အပူၤကွံာ်တဘျုးနံၣ်န့ၣ်, ခီဖျိလၢထံကီၢ်ခိၣ်နၢ်ဆီတလဲ, ဒီးတၢ်တၢထီၣ်တၢလီၤအဃိ, ပှၤလၢအဘၣ်ဃ့ၢ်ဟးဖျိးဝဲလၢအထံကီၢ်တဖၣ်အဂီၢ် ပဘၣ်တၢ်ကွဲမုာ် ပတၢ်အိၣ်ဖှိၣ်လၢ ပကတူၢ်လိာ် ၦၤဘၣ်ကီဘၣ်ခဲတဖၣ်န့ၣ်လီၤ. ဟံၣ်ဖီဃီဖိဒီတဖၣ် ဟဲစိာ်ဝဲထဲ ထၢၣ်ဖိလၢပှၤတ့ၢ်နုာ်တၢ်အတြီၢ်တဖၣ်ဖိန့ၣ်လီၤ. ပတၢ်အိၣ်ဖှိၣ် အဟံၣ်ဖိဃီဖိအါမး အိးထီၣ်ဝဲအဟံၣ်, ဃုာ်ဒီးဟံၣ်ဃီတနီၤ လၢအအိၣ်ဒီးဒၢးဆံးဆံးဖိဒၣ်လဲာ် သူၣ်အိၣ်သးအိၣ်ဟ့ၣ်နီၤဝဲန့ၣ်လီၤ.
တၢ်အိၣ်ဖှိၣ်ဖိတဖၣ် အတၢ်သူၣ်အိၣ်သးအိၣ်, အဲၣ်တူၢ်တံၢ်တူၢ်သမှံၤန့ၣ် ဆဲးကပီၤ ပာ်ဖျါထီၣ်က့ၤ ကစၢ်ယွၤ အတၢ်မၤလိာ် သၢထံၣ်, ဖဲလၢၦၤအံၣ်စရ့လးဖိတဖၣ်လဲၤနုာ်ဆူ ကီၢ်တၢ်စံးပာ်, ဒ် ၅ မိၤရှ့ ၂၄:၁၉-၂၁ ပာ်ဖျါဝဲအသိးန့ၣ်လီၤ. ဒ်အမ့ၢ် တၢ်သူၣ်တၢ်ဖျး အပှၤတဝၢအသိး, ယွၤအပှၤဂီၢ်မုၢ်တဖၣ်နၢ်ပၢၢ်ဝဲ တၢ်ကူးဘုအကတီၢ် မ့ၢ်တၢ်လၢအရ့ဒိၣ်န့ၣ်လီၤ. ဒ်သိးကအီၣ်အီဘၣ်တၢ်ဒီတနံၣ်အဂီၢ်, အလီၢ်အိၣ်လၢ တၤသူၣ်တၤသၣ်တဖၣ် ကဘၣ်အိၣ်သပှၢ်တၢၢ်န့ၣ်လီၤ. လၢတၢ်န့ၣ်အဃိ, အဆၢဖိ ၁၉ န့ၣ် ကစၢ်ယွၤမၤလိာ်ဝဲ, “(ဘုတကဒိၣ်) ကအိၣ်ဝဲလၢ ၦၤတခီဘီမုၢ်ဖိအဂီၢ်, လၢၦၤဖိၣ်ဃဲအဂီၢ်, ဒီးလၢၦၤမုၣ်ကမဲအဂီၢ်,” ဒီးမ့ၢ်တၢ်ဃ့ ဒ်သိးပှၤဂီၢ်မုၢ်တဖၣ် ကနာ်သန့ၤအသးလၢယွၤအဂီၢ်စ့ၢ်ကီးန့ၣ်လီၤ. ၦၤအံၣ်စရ့လးဖိတဖၣ် ကဘၣ်သးအိၣ်ဟ့ၣ်ညီတၢ်န့ၣ် တမ့ၢ်ဖဲလၢအသ့ၣ်ညါ အတၢ်အိၣ်လၢလၢလီၢ်လီၢ်မးန့ၣ်ဘၣ်. ကဘၣ်မ့ၢ်ဝဲ သးလၢအအိၣ်ဒီးတၢ်နာ်သန့ၤ ယွၤအတၢ်လုၢ်အီၣ်လုၢ်အီတၢ်အပူၤန့ၣ်လီၤ.
တၢ်တူၢ်တံၢ်တူၢ်သမှံၤအံၤန့ၣ် ဒ်အဆၢဖိ ၁၈,၂၂ ပာ်ဖျါဝဲအသိး မ့ၢ်တၢ်ဒုးသ့ၣ်နီၣ်က့ၤ, “နမ့ၢ်ၦၤကုၢ်ဖိလၢ အဲၤကူပတူးအပူၤ” န့ၣ်လီၤ. ဘၣ်တဘျီ, အဝဲသ့ၣ်ဘၣ်တၢ်မၤနးမၤဖှီၣ်, ဒီးဘၣ်မၤဖှီၣ်မၤယာ်ဝဲဒၣ်န့ၣ်လီၤ. အဝဲသ့ၣ် အတၢ်ဟ့ၣ်ညီတၢ်န့ၣ် မ့ၢ်တၢ်ဒုးသ့ၣ်နီၣ် ယွၤ အတၢ်အဲၣ်အတၢ်သးကညီၤ, အဘျုးအဖှိၣ်, လၢအမၤပူၤမၤဖျဲးအဝဲသ့ၣ် လၢတၢ်စၢဃာ်န့ၣ်လီၤ.
ၦၤစူာ်က့ၤနာ်က့ၤ ကစၢ်ယ့ၣ်ရှူးခရံာ်သ့ၣ်တဖၣ် ကသူၣ်အိၣ်သးအိၣ် ဟ့ၣ်ညီတၢ် ဒ်သိးအံၤအဂီၢ် ဘၣ်တၢ်ဟ့ၣ်သဆၣ်ထီၣ်အဝဲသ့ၣ်န့ၣ်လီၤ. ၂ ကရံၣ်သူး ၈:၉ အပူၤန့ၣ် စီၤပီလူး ဒုးသ့ၣ်နီၣ်က့ၤၦၤလၢ, “အဂ့ၢ်ဒ်အံၤ, သုသ့ၣ်ညါပကစၢ်ယ့ၣ်ၡူးခရံာ်အဘျုးအဖှိၣ်, လၢအထူးဝဲတီၤဝဲဘၣ်ဆၣ်ဒီးႇ ကဲထီၣ်ဝဲလၢအဖှီၣ်အယာ်လၢသုဂီၢ်, ဒ်သိးသုကထူးထီၣ်တီၤထီၣ်, လၢအဝဲဒၣ်အတၢ်ဖှီၣ်တၢ်ယာ်အဃိလီၤ” န့ၣ်လီၤ. မ့ၢ်လၢအဝဲဟ့ၣ်ၦၤအဃိ ပဟ့ၣ်တၢ်န့ၣ်လီၤ.
