တယံာ်ဒံးဘၣ်န့ၣ်, ဖံသးပှၢ်, အသးအိၣ် ဃိးဆံတနံၣ်ခံဂၤ လၢကီၢ်စဲၣ် ထဲးကစဲး (Texas), ကီၢ်အမဲရကၤန့ၣ်, မ့ၢ်လၢ အလဲၤတရံး ဟီၣ်ခိၣ်ဖျၢၣ် လၢနံၤသီ ဃိးဆံအတီၢ်ပူၤအဃိဒီး အမံၤဟူသၣ်ဖျါလၢ ကမျၢၢ်တၢ်ကစီၣ်တဖၣ်အပူၤန့ၣ်လီၤ. ခံဆံသၢနံၣ်အတီၢ်ပူၤ, ဒ်အမ့ၢ်တံၤသကိးအဂ့ၤကတၢၢ်ခံဂၤန့ၣ် လဲၤဟးဆှၣ်ထံဆှၣ်ကီၢ် ဒီးလဲၤဟးတုၤဝဲဒၣ် ဆူကီၢ်မိၢ်ပှၢ် နွံဘ့ၣ်လၢာ်န့ၣ်လီၤ. အဝဲသ့ၣ်စးထီၣ် အတၢ်လဲၤလၢ အၣ်တၣ်တံးကး (Antarctica), ဂဲၤကလံၣ် ထဲၣ်ကိ (Tango) တၢ်ဂဲၤကလံၣ်လၢ ကီၢ်အၣ်ကၠံၢ်တံနါ, ဖဲကီၢ်အဲၤကူပတူးန့ၣ် ဒိးဝဲကီၤလၤအူး, ဒီးဖဲအလဲၤတုၤ ကလံၤထံး အဟီၣ်စိး (North Pole) အကတီၢ်န့ၣ် ဒိးဝဲမူခိၣ်ဖီလ့ၣ်ကဟၣ်န့ၣ်လီၤ. အဝဲသ့ၣ် လဲၤဟးဆှၣ်ဘၣ် ထံကီၢ် တဆံဃိးဘ့ၣ်အကျါ, ပၣ်ဃုာ်ဒီး စၣ်ဘံၣ်ယၤ(Zambia), အ့ၣ်ဒံၣ်ယၤ(India), နံၣ်ပီ(လ)(Nepal), အ့ၣ်ဒိၣ်နံရှါ(Indonesia), ယပၣ်(Japan) ဒီး အံၣ်တလံၣ်(Italy) တဖၣ်, ဒီးမၤကတၢၢ်အတၢ်လဲၤဖဲ အီစတြ့လယၤ(Australia) န့ၣ်လီၤ. အဝဲသ့ၣ်ခံဂၤ စံးဝဲဒၣ်လၢ အတၢ်မုၢ်လၢ်န့ၣ်, ကမ့ၢ်တၢ်ဟ့ၣ်ဂံၢ်ဟ့ၣ်ဘါ စိၤစၢၤသွဲၣ်သီတဖၣ်, ဒ်သိးကမုာ်လၤသးခုတၢ်လဲၤဟးဝးတရံးဟီၣ်ခိၣ်,သးအနံၣ်လါ မ့ၢ်ကအိၣ်ဝဲထဲလဲၣ်ဂ့ၤထဲလဲၣ်ဂ့ၤန့ၣ်လီၤ.
လံာ် ၂ မိၤရှ့အပူၤန့ၣ်, ပကဖးဘၣ် ပှၤခံဂၤလၢအသးကၢဝဲ (၈၀ တုၤ ၈၉ နံၣ်), ဘၣ်တၢ်ဃုထၢလၢယွၤ, ဒ်သိးကအိၣ်မူ သးသမူအတၢ်လဲၤလီၤဆီတကလုာ်အဂီၢ်န့ၣ်လီၤ. ယွၤမၢလီၤ စီၤမိၤရှ့ ကလဲၤဝဲဆူ ဖၤရိၤအအိၣ်, ဒ်သိးဒီးကဟ့ၣ်တၢ်ပျဲလၢ တၢ်မၤပူၤဖျဲး အပှၤဂီၢ်မုၢ်လၢ တၢ်ကဲကုၢ်အဂီၢ်န့ၣ်လီၤ. တၢ်ကမၤစၢၤဆီၣ်ထွဲ စီၤမိၤရှ့ အဂီၢ် ကစၢ်ယွၤဆှၢလီၤ စီၤမိၤရှ့ အဝဲၢ် စီၤအၤဟရိၣ်န့ၣ်လီၤ. ၂ မိၤ ၇:၇ ပာ်ဖျါထီၣ်ဝဲ, “ဒီးလၢအကတိၤတၢ်ဒီးဖၤရိၤန့ၣ် စီၤမိၤရှ့ အသးပှၢ် အနံၣ်ဃိးဆံ, ဒီးစီၤအၤဟရိၣ် အသးပှၢ် အနံၣ်ဃိးဆံသၢနံၣ်” န့ၣ်လီၤ.
တၢ်ဃ့ထီၣ်တမံၤအံၤ ကကဲထီၣ်တၢ်ဘၣ်ယိၣ်လၢ ပှၤအိၣ်ဒီးသးအနံၣ်အလါ တဖၣ်ဒ်လဲၣ်ဂ့ၤ, ဘၣ်ဆၣ် လၢတၢ်မၤအံၤအဂီၢ် ကစၢ်ယွၤ ဃုထၢပှၤဒီပုၢ်ဝဲၢ်ခံဂၤအံၤ, ဒီးအဝဲသ့ၣ် ပိာ်ထွဲမၤထွဲဝဲ, ဒီးယွၤနဲၣ်ဆှၢအဝဲသ့ၣ်န့ၣ်လီၤ. အဆၢဖိ ၁၀ စံးဘၣ်ပှၤလၢ “ဒီးစီၤမိၤရှ့ဒီးစီၤအၤဟရိၣ် မၤဝဲဒ်သိး ယွၤမၤလိာ်တၢ်အသိး, လဲၤနုာ်ဝဲဆူ ဖၤရိၤအအိၣ်လီၤ.”
စီၤမိၤရှ့ဒီးစီၤအၤဟရိၣ် အိၣ်ဒီးတၢ်လၤကပီၤလၢ ထံၣ်ဘၣ်ဝဲ ယွၤမၤပူၤဖျဲးထီၣ် အပှၤဂီၢ်မုၢ်လၢ တၢ်မၢကဲကုၢ် အါန့ၢ်အနံၣ် လွံၢ်ကယၤတဖၣ်အဂီၢ်န့ၣ်လီၤ. ပသး အနံၣ်အလါ ကမ့ၢ် ထဲလဲၣ်ဂ့ၤထဲလဲၣ်ဂ့ၤ, ယွၤ ကစူးကါဝဲလီၤန့ၣ် ပှၤခံဂၤအံၤအိၣ်မူပာ်ဖျါထီၣ်ဝဲဒၣ်န့ၣ်လီၤ. ပသးစၢ်ဂ့ၤ, ပသးပှၢ်ဂ့ၤ, ဖဲယွၤဆှၢပှၤတပူၤလၢ်လၢ်န့ၣ်, မ်ပကပိာ်သကိးအခံန့ၣ်တက့ၢ်.
