ယတအိၣ်ဒီးတၢ်တိာ်ကျဲၤနီတဘျီလၢ ယကစးထီၣ် တၢ်ကရၢကရိတခါလၢ အတကွၢ်တၢ်အဘျုး, ဘၣ်ဃးဒီး ပှၤဒိၣ်တုာ်ခိၣ်ပှဲၤတဖၣ် အတၢ်ရ့လိာ်ဘၣ်ထွဲအဂီၢ်န့ၣ်ဘၣ်. ဒီးဖဲယသးကလၢၢ်ဘၣ်လၢ ယကဘၣ်စးထီၣ်မၤတၢ်အံၤန့ၣ်ဒီး, တၢ်သံကွၢ်တဖၣ်အိၣ်ထီၣ်အါထံၣ်န့ၣ်လီၤ. တၢ်ဟ့ၣ်သးကညီၤတၢ်ကရၢ (Charity) အံၤအဂီၢ် ကျိၣ်စ့တဖၣ်န့ၣ် ကဘၣ်တၢ်ပၢဆှၢသုးကျဲၤအီၤဒ်လဲၣ်, ဒီးတၢ်ဒုးအိၣ်ထီၣ်ကရၢအံၤ မ့ၢ်မတၤတဖၣ်န့ၣ် ကမၤစၢၤယၤလၢ တၢ်ဒုးအိၣ်ထီၣ်တၢ်ကရၢကရိအံၤလဲၣ်န့ၣ်လီၤ. အကတၢၢ်န့ၣ်, လၢတၢ်ဂ့ၢ်တၢ်ကျိၤတဖၣ်အံၤအဂီၢ် တၢ်မၤစၢၤအဒိၣ်ကတၢၢ် အိၣ်ဟဲဝဲဒၣ်န့ၣ် တမ့ၢ်လၢ ပနံာ်ကၤတၢ်မၤအလံာ်တဘ့ၣ်ဘၣ်, မ့မ့ၢ်အိၣ်ဟဲဝဲလၢလံာ်စီဆှံအပူၤန့ၣ်လီၤ.

ပှၤတဂၤဂၤ လၢကစၢ်ယွၤကိးအီၤ ဒ်သိးကသူၣ်ထီၣ်တၢ်တမံၤမံၤအဂီၢ်, တၢ်ကဖး လံာ်ဧ့စြၤန့ၣ် မ့ၢ်တၢ်လၢအကါဒိၣ်ကတၢၢ်တမံၤန့ၣ်လီၤ. လံာ်ဧ့စြၤ ၁:၄-၁၁, ၆:၈-၁၀ ပာ်ဖျါထီၣ်က့ၤ ပှၤယူဒၤတဖၣ် ဘၣ်တၢ်စိာ်မၢကဲကုၢ်ဝံၤအလီၢ်ခံန့ၣ် သူၣ်ထီၣ်ဘှီထီၣ်က့ၤ ဝ့ၢ်ယရူၤရှလ့ၣ် ဒ်လဲၣ်အဂ့ၢ်, ကျိၣ်စ့လၢအလိၣ်တဖၣ်န့ၣ် ယွၤကတဲာ်ကတီၤန့ၢ် ခီဖျိလၢကမျၢၢ်အတၢ်ဟ့ၣ်မၤဘူၣ်, ဒီးပဒိၣ်ပပှၢ်အတၢ်ဟ့ၣ်, ဧ့စြၤ ၁:၅,၃:၇ ပာ်ဖျါဝဲ, ပှၤမုာ်သးမၤကလီတၢ်တဖၣ်, ဒီးပှၤဘှီတၢ်တဖၣ် မၤသကိးတၢ်ဒ်လဲၣ်အဂ့ၢ်န့ၣ်လီၤ. ဧ့စြၤ ၃:၈ ပာ်ဖျါထီၣ်ဝဲ, ပှၤယူဒၤဖိတဖၣ် အတၢ်ဟဲက့ၤ ခံနံၣ်အတီၢ်ပူၤဒၣ်လဲာ် တၢ်သူၣ်ထီၣ်က့ၤတၢ်မၤ တစးထီၣ်ဒံးဘၣ်, မ့ၢ်လၢတၢ်ကတဲာ်ကတီၤအဆၢကတီၢ်န့ၣ် မ့ၢ်တၢ်လၢအကါဒိၣ်ဝဲအဂ့ၢ်န့ၣ်လီၤ. အဆၢဒိၣ် ၄ ပာ်ဖျါထီၣ် တၢ်ထီဒါ, တၢ်တြီတဖၣ် ဟဲအိၣ်ထီၣ်သ့ဒ်လဲၣ်အဂ့ၢ် န့ၣ်လီၤ. တၢ်ဂ့ၢ်တဖၣ်အကျါတမံၤန့ၣ် ဖျါလီၤဆီလၢယဂီၢ်န့ၣ်လီၤ. ဧ့စြၤ ၃:၁-၆ စံးဝဲဒၣ် တချုးတၢ်စးထီၣ်ဘှီတၢ် နီတမံၤဒံးဘၣ်န့ၣ်, ပှၤယူဒၤဖိတဖၣ် တ့ထီၣ်တၢ်လုၢ်လီၢ် ဒီတနံၣ်ညါန့ၣ်လီၤ. အဆၢဖိ ၆ (ခ့ခါ) ပာ်ဖျါဝဲလၢ, ပှၤဂီၢ်မုၢ်တဖၣ် “……….လုၢ်သီယွၤလၢ တၢ်လုၢ်မ့ၣ်အူလီၤ. ဒီးယွၤအနူၢ်အစီၤအခီၣ်ထံးန့ၣ် ပှၤတပာ်လီၤဒံးဘၣ်ဝဲဘၣ်.” တၢ်ဘူၣ်ထီၣ်ဘါထီၣ်ယွၤ ဟဲဆိဝဲဒၣ်န့ၣ်လီၤ.

မ့ၢ်ယွၤကိးနၤလၢ နကစးထီၣ်မၤတၢ်အသီတမံၤမံၤဧါ. တၢ်ဒုးအိၣ်ထီၣ်တၢ်မၤစၢၤ ကရၢကရိတခါမ့ၢ်ဂ့ၤ, တၢ်မၤလိလံာ်စီဆှံမ့ၢ်ဂ့ၤ, တၢ်တိာ်ကျဲၤတၢ်မၤလၢ အလီၤဆီဒီးတၢ်အဂၤမ့ၢ်ဂ့ၤ, မူဒါတၢ်မၤအသီတမံၤမံၤလၢ တၢ်မၤလီၢ်မ့ၢ်ဂ့ၤ, လံာ်ဧ့စြၤ အတၢ်သိၣ်တၢ်ဘျၢန့ၣ် မ့ၢ်တၢ်လၢအဘၣ်ဘျီးဘၣ်ဒါဝဲန့ၣ်လီၤ. တၢ်တိာ်ကျဲၤတၢ်မၤလၢ ယွၤဟ့ၣ်ပှၤဒၣ်လဲာ် ထုးယံၤပှၤဒီးယွၤသ့ဝဲလီၤ. အဃိ, မ်ပကပာ်ပသးထဲလၢယွၤအလိၤ လၢအဆိတက့ၢ်. တချုးပမၤတၢ်န့ၣ်, ပဘူၣ်ထီၣ်ဘါထီၣ်ယွၤလီၤ.