ၦၤဘှီစဲးဖီကဟၣ်တဂၤကဟဲ, ဒီးဘှီဂ့ၤထီၣ်အတၢ်ခုၣ်ဒၢအဂီၢ် ယတံၤသကိး ပီလ် အိၣ်ခိးကွၢ်လၢ်ဝဲအကတီၢ်န့ၣ်, ထံၣ်တၢ်ကစီၣ် ဟဲဖျါထီၣ်လၢ အလီတဲစိ ဘၣ်တၢ်ဆှၢန့ၢ်အီၤ လၢတၢ်ဘှီဂ့ၤထီၣ်တၢ်အခီပနံာ်န့ၣ်လီၤ. တၢ်ကစီၣ် စံးဝဲႇ “ယ့ၣ်ၡူးဟဲဝဲလၢကျဲ, ဒီးတၢ်တယာ်လၢ ကတုၤဝဲဖဲ ဂီၤ ၁၁:၃၅ န့ၣ်လီၤ.” ပီလ် သ့ၣ်ညါထွဲဝဲလၢ ၦၤဘှီတၢ်တဂၤအံၤအမံၤ မ့ၢ်ဝဲ ယ့ၣ်ၡူး (ဟ့-စူးစ်- Jesus) နီၢ်နီၢ်န့ၣ်လီၤ.

ဘၣ်ဆၣ်, ယွၤအဖိခွါ, ကစၢ်ယ့ၣ်ၡူး ကဟဲဝဲအကတီၢ်မတၤလဲၣ်န့ၣ် ပမုၢ်လၢ်ဘၣ်ကသ့ဧါ. အပူၤကွံာ် အနံၣ်ခံကထိ, ဖဲအဝဲဟဲဒ် ၦၤကညီအသိးႇ ဒီးဟ့ၣ်လီၤအသး, လၢပတၢ်ဒဲးဘးအဃိ တူၢ်ဘၣ်ခီၣ်ဘၣ်တၢ်နးတၢ်ဖှီၣ်ဝံၤ, မး ၂၄:၃၆ အပူၤန့ၣ် စံးဝဲလၢ ကဟဲက့ၤဝဲဘၣ်ဆၣ် ထဲပၢ်ကစၢ်ယွၤတဂၤဧိၤ သ့ၣ်ညါဝဲ မုၢ်နံၤဒီးနၣ်ရံၣ် လီၤတံၢ်လီၤဆဲးလၢ အတၢ်ဟဲက့ၤတၢ်န့ၣ်လီၤ. ဒ် ယိၤ ၁၄:၁-၃ပာ်ဖျါဝဲအသိး, ပမ့ၢ်သ့ၣ်ညါ တၢ်ဆၢကတီၢ်လၢ ပတၢ်အုၣ်က့ၤခီၣ်က့ၤကစၢ် ကဟဲက့ၤဆူဟီၣ်ခီၣ်န့ၣ်ဒီး, တၢ်လီၤတိၢ်လီၤဆီမနုၤ ကအိၣ်ထီၣ်လၢ ကိးမုၢ်နံၤပတၢ်ဖံးတၢ်မၤ လၢပပာ်ဒိၣ်အီၤ တဖၣ်အဂီၢ်န့ၣ်လဲၣ်.

မး ၂၄:၄၄ အပူၤန့ၣ် ကစၢ်ယ့ၣ်ၡူး ဟ့ၣ်ပလီၤၦၤလၢ ပကအိၣ်ကတဲာ်ကတီၤပသးလၢ အတၢ်ဟဲက့ၤအဂီၢ်ဒီးစံးဝဲ, “နၣ်ရံၣ်လၢသုတဆိကမိၣ်ဘၣ်န့ၣ်, ၦၤကညီ ဖိခွါအံၤကဟဲဝဲလီၤ” န့ၣ်လီၤ. အဆၢဖိ ၄၂ န့ၣ် ဒုးသ့ၣ်နီၣ်ၦၤက့ၤလၢ “ဆိးသီတက့ၢ်. အဂ့ၢ်ဒ်အံၤႇ မ့ၢ်သုကစၢ်ကဟဲ နၣ်ရံၣ်ဖဲလဲၣ်ဖဲလဲၣ်န့ၣ်, သုတသ့ၣ်ညါဘၣ်” န့ၣ်လီၤ.

မုၢ်နံၤဖဲ ကစၢ်ခရံာ်ဟဲက့ၤန့ၣ်, ဒ်သိးပကပာ်သူၣ်ပာ်သးအဂီၢ် တမ့ၢ်လၢပကဒိးန့ၢ်တၢ်ဟ့ၣ်ပလီၢ် ဟဲခီဖျိလၢပလီတဲစိဘၣ်. လၢတၢ်န့ၣ်အဃိႇ ခီဖျိလၢသးစီဆှံကစၢ် အစိကမီၤမၤတၢ်လၢပပူၤန့ၣ်ဒီး, မ်ပကအိၣ်မူအိၣ်ဂဲၤကိးမုၢ်နံၤ လၢတၢ်ကွၢ်ထီၣ်ဆူတၢ်မူအထူအယိာ် ခီဖျိလၢတၢ်မၤယွၤအတၢ်မၤ, ဒီးဟံးန့ၢ် တၢ်ဆၢကတီၢ်ခွဲးယၢ်အဂ့ၤအဘၣ်ခဲလၢာ် လၢတၢ်ဟ့ၣ်ခီဟ့ၣ်နီၤ တၢ်ကစီၣ်လၢအဘၣ်ထွဲဒီးယွၤအတၢ်အဲၣ်, ဒီးပကမုၢ်လၢ်ဃုာ်တၢ်ဒီးၦၤဂၤန့ၣ်တက့ၢ်.