အိၣ်လံၤ ခဲးစီ (Ole Kassow) မ့ၢ်ပှၤအဲၣ် တၢ်ဒိးလ့ၣ်ယီၢ်ခီၣ် ဒီးအိၣ်ဆိးဝဲလၢ ကိၣ်ပဲၣ်ဟ့ၣ်ဂဲၤ Copenhagen) အဝ့ၢ်န့ၣ်လီၤ. ဘၣ်တဂီၤ, ဖဲအထံၣ်ဘၣ် ပှၤသးပှၢ်ပိာ်ခွါတဂၤ ဆ့ၣ်နီၤထဲတဂၤဧိၤဒီး အထးကွီၤ ဟးစၢၤတၢ် (walker) လၢကမျၢၢ်ဖီကရၢၢ်အပူၤန့ၣ်ဒီး, တၢ်ဆိကမိၣ်ယိယိဖိတမံၤ ထိၣ်ဟူးထိၣ်ဂဲၤထီၣ်အီၤ- အတၢ်ဆိကမိၣ်အံၤ မ့ၢ်ဝဲလၢကဟ့ၣ်ပှၤသူၣ်က့သးပှၢ်တဖၣ် တၢ်သူၣ်ဖှံသးညီဒီးတၢ်သဘျ့ ဘၣ်ထွဲဒီးတၢ်ဒိး လ့ၣ်ယီၢ်ခီၣ်န့ၣ်လီၤ. လၢတၢ်န့ၣ်အဃိ, ဖဲမူခိၣ်ကဆှီအမုၢ်တနံၤန့ၣ်, အဝဲပာ်ကတီၢ် လ့ၣ်ယီၢ်ခီၣ်လၢ ဒိးလဲဝဲ (အပၣ်အိၣ်သၢခါတခိၣ်) ဖဲတၢ်ကွၢ်ထွဲ ပှၤသးပှၢ်အဟံၣ်, ဒီးကွဲမုာ်ဝဲ ကယဲၢ်ပှၤတဂၤလၢ်လၢ် လၢအသးအိၣ်ဒိးတဖၣ် ကဒိးအဂီၢ်န့ၣ်လီၤ. အဝဲမုာ်လၤသးခုဝဲ ဖဲပှၤမၤတၢ်ဖိတဂၤ, ဒီးပှၤသးပှၢ်တဂၤ ကဲထီၣ်ပှၤဒိးတၢ်အဆိကတၢၢ်ခံဂၤလၢ “တၢ်ဒိးလ့ၣ်ယီၢ်ကရၢလၢ တအိၣ်ဒီးတၢ်ပာ်ပနီၣ် သးအနံၣ်” (Cycling Without Age) န့ၣ်လီၤ.
ခဲကနံၣ်အံၤ, ယံာ်တ့ၢ်လံအနံၣ်ခံဆံပူၤကွံာ်ဝံၤအလီၢ်ခံန့ၣ်, ပှၤသးပှၢ် ၅၇၅,၀၀၀ ဂၤန့ၣ်, ဒိးဘၣ်ဝဲ အဘျီ ၂.၅ ကကွဲၢ် အဃိ အိၣ်လံၤ အတၢ်မံမီၢ်လၢ ကမၤစၢၤပှၤသးပှၢ် လၢအသးသယုၢ်ဘၣ် တၢ်ဒိးလ့ၣ်ယီၢ်ခီၣ်တဖၣ်အဂီၢ် ကဲထီၣ်တ့ၢ်တၢ်ဆိၣ်ဂ့ၤန့ၣ်လီၤ. အဝဲသ့ၣ် လဲၤဒိးဝဲဆူတၢ်လီၢ်မတၤလဲၣ်. အဝဲသ့ၣ် လဲၤဒိးဝဲလၢ တၢ်ကလဲၤထံၣ်အတံၤသကိးအဂီၢ်, ကလဲၤပှ့ၤအီၣ် ကိၣ်ထံခုၣ်ဖီအဂီၢ်, ဒီး“ကကလၢၢ်ဘၣ် ကလံၤအူကသုၣ် အခိၣ်သူအဂီၢ်” န့ၣ်လီၤ. ပှၤဒိးတၢ်တဖၣ်စံးဝဲ အဝဲသ့ၣ် မံမုာ်, အီၣ်ဝံၣ်အီၣ်ဘဲ, ဒီးတၢ်သယုၢ်သညိ ဆံးလီၤစှၤလီၤဝဲဒၣ်န့ၣ်လီၤ.
တၢ်ဟ့ၣ်ဒ်သိးအံၤ မၤမူထီၣ် ကစၢ်ယွၤအတၢ်ကတိၤ အဃံအလၤ လၢအပှၤဂီၢ်မုၢ်တဖၣ်အဂီၢ်, ဖျါဖဲ လံာ်ယရှါယၤ ၅၈:၁၀-၁၁ အပူၤန့ၣ်လီၤ. ကစၢ်ယွၤစံးဘၣ်တဲဘၣ်, ဒီးအၢၣ်လီၤအီလီၤ အပှၤဂီၢ်မုၢ်လၢ, “နမ့ၢ်သးအိၣ်ပှၤလၢတၢ်သၣ်ဝံၤအသး, ဒီးမၤမံသး ပှၤလၢအသးဘၣ်နးဘၣ်ဖှီၣ်ဒီး, နတၢ်ကပီၤ ကကပီၤထီၣ်လၢတၢ်ခံးကျါ, ဒီးနတၢ်ခံးကမၤသးဒ်မုၢ်ထူၣ်အသိးန့ၣ်, ဒီးယွၤကဆှၢနၤတထံၣ်ဃီ, ဒီးကမၤ မံနသးလၢ တၢ်အလီၢ်ဃ့အပူၤ, ဒီးကမၤဆူၣ်ထီၣ် နဃံနကွဲ, ဒီးနကမၤသးဒ်တၤသၣ် အလီၢ်ဘၣ်စီၣ် အသိး, ဒီးဒ်ထံထီၣ်ပၢၢ်တပူၤလၢ အထံ တလီၤသံးဘၣ်အသိးန့ၣ်လီၤ.”
ဖဲအဆၢဖိ ၁၂ န့ၣ် ယွၤစံးဘၣ်အပှၤဂီၢ်မုၢ်, “ပှၤလၢအဟဲထီၣ်လၢနၤတဖၣ် ကမၤက့ၤ တၢ်အလီၢ် အိၣ်သယုၢ်တဖၣ်” န့ၣ်လီၤ. ခီဖျိလၢပဝဲနၤယၤတဖၣ်န့ၣ် မ့ၢ်ကစၢ်ယွၤကမၤတၢ်မနုၤလဲၣ်. ဒ်ကစၢ်ယွၤ မၤစၢၤပှၤအသိး, မ်ပကအိၣ်ကတဲာ်ကတီၤပသးထီဘိ လၢတၢ်မၤစၢၤပှၤဂုၤပှၤဂၤအဂီၢ်န့ၣ်တက့ၢ်.
