တၢ်အီၣ်အပှ့ၤ ဒီလၣ်လၢအကထိတဖၣ်- သဒီၣ်ကိၤဖးဒိၣ်, ကိၣ် ရှဝၣ်မၣ် (shawarma), တၢ်အီၣ် စံၢ်ဃါ (salads), ဒီးဂုၤဂၤအါမးတဖၣ်- ဘၣ်တၢ်ဟဲစိာ်ဆှၢဆူ ဟံၣ်ကစၢ်တဂၤအအိၣ်န့ၣ်လီၤ. ဘၣ်ဆၣ်, အဝဲတမၤ မူးပွဲနီတမံၤဘၣ်. နီၢ်နီၢ်န့ၣ်, အဝဲတမၤလိာ် တၢ်အီၣ်အါကလုာ်န့ၣ်ဘၣ်, မ့ၢ်ဒၣ် အဖိပိာ်ခွါအိၣ် ဃုနံၣ်ဖိ မၤဝဲဒၣ်န့ၣ်လီၤ. တၢ်မၤအသးအံၤ ကဲထီၣ်သးဒ်လဲၣ်. မ့ၢ်လၢပၢ်တဂၤအံၤ တချုးအဖိခွါမံအကတီၢ်ဖိန့ၣ် ပျဲဝဲလၢအဖိခွါကလိာ်ကွဲ အကွဲၤဒီနၢ်အဃိဒီး, ဖိသၣ်အံၤ စူးကါ ကွဲၤဒီနၢ် ဒီးတၢ်အီၣ်လၢအပှ့ၤဒိၣ်တဖၣ် ပှ့ၤဝဲအါအါဂီၢ်ဂီၢ် လၢတၢ်အီၣ်အကျးအါဖျၢၣ်အအိၣ်န့ၣ်လီၤ. အပၢ် သံကွၢ် အဖိခွါဖိ, အိၣ်ခူသူၣ်လၢ ယၣ်လုးဘဲအဖီလာ်လၢ “ဘၣ်မနုၤအဃိ နမၤတၢ်ဒ်သိးအံၤ န့ၣ်လဲၣ်” ဒီး, ပှၤဃုနံၣ်ဖိ စံးဆၢဝဲ “တၢ်သၣ်ဝံၤယသးအဃိ” န့ၣ်လီၤ. ပိာ်ခွါဖိသၣ်အံၤ အတၢ်သၣ်ဝံၤ ဒီးအတၢ်နၢ်ပၢၢ် တထီၣ်ဘးတၢ်န့ၣ် အစၢဟဲထီၣ်လၢ တၢ်လၢာ်ဘူၣ်လၢာ်စ့လၢ အပှ့ၤကလံၤဒိၣ်တၢ် တမံၤန့ၣ်လီၤ.

စီၤဧ့ရှီၤ အတၢ်သၣ်ဝံၤ လၢာ်ဘူၣ်လၢာ်စ့ အါန့ၢ် ဒီလၣ်တကထိန့ၣ်လီၤ. တၢ်ဂ့ၢ်ဖဲ ၁ မိၤရှ့ ၂၅ အပူၤ, ပကထံၣ်ဘၣ်လၢ စီၤဧ့ရှီၤလီၤဘှံးလီၤတီၤ ဒီးလိၣ်ဘၣ်တၢ်အီၣ်နီၢ်နီၢ်န့ၣ်လီၤ. အဆၢဖိ ၃၀ န့ၣ် စံးဘၣ် အပုၢ်ဒ့ခွါလၢ “ဒုးအီၣ်စာ်ယၤလၢ တၢ်အဂီၤအံၤတက့ၢ်. အဂ့ၢ်ဒ်အံၤ ယသးလီၤဘှါလီၤ” န့ၣ်လီၤ. အဆၢဖိ ၃၁ ပာ်ဖျါဝဲလၢ စီၤယၤကိာ် စံးဆၢက့ၤတၢ် ဒီးဃ့ဝဲ စီၤဧ့ရှီအဝဲၢ်ကိအလီၢ်န့ၣ်လီၤ. ဝဲၢ်ကိအလီၢ်စံးတၢ်န့ၣ် ပၣ်ဃုာ်ဒီး စီၤဧ့ရှီၤ အလီၢ်လီၤဆီ ဒ်အမ့ၢ် ဖိဝဲၢ်ကိ, တၢ်ဆိၣ်ဂ့ၤလၢ ကစၢ်ယွၤ အၢၣ်လီၤပာ်ဝဲ, တၢ်န့ၢ်သါ ခံစး, ဒီးတၢ်ကဲဘၣ် ဟံၣ်ဒူၣ်အနီၢ်သးခိၣ်နၢ်န့ၣ်လီၤ. အဝဲဟ့ၣ်လီၤသးဆူ အတၢ်သၣ်ဝံၤ, ဒီးအဆၢဖိ ၃၄ စံးဘၣ်ပှၤလၢ စီၤဧ့ၤရှီ “အီၣ်တၢ်ဒီးအီတၢ်” ဒီး “တပးကဲဘၣ် ဝဲၢ်ကိ အလီၢ်ဘၣ်” န့ၣ်လီၤ.

ဖဲပဘၣ်တၢ်လ့ပစီ ဒီးမိၣ်န့ၢ်သးလီတၢ်တမံၤမံၤအကတီၢ်, ဒ်သိးလၢပကပျဲ ပတၢ်သးကွံစိာ်ဆှၢ ပှၤဆူ တၢ်ကမၣ်ဖးဒိၣ် ဒီးတၢ်ဒဲးဘးအလီၢ်န့ၣ်, မ်ပကကွၢ်ထီၣ် ပပၢ်အိၣ်လၢမူခိၣ် – ကစၢ်ထဲတဂၤဧိၤ, ဒ်စံး ၁၀၇:၉ စံးဘၣ်ပှၤ, ကမၤမံသူၣ်မံသး ပသးအတၢ်သၣ်ဝံၤလၢ “တၢ်အဂ့ၤသ့ၣ်တဖၣ်” န့ၣ်တက့ၢ်.