သရၣ်ဒိၣ် ဘါဘၣ်န့ၣ် အပျိၢ်သကူး, ဒီးဘၣ်ဟးဝဲလၢ နီၢ်ထိးဘိဘၣ်ဆၣ်, ကွၢ်ထွဲဝဲ တၢ်အိၣ်ဖှိၣ် အါနံၣ်အါလါအပူၤန့ၣ် မ့ၢ်တၢ်အုၣ်သးတမံၤလၢ အတၢ်သန့ၤလီၤသးလၢ ကစၢ်ယွၤ မ့ၢ်အဂံၢ်ဘါ ဂံၢ်ခီၣ်ထံးန့ၣ်လီၤ. ဖဲ ၁၉၉၃ နံၣ်န့ၣ်, သရၣ်ဒိၣ် ဝ့လယၢၣ် ဘါဘၣ် (Reverend William Barber II) ခံဂၤတဂၤန့ၣ်, ဒိးန့ၢ်တၢ်ဆါလၢ ပျိၣ်ဃံစဲဘူးလိာ်သးအဃိ နီၣ်ခိဂံၢ်စၢ်ဘါစၢ်အတၢ်ဆါအိၣ်ထီၣ်ဝဲဒၣ်န့ၣ်လီၤ. လၢတၢ်န့ၣ်အဃိ, ပှၤစံးဘၣ်အီၤလိၤလိၤပျီပျီလၢ “ဘါဘၣ်ဧၢ, တၢ်အိၣ်ဖှိၣ်ဖိတဖၣ် တမ့ၢ်ကအဲၣ်ဒိးဝဲလၢ ပှၤအနီၢ်ခိက့ၢ်ဂီၤ တလၢတပှဲၤတဂၤ ကကဲထီၣ် အဝဲသ့ၣ်အတၢ်အိၣ်ဖှိၣ်သရၣ်အဃိ, လၢတၢ်ကွၢ်ထွဲ တၢ်အိၣ်ဖှိၣ်အတၢ်မၤအလီၢ်န့ၣ် ကြၢးနဆိကမိၣ် ဃုထံၣ်တၢ်မၤအဂၤ တမံၤလံန့ၣ်လီၤ.” ဘၣ်ဆၣ် ဘါဘၣ် န့ၣ် မၤနၢၤကွံာ် တၢ်ဟ့ၣ်ကူၣ်လၢ အမၤဆါသူၣ်ဆါသးအီၤန့ၣ်လီၤ. ကစၢ်ယွၤ စူးကါ ဘါဘၣ်န့ၣ် တမ့ၢ်ထဲတၢ်အိၣ်ဖှိၣ်သရၣ်တဂၤ အသိးဘၣ်. ယွၤစူးကါစ့ၢ်ကီးအီၤ ဒ်အမ့ၢ်ပှၤကတိၤန့ၢ်တၢ် လၢအိၣ်ဒီးအစိကမီၤ, ဒီးဘၣ်တၢ်ပာ်ဒိၣ်ပးကဲအီၤ လၢပှၤဂံၢ်စၢ်, ဒီးပှၤအဆံးသ့ၣ်တဖၣ်အဂီၢ်န့ၣ်လီၤ.

ဘၣ်ထွဲဒီးပှၤနီၢ်ခိက့ၢ်ဂီၤ တလၢတပှဲၤတဖၣ်အဂီၢ် တၢ်ကဘၣ်မၤဒ်လဲၣ်န့ၣ် ဟီၣ်ခိၣ် မ့ၢ်တသ့ၣ်ညါ လၢလၢပှဲၤပှဲၤဘၣ်ဆၣ် ကစၢ်ယွၤသ့ၣ်ညါဝဲဒၣ်န့ၣ်လီၤ. ပှၤလၢ အပာ်လုၢ်ပှ့ၤ တၢ်ဃံတၢ်လၤ, ဒီးတၢ်ဂံၢ်ဆူၣ်ဘါဆူၣ်, ဒီးပီလီလၢကျိၣ်စ့ပှ့ၤန့ၢ်တဖၣ်န့ၣ် ကလဲၤပူၤကွံာ် တၢ်ဂ့ၤတၢ်ဝါလၢ ကဟဲပိာ်ထွဲထီၣ် တၢ်တလၢတပှဲၤ လၢပှၤတဆၢမုၢ်လၢ်ဒိးန့ၢ်ဘၣ်တဖၣ်အခံန့ၣ်လီၤ. လၢတၢ်ကူၣ်သ့အပူၤ စီၤယၤကိာ် သံကွၢ်ဝဲ, ဒီးတၢ်ဂ့ၢ်မိၣ်ပှၢ်ဘၣ်ထွဲဒီးတၢ်သံကွၢ်အံၤအပူၤ, တၢ်လၢပကြၢးဆိကမိၣ် ကွၢ်ထံကွၢ်ဆးအီၤန့ၣ်, ဖျါဖဲ ယၤ ၂:၅ အပူၤ, “ယွၤဃုထၢ ဟီၣ်ခိၣ်အပှၤဖှီၣ်ဖိယာ်ဖိ, ထူးဝဲတီၤဝဲလၢတၢ်နာ်, ဒ်သိး အကန့ၢ်ဘၣ်သါ အဘီအမုၢ်လၢအစံးပာ်ဝဲ လၢအကဟ့ၣ်လီၤ ပှၤလၢအအဲၣ်အီၤန့ၣ်, တမ့ၢ်ဘၣ်ဧါ” န့ၣ်လီၤ. ဖဲတၢ်အိၣ်ဆူၣ်အိၣ်ချ့ မ့ၢ်ဂ့ၢ် တၢ်ဂံၢ်တၢ်ဘါမ့ၢ်ဂ့ၢ် တၢ်ဂုၤတၢ်ဂၤတဖၣ်မ့ၢ်ဂ့ၢ် ဆံးလီၤစှၤလီၤဝဲအဃိဒီး, ပှၤတဂၤအတၢ်စူၢ်တၢ်နာ် ကဘၣ်ဆံးလီၤစှၤလီၤဝဲအဂီၢ် အလီၢ်တအိၣ်ဘၣ်. ခီဖျိလၢယွၤအဂံၢ်အဘါန့ၣ်, တၢ်အဂ့ၤတကပၤ ကဲထီၣ်က့ၤ သ့ဝဲဒၣ်န့ၣ်လီၤ. ပတၢ်တလၢတပှဲၤန့ၣ် ကကဲထီၣ် တၢ်မၤစၢၤချ့ထီၣ် ပတၢ်နာ်သန့ၤသးလၢကစၢ်ယွၤအဂီၢ်န့ၣ်လီၤ. ဒ်တၢ်မၤအသးလၢကစၢ်ယ့ၣ်ရှူးအသိး, လၢတၢ်ကဟဲစိာ်န့ၢ် တၢ်ဂ့ၤတၢ်ဝါဆူ ပဟီၣ်ခိၣ်အဂီၢ်, ပတၢ်သူၣ်ကၢ်သးလီၤန့ၣ်, ကဘၣ်တၢ်စူးကါအီၤလၢကစၢ်ယွၤန့ၣ်လီၤ.