ဒီးကထၢၣ် ထ့းဖနံၣ် ကီၤ(လ်)စၣ် (Dr. Tiffany Gholson) ထံၣ်ဝဲ ကီၢ်စဲၣ်အံၣ်လံနွဲး (Illinois) အဝ့ၢ် စ့းလူဝံး မုၢ်ထီၣ် (East Saint Louis) န့ၣ်, တူၢ်ဘၣ်ခီၣ်ဘၣ်ဝဲ တၢ်မၤကမၣ် ပဒိၣ်အတၢ်ဘျၢသဲစးတဖၣ် လၢကျဲအါဘိန့ၣ်လီၤ. ဘၣ်ဆၣ်, ဖဲအတုၤ ၂၀၂၃ နံၣ်န့ၣ်, ဝ့ၢ်အတၢ်ကွဲးနီၣ်ပာ်ဖျါဝဲဒၣ်လၢ တၢ်မၤသံပှၤကညီနီၣ်ဂံၢ် စှၤလီၤဝဲ ၃၁ မျးကယၤ, ဒီးတၢ်လုၢ်သ့ၣ်ခါပတာ်သဲစးတဖၣ်ခဲလၢာ်အဖီခိၣ်န့ၣ် စှၤလီၤဝဲ ၃၇ မျးကယၤန့ၣ်လီၤ. တၢ်မၤတ့ၢ်အသးအံၤ ကမ့ၢ်တၢ်မနုၤလဲၣ်. မ့ၢ်ဒၣ်တၢ်မၤသကိးတၢ် န့ၣ်လီၤ. လၢတၢ်မၤသကိးတၢ်တပူၤဃီန့ၣ်, ဝ့ၢ်အံၤ “တၢ်မၤလီၤတံၢ်ထွဲ ကမျၢၢ်တၢ်ဘံၣ်တၢ်ဘၢကရူၢ်” (Public Safety Enforce-ment Group)- လၢအပၣ်ဃုာ် ကီၢ်စဲၣ် ဒီးဝ့ၢ်အပၢၤကီၢ်, ဝ့ၢ်အကၠိလီၢ်ကဝီၤ, ဒီးတၢ်ဘူၣ်တၢ်ဘါကရၢကရိတဖၣ် ကျဲးစၢးပာ်ဖှိၣ် မၤသကိးတၢ်, ဒ်သိးအကဆီတလဲကွံာ်တၢ်လၢ ပှၤဝ့ၢ်ဖိခဲလၢာ်အဂီၢ်အဃိန့ၣ်လီၤ.

လၢတၢ်ကမၤစၢၤပှၤဝ့ၢ်ဖိတဖၣ်အဂီၢ်, ဝ့ၢ်အပှၤမၤသကိးတၢ်ခဲလၢာ် ပာ်ဖှိၣ်လိာ်သးအံၤန့ၣ်, ဒီးကထၢၣ် ကီၤ(လ်)စၣ် ပာ်ဖျါထီၣ်ဝဲလၢ, “တၢ်မၤအံၤ ပစံးအီၤလၢ တၢ်ဆီဟံၣ်ဆီဃီတမံၤ”န့ၣ်လီၤ. လီၢ်ကဝီၤအကၠိ “ရးပရီ တၢ်အိၣ်ဆူၣ်အိၣ်ချ့ လီၢ်ခၢၣ်သး” (Wraparound Wellness Center) လၢအဝဲပၢဆှၢဝဲန့ၣ်, အိၣ်ဒီး ဂ့ၢ်ဝီပှၤမၤတၢ်ဖိတဖၣ် (Social Workers), ပှၤကွၢ်ပှၤဆူးပှၤဆါတဖၣ်, ဒီးကၠိအပှၤမၤတၢ်ဖိတဖၣ် ဒ်သိးကဆီၣ်ထွဲမၤစၢၤ ဖိသၣ်တဖၣ်လၢ အဘၣ်ဒိဘၣ်ထံး, ခီဖျိလၢတၢ်မၤကမၣ်သဲစးမ့ၢ်ဂ့ၤ တၢ်ဘၣ်ဒိဘၣ်ထံးလၢတၢ်တပာ်သူၣ်ပာ်သးအပူၤတဖၣ်အဂီၢ်န့ၣ်လီၤ. တၢ်ကရၢကရိအဂုၤအဂၤတဖၣ် ဟ့ၣ်ထီၣ် အဝဲသ့ၣ် အတၢ်သ့တၢ်ဘၣ်န့ၣ်လီၤ. ပၢၤကီၢ်တဖၣ် ဟ့ၣ်လီၤအသးလၢာ်လၢာ်ဆ့ဆ့ လၢကမၤအါထီၣ် တၢ်စံးကတိၤလိာ်သးဒီးပှၤလၢကျဲခိၣ်တဖၣ်, ဒီးကဒိကနၣ်ဝဲဒၣ်န့ၣ်လီၤ.

စံး ၁၃၃:၁ န့ၣ် ပှၤကွဲးထါ စီၤဒၤဝံး ကွဲးဝဲဒၣ် “ဒီပုၢ်ဝဲၢ်အိၣ်ဝဲဆိးဝဲလၢအသး တဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ်ဆံးဒိၣ်လဲၣ်န့ၣ် ကွၢ်ကွၢ်တက့ၢ်” န့ၣ်လီၤ. အဆၢဖိ ၃ န့ၣ်, စံးအါထီၣ်ဝဲ, တၢ်အိၣ်ဒီးသးတဖျၢၣ်ဃီစံးတၢ်န့ၣ် “မၤသးဒ်ကစၢၢ်ဃ့ၤရမိၣ်အပစီၤထံ” အသိးန့ၣ်လီၤ. စီၤဒၤဝံး ယၢၤထီၣ်ပာ်ဖျါဝဲ ပှၤအိၣ်ဒီးတၢ်စူၢ်တၢ်နာ်တမံၤဃီလၢ ယွၤအပူၤအဂ့ၢ်န့ၣ်လီၤ. တၢ်ဘၣ်လီၤဖးလိာ်သး ခီဖျိလၢ တၢ်သိၣ်တၢ်ဘျၢဒီးထံဂ့ၢ်ကီၢ်ဂ့ၢ်အလီၢ်န့ၣ်, ပမ့ၢ်ဒၣ်တၢ်တမံၤဃီန့ၣ်လီၤ. တၢ်ထံၣ် ဆိကမိၣ်အံၤ ဖျါလၢကကီခဲဘၣ်ဆၣ်, ကမ့ၢ်တၢ်ဆိၣ်ဂ့ၤလၢပှၤခဲလၢာ်အဂီၢ်န့ၣ်လီၤ. ပှၤစူၢ်က့ၤနာ်က့ၤတၢ်ဖိတဖၣ်အဂီၢ် တၢ်သူၣ်အိၣ်သးအိၣ်လိာ်သးကဒဲကဒဲန့ၣ် မ့ၢ်တၢ်ကွၢ်စိအဃံလၤတမံၤ, လီၤဆီဒၣ်တၢ်လၢ ပခူပဝ့ၢ်တဖၣ် လၢအလိၣ်ကစၢ်ယ့ၣ်ရှူး အတၢ်အဲၣ်သပှၢ်တၢၢ်အဂီၢ်န့ၣ်လီၤ.