ပိာ်မုၣ်တဂၤ မၤပူၤဖျဲး ထွံၣ်ဖါဖိ ရူဒံၢ် (Rudy) လၢဆၣ်ဖိကီၢ်ဖိ အတၢ်အိၣ်တဒၢအလီၢ်, တချုးဖဲနံၤသီ တဖၣ်လၢ ထွံၣ်ဖိကဘၣ်တၢ်ဆဲးသံအီၤလၢကသံၣ် ဒ်သိးအသုတတူၢ်ဘၣ်အဂီၢ်, ဒီးထွံၣ်ဖိအံၤ ကဲထီၣ် အတံၤသကိးလၢအဂီၢ်န့ၣ်လီၤ. အနံၣ်တဆံအတီၢ်ပူၤ ရူဒံၢ် မံလၢ လ့ဒၣ် (Linda) အလီၢ်မံအဃၢၤ မုာ်မုာ် ခုၣ်ခုၣ်ဘၣ်ဆၣ်, သတူၢ်ကလာ်န့ၣ် အဝဲစံၣ်ထီၣ်ဆူ လ့ဒၣ် အကပၤ ဒီးလ့ၣ်ဝဲအမဲာ်သၣ်န့ၣ်လီၤ. လ့ဒၣ် ဒူဝဲထွံၣ်ဖိဘၣ်ဆၣ်, ရူဒံၢ် မၤဝဲအံၤ ကိးမုၢ်နံၤ, ကိးမုၢ်နၤဒဲးန့ၣ်လီၤ. လ့ဒၣ် စံးဝဲ “တယံာ်ဘၣ်န့ၣ်, တုၤမ့ၢ် ယဆ့ၣ်နီၤလီၤ ကိးဘျီဒဲးန့ၣ်, အဝဲစံၣ်ထီၣ်ဆူ ယဟုးလာ်လိၤ, ဒီးလ့ၣ်ဝဲယမဲာ်သၣ်န့ၣ်လီၤ.”

ဖဲ လ့ဒၣ် တိာ်ကျဲၤဝဲလၢ အကဆှၢ ရူဒံၣ် ဆူတၢ်သိၣ်လိနဲၣ်လိ ထွံၣ်တဖၣ်အကၠိန့ၣ်, အဝဲစးထီၣ် ဆိကမိၣ်ထံသ့ၣ်ညါဝဲလၢ ထီဘိန့ၣ် ရူဒံၣ် လ့ၣ်အီၤလၢတၢ်လီၢ်တတီၤဃီ ဖဲအခၣ်လာ်ဃံလိၤအဂ့ၢ် န့ၣ်လီၤ. လၢတၢ်မဲာ်ဆှးတစဲးစဲးအပူၤ, လ့ဒၣ် လဲၤထံၣ်လိာ်သးဒီးကသံၣ်သရၣ်တဂၤ, ဒီးထံၣ်န့ၢ်ဝဲဒၣ်လၢ အဝဲအိၣ်ဒီး တၢ်ကိၣ်လိၣ်ဆံးဆံးဖိ (တၢ်အဃံအကွဲခဲစၢၣ်) ပှၤထံၣ်အီၤသ့ ခီဖျိထဲလၢ မဲာ်ကလၤပီၤ န့ၣ်လီၤ. ကသံၣ်သရၣ်ဒုးသ့ၣ်ညါ လ့ဒၣ် လၢအဝဲမ့ၢ်ခိးယံာ်အါထီၣ်န့ၣ်ဒီး, ကသံလၢ တၢ်ဆါအံၤသ့ဝဲဒၣ် န့ၣ်လီၤ. မ့ၢ်လၢ လ့ဒၣ် နာ်န့ၢ်ဝဲ ရူဒံၣ် အတၢ်သ့ၣ်ညါသးအန့ဆၢၣ်အဃိ, သူၣ်ခုသးခုဝဲဒၣ်န့ၣ်လီၤ.

လံာ်စီဆှံစံးဘၣ်ပှၤတလီၢ်လီၢ်လၢ တၢ်သန့ၤသးလၢယွၤန့ၣ် ဆှၢပှၤဆူ တၢ်မူဒီးတၢ်သးခုန့ၣ်လီၤ. ဖဲထါစံးထီၣ်ပတြၢၤ ၄၀:၄ န့ၣ်, ပှၤကွဲးထါစံးဘၣ်ပှၤ, “ပှၤလၢအပာ်ယွၤလၢ အတၢ်သန့ၤအသးန့ၣ်… ဘၣ်ဆိၣ်ဂ့ၤဝဲလီၤ” န့ၣ်လီၤ. လံာ်စီဆှံတနီၤ (NRSVအဆၢဖိ ၄)အပူၤ ဘၣ်တၢ်ကွဲးကျိာ်ထံဝဲ “ပှၤလၢ အပာ်ယွၤလၢ အတၢ်သန့ၤအသးတဖၣ်န့ၣ် ကသးခုဘၣ်ဝဲလီၤ” န့ၣ်လီၤ. လၢထါစံးထီၣ်ပတြၢၤတဖၣ် အပူၤ တၢ်ကတိၤ “သးခု” ပာ်ဖျါထီၣ်ဝဲ တၢ်သူၣ်ပိာ်သးဝး, တၢ်သူၣ်ဟူးသးဂဲၤ အတၢ်သူၣ်ခုသးခု ဂီၢ်မုၢ် ဂီၢ်ပၤန့ၣ်လီၤ.

ဖဲပနာ်သန့ၤသးလၢယွၤန့ၣ်ဒီး, အကတၢၢ်တၢ်အစၢမ့ၢ်ဝဲ တၢ်သးခုအဒိၣ်အယိာ်နီၢ်နီၢ်န့ၣ်လီၤ. တၢ်နာ် သန့ၤသးအံၤ တဟဲအိၣ်ထီၣ်ညီကဒၣ်ဖိဘၣ်. ဒီးဘၣ်သ့ၣ်သ့ၣ် တၢ်အစၢတဖၣ်ခဲလၢာ် တမ့ၢ်ဒ်ပကွၢ်စိ ထံၣ်စိအီၤန့ၣ်ဘၣ်. ဘၣ်ဆၣ် ပမ့ၢ်နာ်သန့ၤသးလၢကစၢ်ယွၤန့ၣ်ဒီး မ့ၢ်လၢပနာ်သန့ၤဘၣ်အီၤအဃိ, ပကသးခုဘၣ်ဝဲဒိၣ်ဒိၣ်မုၢ်မုၢ်သပှၢ်တၢၢ်န့ၣ်လီၤ.