၂၀၁၉ နံၣ် အတၢ်ဂီၤမူ လၢလီၤတိၢ်လီၤဆီ “ပိာ်မုၣ်ဖိ” (Little Women) ဒုးသ့ၣ်နီၣ်က့ၤယၤ တၢ်ကွဲး လီၢ်လံၤပူၤ, “မါမံၣ်” (Marmee) လၢအမ့ၢ် မိၢ်ကူၣ်သ့, အတၢ်ပာ်သးသညူးသပှၢ်, လီၤဆီဒၣ်တၢ် အတၢ်ကတိၤတဖၣ်လၢအမၤမုာ်ယသးန့ၣ်လီၤ. ယသးစဲဘူးလၢ တၢ်ကွဲးပူၤ ပာ်ဖျါထီၣ် မိၢ်တဂၤအံၤ အတၢ်စူၢ်တၢ်နာ်အဂၢၢ်အကျၢၤ လၢအမ့ၢ်တၢ်အဂံၢ်ခီၣ်ထံး ဘၣ်ထွဲဒီး တၢ်ဟ့ၣ်ဂံၢ်ဟ့ၣ်ဘါ, သဆၣ်ထီၣ် အဖိမုၣ်တဖၣ်အဃိန့ၣ်လီၤ. တၢ်ကတိၤတထံၣ်လၢ အထုးန့ၢ်ယသးမ့ၢ်ဝဲ, “ဘၣ်သ့ၣ်သ့ၣ်တၢ်ကီတၢ်ခဲ ဒီးတၢ်လ့ပစီတဖၣ်… ကအိၣ်အါမးဘၣ်ဆၣ်, နမ့ၢ်ဃုမၤလိကလၢၢ်ဘၣ် နပၢ်အိၣ်လၢမူခိၣ်အဂံၢ်အဘါ ဒီးအတၢ်အဲၣ်တၢ်သးကညီၤတၢ်န့ၣ်ဒီး, နမၤနၢၤအီၤသ့, ဒီးနမၤပျီကွံာ်သ့ခဲလၢာ်န့ၣ်လီၤ.”
မါမံၣ် အတၢ်ကတိၤဖျၢၣ်တဖၣ် ပာ်ဖျါကဒါက့ၤတၢ်မ့ၢ်တၢ်တီ, လၢလံာ်တၢ်ကတိၤဒိ ၁၈:၁၀ အပူၤ စံးဝဲ “ယွၤအမံၤမ့ၢ် တၢးထီခၢၣ်သနၢၢ်လီၤ. ပှၤတီပှၤလိၤန့ၣ် ဃ့ၢ်နုာ်ဆူအပူၤ, ဒီးအိၣ်ပူၤဖျဲးဝဲလီၤ”. လၢပျၢၤဝ့ၢ်တဖၣ်န့ၣ် တၢးထီတဖၣ် ဘၣ်တၢ်တ့ထီၣ်အီၤ ဒ်သိးအကမ့ၢ်တၢ်အိၣ်ဘံၣ်အိၣ်ဘၢအလီၢ် ဖဲလၢတၢ်လီၤဘၣ်ယိၣ်အကတီၢ်, ဘၣ်သ့ၣ်သ့ၣ်ကမ့ၢ်ဝဲဖဲ ဒုၣ်ဒါအတၢ်ဟဲမၤဒၢၣ်တၢ် အဆၢကတီၢ်န့ၣ်လီၤ. မၤသးဒ်န့ၣ်ဒီး, ခီဖျိတၢ်ဃ့ၢ်ဆူယွၤအအိၣ်န့ၣ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ကဒိးန့ၢ်တၢ်မုာ်တၢ်ပၢၤလၢ ကစၢ်လၢအကွၢ်ထွဲကဟုကယာ်ပှၤအအိၣ် သ့ဝဲလီၤန့ၣ် စံး ၄၆:၁ ပာ်ဖျါဝဲ “ယွၤမ့ၢ်ပတၢ်ပူၤဖျဲးဒီးပဂံၢ်ပဘါ” န့ၣ်လီၤ.
ကတိၤ ၁၈:၁၀ စံးဘၣ်ပှၤ တၢ်ဒီတဒၢအိၣ်ဟဲလၢ ယွၤ “အမံၤ” – အဲၣ်ဒိးစံးဝဲလၢ ကယဲၢ်ကစၢ်ယွၤ အတၢ်မ့ၢ်တၢ်ခဲလၢာ်န့ၣ်လီၤ. ၂ မိၤရှ့ ၃၄:၆ အပူၤန့ၣ် ယွၤကလုၢ်ကထါပာ်ဖျါထီၣ် ကစၢ်ယွၤ ဒ်အမ့ၢ် “ကစၢ်ယွၤလၢအသးအိၣ်တၢ် ဒီးသးကညီၤတၢ်, သးထီၣ်ကီ, ဒီးအဘျုးအဖှိၣ်ဒီး အမ့ၢ်အတီအိၣ်ဝဲ အါမး” တဂၤအသိးန့ၣ်လီၤ. ကစၢ်ယွၤအတၢ်ဒီတဒၢ, ဒီဒၣ်တၢ်န့ၣ် အိၣ်ဟဲလၢ အဂံၢ်ဆူၣ်အဘါဆူၣ်, ဃုာ်ဒီးအတၢ်သးကညီၤ ဒီးအတၢ်အဲၣ်, တၢ်လၢအဒုးကဲထီၣ်ကစၢ်ယွၤ လၢအသူၣ်အိၣ်သးအိၣ် ကတဲာ်ကတီၤန့ၢ်တၢ်ပူၤဖျဲးအလီၢ်ဆူ ပှၤလၢအဘၣ်နးဘၣ်ဖှီၣ်တဖၣ်အဂီၢ်န့ၣ်လီၤ. ပှၤဘၣ်ဂဲၤပျုၢ် ဂဲၤဆှးတဖၣ်ခဲလၢာ်အဂီၢ်, ပပၢ်အိၣ်လၢမူခိၣ်တဂၤအံၤ, လၢအဂံၢ်အဘါဆူၣ်, ဒီးလၢအတၢ်သးကညီၤအပူၤ ဟ့ၣ်လီၤဝဲတၢ်အိၣ်တဒၢအဂီၢ်, တၢ်လီၢ်တၢ်ကျဲတတီၤန့ၣ်လီၤ.
