တၢ်မၤလိအတၢ်ဂ့ၢ်မိၢ်ပှၢ် အခိၣ်တီမ့ၢ်ဝဲ လံာ် ၃ မိၤရှ့, ဒီးယကဘၣ်အၢၣ်လီၤယသးန့ၣ်အိၣ်ဝဲလီၤ. ယတဲ ပှၤမၤလိလံာ်စီဆှံ ကရူၢ်ဖိတဖၣ်လၢ “အါတက့ၢ်န့ၣ် ယလဲၤကပာ်ကွံာ် တၢ်ဖး လံာ် ၃ မိၤရှ့ အဂ့ၢ်အကျိၤတနီၤလီၤ. တၢ်ဆါအၢအဂ့ၢ်အကျိၤန့ၣ် ယတဖးအီၤလၢၤဘၣ်.”န့ၣ်လီၤ.

အကတီၢ်ဖဲန့ၣ် ယတံၤသကိး ဒ့း(ဖ) (Dave) ကတိၤထီၣ်တၢ်, ဒီးစံးဝဲဒၣ် “ယသ့ၣ်ညါပှၤအိၣ်ဝဲတဂၤ လၢအနာ် ကစၢ်ယ့ၣ်ရှူး ခီဖျိလၢလံာ်စီဆှံအဆၢအံၤအဃိန့ၣ်လီၤ.” ဒ့း(ဖ) တဲဖျါထီၣ်ဝဲ အတံၤသကိး ကသံၣ်သရၣ် လၢအယါဘျါ ပှၤဆါတဂၤအဂ့ၢ်, တဘျီမ့ၢ်တ့ၢ်ဝဲ ပှၤလၢအတနာ်ကစၢ်ယွၤန့ၣ်လီၤ. တချုးလၢအစူးကွံာ်ညိကွံာ်လံာ်စီဆှံ လၢာ်လၢာ်ဆ့ဆ့ ဒံးဘၣ်န့ၣ် ကသံၣ်သရၣ်အံၤ ပာ်လီၤအသးလၢ အနီၢ်ကစၢ်ဒၣ်ဝဲကြၢးဖးကွၢ်လံာ်စီဆှံန့ၣ်လီၤ. လံာ် ၃ မိၤရှ့အပူၤ လံာ်စီဆှံတတီၤ ဘၣ်ထွဲဒီးတၢ်ဆါအၢအဂ့ၢ်န့ၣ် ထုးန့ၢ်သူၣ်န့ၢ်သးအီၤန့ၣ်လီၤ. ၃ မိၤ ၁၃:၁-၄၆ အပူၤ  တၢ်ပူၤလီၢ်, တၢ်ဆါအၢ လၢအဘၣ်ကူဘၣ်ဂာ်သ့, ဒီးတသ့တဖၣ်အဂ့ၢ်အကျိၤန့ၣ် လၢတၢ်လီၤကမၢကမၣ်အပူၤ ဘၣ်တၢ်ပာ်ဖျါထီၣ်လီၤတံၢ်လီၤဆဲး, ဒီး ၃ မိၤရှ့ ၁၄:၈-၉ အပူၤန့ၣ် တၢ်ကဘၣ်ကူစါယါဘျါအီၤဒ်လဲၣ်န့ၣ်လီၤ. အဝဲသ့ၣ်ညါဘၣ်လၢ တၢ်ယါဘျါတၢ်ဆါအဂ့ၢ် အကျိၤတဖၣ်လၢ လံာ် ၃ မိၤရှ့ အပူၤန့ၣ် လဲၤတလၢကွံာ် ကသံၣ်ကသီ ဒီးတၢ်ယါဘျါတၢ်ဆါ အတၢ်သ့ၣ်ညါလၢ စိၤဆၢကတီၢ်ဖဲန့ၣ်အဂီၢ်န့ၣ်လီၤ. အဝဲဆိကမိၣ်ဝဲလၢ စီၤမိၤရှ့ ကသ့ၣ်ညါတၢ်ဂ့ၢ်တဖၣ်အံၤခဲလၢာ်အဂီၢ်န့ၣ် ကျဲတအိၣ်ဘၣ်. အဝဲဆိကမိၣ်နီၤဖးဝဲဒၣ်လၢ စီၤမိၤရှ့ ဒိးန့ၢ် တၢ်သ့ၣ်ညါတၢ်နၢ်ပၢၢ်တဖၣ်အံၤ အိၣ်ဟဲခီဖျိလၢယွၤနီၢ်နီၢ်န့ၣ်လီၤ. အကတၢၢ်န့ၣ် စူၢ်က့ၤနာ်က့ၤဝဲ ကစၢ်ယ့ၣ်ရှူးန့ၣ်လီၤ.

လံာ်စီဆှံအဆၢတနီၤန့ၣ် မ့ၢ်တထုးန့ၢ်သူၣ်န့ၢ်သးနၤဘၣ်ဒီး, ယၤစ့ၢ်ကီး လီၤကၢၣ်ဘၣ်ယၤဒ်သိးဒီးနၤန့ၣ်လီၤ. ဘၣ်ဆၣ် ကယဲၢ်တၢ်ခဲလၢာ် လၢလံာ်စီဆှံစံးဘၣ်ပှၤန့ၣ် အိၣ်ဒီးအဂ့ၢ်အကျိၤဒၣ်ဝဲန့ၣ်လီၤ. လံာ် ၃ မိၤရှ့ ဘၣ်တၢ်ကွဲးအီၤ ဒ်သိးလၢ ပှၤအံၣ်စရ့လးဖိ ကသ့ၣ်ညါအိၣ်မူဃုာ်ဒီးယွၤ, ဒီးကအိၣ်မူလၢယွၤအဂီၢ်ဒ်လဲၣ်အဂ့ၢ်န့ၣ်လီၤ. ဒ်ပမၤလိအါထီၣ်ဘၣ် တၢ်ရ့လိာ်ဘၣ်ထွဲလိာ်သးလၢ ယွၤဒီးအပှၤဂီၢ်မုၢ်အဘၢၣ်စၢၤအံၤန့ၣ်, မ့ၢ်ဒၣ်ပမၤလိ ဃုသ့ၣ်ညါယွၤအနီၢ်ကစၢ်ဒၣ်ဝဲန့ၣ်လီၤ.

တၢ်မၢဖိစီၤပီလူး ကွဲးတ့ၢ်ဝဲလၢ လံာ် ၂ တံၤမသ့း ၃:၁၆ အပူၤ “ကယဲၢ်တၢ်ကွဲးအသးခဲလၢာ်န့ၣ်, ကွဲးအသးလၢ ယွၤအသးစီဆှံ, ဒီးဂ့ၤလၢ သိၣ်တၢ်သီတၢ်အဂီၢ်, လၢသိၣ်ဃီၣ်တၢ်အဂီၢ်, ဃၣ်လိၤတၢ်အဂီၢ်, လၢသိၣ်လိနဲၣ်လိတၢ် လၢတၢ်တီ တၢ်လိၤအပူၤအဂီၢ်” န့ၣ်လီၤ. မ်ပကဖးသကိးဆူညါကွ့ၢ်ကွ့ၢ်တက့ၢ်.