ဖဲယဖါတံၢ် အဲမိၣ်ရံၣ် (Emory) စူးကွံာ်သးအကတီၢ်, တၢ်ဟ့ၣ်လၤကပီၤအီၤတဖၣ် အိၣ်ဝဲအါမး, ဒီးအိၣ်ဝဲအကလုာ်ကလုာ်န့ၣ်လီၤ. တၢ်လၤကပီၤခဲလၢာ် အိၣ်ဒီးအခိၣ်တီတမံၤဃီလၢ အဲမိၣ်ရံၣ် ပာ်ဖျါဝဲအတၢ်အဲၣ်ယွၤ ခီဖျိလၢမၤတၢ်ခ့တၢ်ၦၤတၢ်မၤဆူၦၤဂၤအဂီၢ်န့ၣ်လီၤ. ဖဲဟီၣ်ခိၣ်ဒီဘ့ၣ်တၢ်ဒုးဖးဒိၣ် ခံဘျီတဘျီအကတီၢ်န့ၣ်, နုာ်လီၤမၤဝဲ ဒ်ၦၤမၤစၢၤတၢ်လၢ တၢ်ကူစါယါဘျါတကပၤႇ ဒ်အမ့ၢ်ၦၤလဲၤဒုးတၢ်လၢအတစိာ်တၢ်စုကဝဲၤတဂၤအသိးန့ၣ်, တၢ်ဒိတဲာ်လၢအပာ်ဖျါဝဲအံၤ ပထံၣ်န့ၢ်တသ့လၢတၢ်လီၢ်အဂၤလၢၤဘၣ်န့ၣ်လီၤ. ခီဖျိလၢ အတၢ်သူၣ်ဒူသးရၤအဃိ, အဲမိၣ်ရံၣ် ဒိးန့ၢ်ဝဲတၢ်လၤကပီၤအထီကတၢၢ်လၢသုးတကပၤဘၣ်ဆၣ်, အါတက့ၢ်န့ၣ်, တၢ်ဘၣ်သ့ၣ်နီၣ်အီၤလၢ အတၢ်အဲၣ်တၢ်သးကညီၤအတၢ်မၤ လၢတၢ်ဒုးတၢ်ယၤအကတီၢ်, ဒီးတၢ်ဒုးတၢ်ယၤဝံၤအလီၤခံန့ၣ်လီၤ.

အဲမိၣ်ရံၣ် စူးကွံာ်ညိကွံာ်အသး, ဒီးအိၣ်မူဝဲ ဒ်စီၤပီလူးတၤဝဲ ၦၤကလၤတံဖိတဖၣ်န့ၣ်လီၤ. စီၤပီလူးကွဲးဝဲလၢ ကလၤ ၅:၁၃အပူၤ, “ပုၢ်သ့ၣ်ဝဲၢ်သ့ၣ်ဧၢႇ တၢ်ကိးက့ၤသု ဆူတၢ်ထူၣ်ဖျဲးအပူၤလီၤ. ထဲတၢ်အံၤႇ သုတမၤသုတၢ်ထူၣ်ဖျဲးန့ၣ်လၢ တၢ်ဒုးအိၣ်ထီၣ်ပဖံး ပညၣ်အလီၢ်တဂ့ၤ. မ့မ့ၢ်လၢတၢ်အဲၣ်တၢ်ကွံန့ၣ် မၤစၢၤလိာ်သုသးတက့ၢ်” န့ၣ်လီၤ. ဘၣ်ဆၣ် ပကဘၣ်အိၣ်မူဒ်လဲၣ်. လၢပတၢ်ဟးဂူာ်ဟးဂီၤအပူၤ, တၢ်မၤဆိတၢ်လၢၦၤဂၤအဂီၢ်အလီၢ်န့ၣ် ပအဲၣ်ဒိးမၤဆိတၢ်လၢပဂီၢ်အဃိ, တၢ်ညိကွံာ်သးလၢ အတမ့ၢ် ပန့ဆၢၣ်တမံၤအံၤ အိၣ်ဟဲဝဲဒၣ်ဖဲလဲၣ်.

ဖံးလံး ၂:၅ အပူၤန့ၣ်, စီၤပီလူး ဟ့ၣ်ဂံၢ်ဟ့ၣ်ဘါဝဲလၢႇ “သးတမံၤလၢအအိၣ်လၢ ယ့ၣ်ၡူးခရံာ်အပူၤန့ၣ်, မ်အအိၣ် စ့ၢ်ကီးလၢသုပူၤတက့ၢ်” န့ၣ်လီၤ. စီၤပီလူး ပာ်ဖျါဝဲ, မ့ၢ်လၢအတၢ်အဲၣ်ၦၤဒိၣ်ဒိၣ်ယိာ်ယိာ်အဃိ, လၢသ့ၣ်ထူၣ်လိၤဒၣ်လဲာ် ကစၢ်ယ့ၣ်ရှူးခရံာ် အသးအိၣ်တူၢ်သံအသးန့ၣ်လီၤ. ထဲဒၣ်ဖဲလၢ ကစၢ်အသးစီဆှံ မ့ၢ်ဒုးအိၣ်ထီၣ် ခရံာ် အသးလၢပပူၤန့ၣ်ဒီး, ပကဘၣ်တၢ်ပာ်လီၤဆီပှၤ, ဒီးတၢ်ဟ့ၣ်လီၤသးလၢ ၦၤဂၤအဂီၢ် ကသ့ဝဲဒၣ် – တၢ်အိၣ်မူလၢအဆဲးကပီၤဖျါထီၣ်က့ၤ ကစၢ်ယ့ၣ်ၡူးလုၢ်ထီၣ်အသးသမူလၢာ်လၢာ်ဆ့ဆ့ ဖဲအဟ့ၣ်လီၤအသးလၢပဂီၢ်န့ၣ်လီၤ. မ်ပကဟ့ၣ်လီၤသး, ဒီးပျဲသးစီဆှံ ကမၤတၢ်လၢပပူၤန့ၣ်တက့ၢ်.