ဖဲတၢ်လီၤသးအုးတမံၤမံၤ မၤသးဝံၤအလီၢ်ခံန့ၣ်, ညီနုၢ်ပတနၢ်ဟူ တၢ်ကရၢကရိတဖၣ် အၢၣ်လီၤထွဲက့ၤ အတၢ်ကမၣ်ဘၣ်န့ၣ်လီၤ. ဘၣ်ဆၣ် ဖဲပှၤကၠိဖိ တဆံနွံနံၣ်ဖိတဂၤန့ၣ် မၤသံလီၤက့ၤအသး တနံၣ်ပူၤကွံာ်ဝံၤ, ကၠိမံၤဟူသၣ်ဖျါတဖျၢၣ် အၢၣ်လီၤအတၢ်ကမၣ်, “အတၢ်လီၤတူၢ်လီၤကာ်နးမး” လၢ ကဒီဒၣ် ကၠိဖိအံၤအဂီၢ်န့ၣ်လီၤ. ပှၤမၤလိတၢ်ဖိအံၤ ဘၣ်တၢ်မၤနၢၤမၤဃၣ်အီၤ ဆူၣ်ဆူၣ်ကိၤကိၤ တလီၢ်လီၢ်, ဒီးကၠိခိၣ်နၢ်တဖၣ်, သ့ၣ်ညါထွဲဝဲလၢ ကၠိဖိအံၤ ဘၣ်တၢ်မၤကမၣ်အီၤဒၣ်ကယၢာ်, တၢ်ကဒီဒၣ်အီၤအဂီၢ် မၤတ့ၢ်တၢ်ဆံးစှၤဝဲဒၣ်န့ၣ်လီၤ. ခဲကနံၣ်အံၤ, ကၠိတဖျၢၣ်အံၤ အၢၣ်လီၤတူၢ်လိာ်ဝဲလၢ ကမၤဂ့ၤအါထီၣ်ခီၣ်ကါလၢတၢ်ကတြီဆၢ တၢ်မၤပျံၤမၤဖုး, တၢ်မၤနၢၤမၤဃၣ်တၢ်တဖၣ်, ဒီးတၢ်ကမၤဂ့ၤအါထီၣ် တၢ်ကွၢ်ထွဲကဟုကယာ် ပှၤကၠိဖိတဖၣ် အနီၢ်ညါတၢ်အိၣ်ဆူၣ်အိၣ်ချ့အဂီၢ်န့ၣ်လီၤ.

တၢ်ဟးဂူာ်ဟးဂီၤ အိၣ်ကဲထီၣ်သးလၢ တၢ်မၤနၢၤမၤဃၣ်တၢ်အံၤ မ့ၢ်တၢ်အဒိအိၣ်ဖျိ အိၣ်ဖျါ ဘၣ်ထွဲဒီးထးခိၣ်အတၢ်ကတိၤအစိကမီၤန့ၣ်လီၤ. လၢလံာ်တၢ်ကတိၤဒိအပူၤန့ၣ်, ပဘၣ်တၢ်သိၣ်လိပှၤလၢ မ်ပသုတဟံးန့ၢ် တၢ်ကတိၤလၢအမၤဘၣ်ဒိဆါပှၤတဖၣ် ညီညီဘှါဘှါတဂ့ၤအဂီၢ်န့ၣ်လီၤ. အဂ့ၢ်ဒ်အံၤ, ကတိၤ ၁၈:၂၁ ပာ်ဖျါဝဲ “တၢ်သံဒီးတၢ်မူ အိၣ်ဝဲလၢ ပှၤပျ့ၤအစိကမီၤလီၤ” န့ၣ်လီၤ. တၢ်လၢပစံးကတိၤတၢ်န့ၣ် စိာ်ကဖီထီၣ်တၢ်သ့, မ့တမ့ၢ် မၤလီၤသဘှံးပှၤဂၤ သ့ဝဲဒၣ်န့ၣ်လီၤ. တၢ်လၢအနးအဒိၣ်ကတၢၢ်န့ၣ်, တၢ်စံးကတိၤအၢသီ တဖၣ်ကဲထီၣ် တၢ်ဂ့ၢ်တမံၤ လၢအဒုးအိၣ်ထီၣ်တၢ်သံတၢ်ပှၢ် သ့ဝဲဒၣ်န့ၣ်လီၤ.

ခီဖျိလၢ ပစံးကတိၤတၢ်တဖၣ်န့ၣ် ပကဟဲစိာ်တၢ်မူဒ်လဲၣ်. ကတိၤ ၁၅:၂ န့ၣ် ကစၢ်ယွၤအကလုၢ်ကထါ သိၣ်လိဝဲလၢ ပတၢ်ကတိၤတဖၣ် အိၣ်ဟဲထီၣ်လၢ ပှၤကူၣ်တၢ်သ့အပျ့ၤ မ့ၢ်ဂ့ၤ, လၢပှၤဟးဂီၤဖိအထးခိၣ်မ့ၢ်ဂ့ၤ သ့ဝဲဒၣ်န့ၣ်လီၤ. ကတိၤ ၃:၁၃, ၁၇-၁၉ ပာ်ဖျါဝဲလၢ ပဃုထံၣ်န့ၢ်တၢ်ကူၣ်သ့ ခီဖျိလၢတၢ်သုးဘူးပသး ဆူယွၤအအိၣ်- လၢအမ့ၢ်တၢ်ကူၣ်သ့လၢ အဟ့ၣ်တၢ်မူအစိကမီၤ အဂံၢ်ခီၣ်ထံးန့ၣ်လီၤ.

ပဝဲကိးဂၤဒဲးန့ၣ် ပအိၣ်ဒီးမူဒါတမံၤ- လၢတၢ်ကတိၤဒီးလၢတၢ်မၤ- ဒ်သိးဒီးပပာ်သူၣ်ပာ်သး တၢ်ကတိၤလၢ အမၤဘၣ်ဒိဆါပှၤတဖၣ်လ့ၤတုၢ်လ့ၤတီၤ, ဒီးကွၢ်ထွဲကဟုကယာ်, ဒီးဒီတဒၢ ပှၤလၢအဘၣ်ဒိဆါ, ခီဖျိပှၤဂၤ အတၢ်စံးကတိၤတဖၣ်အဃိန့ၣ်လီၤ. တၢ်ကတိၤတဖၣ်န့ၣ် မၤသံတၢ်သ့, ဘၣ်ဆၣ် ကတိၤ ၁၅:၄ စံးဘၣ်ပှၤ, ပျ့ၤလၢ အမၤမုာ်ထီၣ်က့ၤတၢ်မၤဘျါက့ၤတၢ်သ့န့ၣ်, ကဲထီၣ် “တၢ်မူအသ့ၣ်တထံး” လၢပှၤအိၣ်လၢပခိၣ်ပဃၢၤတဖၣ် အဂီၢ်န့ၣ်လီၤ.