ဖဲတၢ်တယံာ်ဒံးဘၣ်န့ၣ်, ယဖးဘၣ်တၢ်တဲပူၤ ဘၣ်ဃးဒီး ပိာ်မုၣ်လၢ အတအၢၣ်လီၤတူၢ်လိာ်လၢ အအိၣ်ဒီး ခဲစၢၣ်တၢ်ဆါလၢ ပှၤကူစါအီၤတန့ၢ်လၢၤဘၣ် တဂၤအဂ့ၢ်န့ၣ်လီၤ. ဖဲနံၣ်ကိလၤ (Nicola) အတံၤသကိးလၢ အမၤအ့န့အသးတဖၣ် မၢဆူၣ်အီၤလၢ ကကွၢ်ဆၢၣ်မဲာ် တၢ်မ့ၢ်တၢ်တီအံၤန့ၣ်ဒီး, တၢ်ဂ့ၢ်မိၢ်ပှၢ်လၢ အတတူၢ်လိာ်ဝဲအဂ့ၢ်န့ၣ် အိၣ်ဖျါထီၣ်ဝဲန့ၣ်လီၤ. အဝဲစံးဘၣ်အတံၤသကိးခဲလၢာ်လၢ “ယအိၣ်မူလၢာ်ဂီၤကလီယတၢ်အိၣ်မူ” န့ၣ်လီၤ. အဝဲအိၣ်ဖျဲၣ်ထီၣ်လၢ အအိၣ်ဒီးတၤလၣ်တဖၣ် ဒီးတၢ်စုလီၢ်ခီၣ်ခိၣ်တဖၣ်ဘၣ်ဆၣ်, “ယတမၤတၢ်နီတမံၤလၢ ယတၢ်အိၣ်မူအပူၤဘၣ်. ယတမၤတၢ် လီၤတံၢ်လီၤဆဲးဘၣ်. ယတဂုာ်ကျဲးစၢးမၤ တၢ်နီတမံၤဘၣ်” န့ၣ်လီၤ. ခဲကန့ၣ်အံၤ, တၢ်ထံၣ်အိၣ်ဖျါ လၢအမဲာ်ညါ လၢကဘၣ်ပာ်တ့ၢ်ဟီၣ်ခိၣ်န့ၣ်, အသးကလၢၢ်ဘၣ်ဝဲလၢ အမၤန့ၢ်မၤနၢၤတၢ် မ့ၢ်ဒၣ်ထဲ တၢ်အဆံးအစှၤဖိအဃိ, ဒ်သိးနံၣ်ကိလၤ ကတူၢ်လိာ်ဝဲန့ၣ် ကဲထီၣ်တၢ်သးဘၣ်ဒိဆါဒိၣ်မးလၢအဂီၢ် န့ၣ်လီၤ.
ယဖးလံာ်တၢ်စံၣ်တဲၤတဲလီၤ တကတီၢ်ဃီဃၣ်ဃၣ်ဒီး လံာ်တၢ်တဲပူအံၤဒီး ထံၣ်န့ၢ်တၢ်လီၤဆီ ပျီပျီဖိန့ၣ်လီၤ. ဒ်စံၣ်တဲၤ ၉:၁၀ ပာ်ဖျါဝဲ “ပျုၤပူၤ ဖဲနလဲၤတၢ်” အသိး ပှၤစံၣ်တဲၤတဲလီၤတၢ်သရၣ်န့ၣ် တပျဲလၢပကဟးဆှဲး တၢ်သံတၢ်ပှၢ် အတၢ်မ့ၢ်တၢ်နီၢ်နီၢ်န့ၣ်ဘၣ်. အဆၢဖိ ၂ စံးဝဲ တၢ်ကွၢ်ဆၢၣ်မဲာ် တၢ်သံန့ၣ် တၢ်ဂ့ၢ်ကီ, အဆၢဖိ ၄ ပာ်ဖျါဝဲ တၢ်ကွၢ်ဆၢၣ်မဲာ်တၢ်သံန့ၣ် နဲၣ်ဆှၢပှၤဒ်သိး ပတၢ်ပာ်လုၢ်ပာ်ပှ့ၤ ကိးဆၢကိးကတီၢ်လၢ အအိၣ်ဒီးပှၤခဲကနံၣ်အံၤ, အဆၢဖိ ၇-၉ ပာ်ဖျါဝဲ ဟ့ၣ်တၢ်ဆၢကတီၢ် အီၣ်အီသကိးဒီးဟံၣ်ဖိဃီဖိ, အဆၢဖိ ၁၀ ပာ်ဖျါဝဲ ဖံးတၢ်မၤတၢ်လၢ တၢ်ပညိၣ်လီၤတံၢ်, အဆၢဒိၣ် ၁၁:၁,၆ စံးဘၣ်ပှၤ ဃုလဲၤခီဖျိမၤ တၢ်သူၣ်ပိၢ်သးဝးဒီးတၢ်လီၤပျံၤလီၤဖုးအတၢ်မၤ, ဒီးတၢ်ကီတၢ်ခဲ တဖၣ်, ဒီးအဆၢဖိ ၉ ဒီး အဆၢဒိၣ် ၁၂:၁၃-၁၄ ပာ်ဖျါဝဲ တချုးမုၢ်တနံၤလၢပကဘၣ်စံးဆၢတၢ်လၢ ကစၢ်ယွၤအမဲာ်ညါ ပကဘၣ်မၤတၢ်သ့ၣ်တဖၣ်အံၤခဲလၢာ်န့ၣ်လီၤ.
နံၣ်ကိလၣ် အတံၤသကိးတဖၣ် ဒုးသ့ၣ်နီၣ်အီၤလၢ အတၢ်သူၣ်တီသးရၤ, ဒီးအတၢ်သူၣ်အိၣ် သးအိၣ်ဟ့ၣ်ညီတၢ် လၢအဝဲသ့ၣ်အဖီခိၣ်တဖၣ်န့ၣ် အုၣ်အသးလၢ နံၣ်ကိလၣ် အတၢ်အိၣ်မူန့ၣ် တမ့ၢ်အိၣ်မူလၢာ်ဂီၤကလီတၢ်ဘၣ်န့ၣ်လီၤ. ဘၣ်ဆၣ်, စံၣ်တဲၤ ၁၂:၁ န့ၣ် ပှၤစံၣ်တဲၤတဲလီၤတၢ်သရၣ် အတၢ်ဟ့ၣ်ကူၣ်ကမၤပူၤဖျဲး ပဝဲခဲလၢာ်လၢ အကတီၢ်လၢအနးကတၢၢ်ဒ်သိးအံၤ ဖဲပတၢ်အိၣ်မူအကတီၢ် လၢခံကတၢၢ်န့ၣ် မ့ၢ်ဒၣ်ပကဘၣ်သ့ၣ်နီၣ်ထီၣ် ပှၤလၢအတ့လီၤပှၤ, လူၤပိာ်အကျဲအကပိၤ, ဒီးဟံးဃာ်တၢ်ခွဲးတၢ်ယာ်ကိးမံၤ ဒ်သိးပကမူဒီးအဲၣ်တၢ် ဖဲမုၢ်တနံၤအံၤလၢ ယွၤဟ့ၣ်လီၤပှၤန့ၣ်လီၤ.
