနၢ်ပၢၢ်တၢ်မၤအသးဒီးပှၤထီဘိဘၣ်ဆၣ်, ကသ့ၣ်ညါဝဲလၢ တၢ်အံၤမ့ၢ်တၢ်မၤလၤကပီၤအမူးန့ၣ်လီၤ.

ဖဲလံၥ်လူၤကၣ် ၁၅:၁၁-၃၂ အပူၤ, ကစၢ်ယ့ၣ်ၡူးအတၢ်တဲပူ လၢအမ့ၢ်ဖိခွါလၢအလီၤမၢ်တဂၤအဂ့ၢ်, လၢအပၥ်ဖျါထီၣ် ဖဲလၢပှၤတဂၤဂၤဟဲက့ၤဆူဟံၣ်, ဆူယွၤအအိၣ်တဘျီလၢ်လၢ်န့ၣ် မ့ၢ်တၢ်ဂ့ၢ်မိၢ်ၦၢ်လၢ တၢ်မၤလၤကပီၤမူးပွဲအဂီၢ်န့ၣ်လီၤ. ဖဲလၢၦၤ တဂၤဂၤစံး ‘မ့ၢ်, ယနာ်’ လၢကစၢ်ယွၤ အတၢ်ကွဲတဘျီလၢ်လၢ်န့ၣ်, ကမ့ၢ်တၢ်အကတီၢ်လၢ ပကဘၣ်မၤ မူးပွဲဒီးမုာ်လၤ အီၣ်အီသကိးတၢ်န့ၣ်လီၤ. ဖိခွါလၢ အဟးသဒၣ်အပၢ်တဂၤ ဟဲက့ၤဆူဟံၣ်တကီၢ်ခါန့ၣ်, ပၢ်တဂၤအံၤစံးဘၣ်အခ့အပှၤတဖၣ်, ဒ်သိးကဒုးသိးထီၣ် အဖိခွါလၢ ဆ့ကၤဖးထီအဂ့ၤကတၢၢ်, ပသံးအကတြ့ၣ်ကတြိၣ်တဘိႇ ဒီးခီၣ်ဖံးအသီန့ၣ်လီၤ. အဆၢဖိ ၂၃ န့ၣ် ပၢ်တဂၤအံၤစံးဝဲလၢ “ဟဲစိၥ်ဂီၤဖံးဖိလၢအဘီၣ်တဒုန့ၣ်တက့ၢ်. ဒီးမ်ပအီၣ်ဒီးမုၥ်လၤသကိးတက့ၢ်” န့ၣ်လီၤ. အဆၢဖိ ၂၄ ပာ်ဖျါဝဲ ကယဲၢ်ၦၤလၢအသးအိၣ်ဟဲအီၣ်အီသကိးတၢ်တဖၣ် လၢမူးဖးဒိၣ်ဒ်သိးအံၤ လၢအတြၢတြူဒီးတၢ်သးခုန့ၣ် မ့ၢ်ကျိၤကျဲ အကြၢးအဘၣ်နီၢ်နီၢ် “လၢတၢ်ကမုၥ်လၤသကိးတၢ်” အဂီၢ်န့ၣ်လီၤ.