လံာ်ကြီကြၣ် မိၢ်ဖါတစူၣ်န့ၣ် တ့ထီၣ်ဝဲအထၢဖးဒိၣ်တဖျၢၣ် လၢသ့ၣ်တထံးအလိၤ, သ့ၣ်အိၣ်စီၤစုၤ စှၤမံးလာ်လၢယဟံၣ်န့ၣ်လီၤ. တယံာ်ဘၣ်, ထိၣ်ဖးဒိၣ်တဖၣ် အိၣ်ဒီး ထိၣ်လံာ်ကြီကြၣ်ဖိတဖၣ်န့ၣ်လီၤ. အဝဲသ့ၣ် အံးထွဲကွၢ်ထွဲ အဖိဆံး ဖးထီၣ်သီတဖၣ် ဒ်သိးသိး တုၤထိၣ်ဖးဒိၣ်ခံဘ့ၣ်အကျါ တဘ့ၣ်န့ၣ် ဘၣ်ဒိလၢသိလ့ၣ်ဒီး သံတစုန့ၣ်လီၤ. အါနံၤအါသီအတီၢ်ပူၤ, ထိၣ်ဖးဒိၣ်လၢ အိၣ်မူတ့ၢ်တဘ့ၣ်န့ၣ် ယူၤထီၣ်ဆူ တၢ်ထီၣ်ထီဒီးယူၤလီၤဆူ တၢ်လီၢ်ဖုၣ် ဖဲထံကျိတဘိ အကပိာ်အကပၤ, လူၤဃုက့ၤ သးသမူတံၤသကိးလၢအလီၤမၢ်တဘ့ၣ်န့ၣ်လီၤ. လၢခံကတၢၢ်, ထိၣ်ဖးဒိၣ်န့ၣ် က့ၤကဒါက့ၤဆူအထၢ ဒီးဟံးန့ၢ်က့ၤမူဒါ အလၢအပှဲၤ လၢအတၢ်လုၢ်ဒိၣ်ထီၣ်အဖိတဖၣ်န့ၣ်လီၤ.

ဖဲတၢ်မၤအသးတမံၤဂ့ၤတမၠိဂ့ၤန့ၣ်, တၢ်ကဲ မိၢ်ပၢ်ထဲတဂၤဧိၤအဂီၢ် တၢ်ဂ့ၢ်ကီအိၣ်ထီၣ်သ့ဝဲဒၣ်န့ၣ်လီၤ. ဖိသၣ်ကသးခုသးမုာ်အဂီၢ်န့ၣ် ကျိၣ်စ့ဒီးနီၢ်သးအတၢ်ဆီၣ်သနံး ပာ်ဖှိၣ်ထီၣ်အသး, ဒီးဒုးအိၣ်ထီၣ် တၢ်လဲၤခီဖျိ အဒူၣ်အဆၢဖးဒိၣ် ဖးလဲၢ်တဖၣ်သ့ဝဲဒၣ်န့ၣ်လီၤ. ဘၣ်ဆၣ်, ပှၤလၢအအိၣ်ဒီးမူဒါလၢအကါဒိၣ် ဒ်သိးအံၤတဖၣ်, ဒီးကယဲၢ်ပှၤတဂၤလၢ်လၢ် လၢအဘၣ်ဂုာ်ကျဲးစၢးရဲၣ်ကျဲၤဝဲ တၢ်အိၣ် အသးလၢ အလီၤဘၣ်ယိၣ်တဖၣ်အဂီၢ် တၢ်မုၢ်လၢ်အိၣ်ဝဲဒၣ်န့ၣ်လီၤ.

ဖဲလၢပလီၤဘှံးလီၤတီၤ, ဒီးပသူၣ်ကၢ်သးလီၤဘှါအကတီၢ်, ကစၢ်ယွၤအိၣ်ဒီးပှၤ န့ၣ်လီၤ. မ့ၢ်လၢယွၤန့ၣ် သ့တၢ်လၢာ်, ကယဲၢ်တၢ်စိတၢ်ကမီၤအိၣ်ဒီးအီၤ, ဒီးတဆီတလဲအသးနီတဘျီဘၣ်အဃိ – ယွၤအဂံၢ်အဘါန့ၣ် တလၢာ်ဝဲတကတၢၢ်ဝဲနီတဘျီဘၣ် န့ၣ်လီၤ. ဒ် ယရှါ ၄၀:၃၁ ပာ်ဖျါဝဲ “မ့မ့ၢ်ပှၤလၢအမုၢ်လၢ်တၢ်လၢယွၤန့ၣ် အဂံၢ်အဘါ ကဆူၣ်ထီၣ်လီၤ” အသိး, ပနာ်သန့ၤလီၤသးလၢ လံာ်စီဆှံအတၢ်စံးတၢ်ကတိၤတဖၣ်အပူၤသ့ဝဲဒၣ်န့ၣ်လီၤ. တၢ်လဲၤခီဖျိဘၣ် ပနီၢ်ကစၢ် အတၢ်တလၢတပှဲၤတဖၣ်န့ၣ် တမ့ၢ်တၢ်လၢအကဆၢတဲာ်န့ၢ် တၢ်ကမၤအသးဒီးပှၤန့ၣ်ဘၣ်. မ့ၢ်လၢတၢ်လီၤလိၢ်လီၤလးအပူၤကစၢ်ယွၤကမၤပှဲၤက့ၤ ပဂံၢ်ပဘါအဃိ ပနာ်သန့ၤသးလၢကစၢ်ယွၤအလိၤသ့ဝဲဒၣ် န့ၣ်လီၤ. မုၢ်လၢ်တၢ်လၢယွၤစံးတၢ်န့ၣ်, ကပျဲပလဲၤတၢ်ဆူညါ, ဒီးတမၤလီၤဘှံးလီၤဘှါ ပှၤဘၣ်, ဒ်အဆၢဖိ ၃၁ ပာ်ဖျါဝဲအသိး, “ကယူာ်ထီၣ်အဒံးဆ့ ဒ်လံာ်ဧိၤတြၤဧိၤအသိးလီၤ” န့ၣ်လီၤ.