မ့ၢ်လၢဟီၣ်ခိၣ်ဟူးဒီးတၢ်သူၣ်ထီၣ်ခံကထၢလၢအလီၤပှီၢ်အဖီလာ်န့ၣ်, အူးခဲကၢ်ဘျဲးအက့အခီတဖၣ် ကျၢၢ်ဘၢကတြံာ်ဃာ် ဆံရံယါဖိသၣ်မုၣ် ကၠံၤနါ (Jinan) ပှၤအိၣ်ယဲၢ်နံၣ်ဖိတဂၤ လၢအကျၢၢ်ဘၢဃာ် အပုၢ်ပိာ်ခွါဖိန့ၣ်, လၢတၢ်လီၤပှီၢ် အကမှံၤကမှိာ်အကျါ ကိးပသူထီၣ်တၢ်ဆူ ပှၤမၤစၢၤတၢ်တဖၣ်အအိၣ် “ထုးထီၣ်န့ၢ်ယၤလၢတၢ်လီၢ်တတီၤအံၤ, ယကမၤတၢ်ကိးမံၤလၢသုဂီၢ်,” အဝဲကိးထီၣ်လၢ တၢ်သူၣ်ကၢ် သးလီၤအပူၤ, “ယကကဲသုကုၢ်လီၤ” န့ၣ်လီၤ.

တၢ်သူၣ်ကီၢ်သးဂီၤအတၢ်ကိးပသူတဖၣ်န့ၣ် အိၣ်ပှၤဝဲလၢ လံာ်ထါစံးထီၣ်ပတြၢၤဒီဘ့ၣ်အပူၤ, စံး ၁၁၈:၅ ပာ်ဖျါဝဲ “လၢယဘၣ်တၢ်ကိၢ်တၢ်ဂီၤအပူၤန့ၣ် ယကိးထီၣ်ယွၤလီၤ” န့ၣ်လီၤ. ခီဖျိဟီၣ်ခိၣ် ဟူးဝးအဃိ တၢ်သူၣ်ထီၣ်လီၤပှီၢ်အတၢ်လီၤကလဲတဖၣ် ဒိးဃၢဃာ်ပှၤန့ၣ် ပမ့ၢ်တအိၣ်ဆိးလဲၤခီဖျိ ဘၣ်နီတဘျီဘၣ်ဆၣ်, တၢ်ပျံၤတၢ်ဖုး အိၣ်ဟဲခီဖျိ, တၢ်တၤတၢ်တဖၣ်လၢ တၢ်ယါဘျါတၢ်အိၣ်ဆူၣ် အိၣ်ချ့, တၢ်ဂ့ၢ်ကီလၢမုၢ်ကျိၤဝဲၤကွာ်အတၢ်မၤ, တၢ်အိၣ်မူခါဆူညါအဂီၢ် တၢ်လီၤတံၢ်လီၤဆဲးတအိၣ်, မ့တမ့ၢ် တၢ်ရ့လိာ်ဘၣ်ထွဲလိာ်သးတဖၣ် ဟးဂီၤလီၤမၢ်အဃိ ပသါတပၢၢ်လၢၤဘၣ်န့ၣ် ပဝဲခဲလၢာ် ပသ့ၣ်ညါနီၣ်ဝဲဒၣ်န့ၣ်လီၤ.

အကတီၢ်ဒ်သိးအံၤအပူၤ, လၢတၢ်မၤပူၤဖျဲးပှၤအဂီၢ် ဘၣ်သ့ၣ်သ့ၣ် ပကအၢၣ်လီၤလိာ်သးတၢ်ဒီး ကစၢ်ယွၤန့ၣ်လီၤ. ဘၣ်ဆၣ် ကစၢ်ယွၤကမၤစၢၤတၢ်အဂီၢ် တလိၣ်နကွဲန့ၢ်လွဲန့ၢ်အီၤဘၣ်. ကစၢ်ယွၤ အၢၣ်လီၤဝဲလၢ ကစံးဆၢပှၤ, ဒီးဖဲလၢပတပူၤဖျဲးထီၣ်ဒံးဘၣ် လၢပတၢ်ဂ့ၢ်ကီအကတီၢ်န့ၣ်, အဝဲ ကအိၣ်ဒီးပှၤ, ဒီးကအိၣ်ဆိးလၢပအိၣ်တကပၤန့ၣ်လီၤ. တလိၣ်လၢပကဘၣ်ပျံၤ တၢ်ဘၣ်ယိၣ်ဘၣ်ဘီ ဒိၣ်ဒိၣ်မုၢ်မုၢ်အဂၤတဖၣ် – ပာ်ဃုာ်ဒီး တၢ်သံန့ၣ်လီၤ. အဆၢဖိ ၇ အပူၤ ဒ်ပှၤကွဲးထါစံးဝဲ “ ယွၤအိၣ်လၢ ယအိၣ်တခီ, လၢပှၤမၤစၢၤယၤအကျါလီၤ. မၤသးဒ်န့ၣ်ဒီး ယကထံၣ် ယတၢ်အဲၣ်ဒိးလၢပှၤလၢ အသးဟ့ယၤတဖၣ်အလိၤန့ၣ်လီၤ” အသိး ပစံးကတိၤပိာ်ထွဲသ့ဝဲဒၣ်န့ၣ်လီၤ.

ပတဘၣ်တၢ်အၢၣ်လီၤပှၤလၢ တၢ်ကမၤပူၤဖျဲးပှၤ တၢ်လၢအလီၤသူၣ်ပိၢ်သးဝး, ဒ်ကၠံနါဒီးအပုၢ်ဖိ လဲၤခီဖျိဘၣ်ဝဲအသိးဘၣ်ဆၣ်, ပနာ်န့ၢ် ပကစၢ်ယွၤ လၢအတီဝဲလိၤဝဲတဂၤသ့, ကစၢ်လၢအစိာ်ဆှၢ ပှၤကွဲးထါစံးထီၣ်ပတြၢၤ ဖျါဖဲအဆၢဖိ ၅ “ဆူအလီၢ်ဖးလဲၢ်” န့ၣ်လီၤ. ယွၤသ့ၣ်ညါ ပတၢ်အိၣ်အသး မၤအသး, ဒီးလၢတၢ်သံအပူၤဒၣ်လဲာ် တစူးကွံာ်ညိကွံာ်ပှၤနီတဘျီဘၣ်န့ၣ်လီၤ.