စဲ(လ) (Sal) အသးတၢ်ဆိကမိၣ်အပူၤန့ၣ် အိၣ်ပှဲၤလုၢ်ဘၢထဲ တၢ်သ့ၣ်နီၣ်ထီၣ်က့ၤတၢ်ဂ့ၢ်တၢ်ကျိၤအၢအၢသီသီတဖၣ်, ဒီးတၢ်ကစီၣ်လၢအဒုၣ်ဒွဲၣ်တၢ်တဖၣ်န့ၣ်လီၤ. မ့ၢ်လၢတၢ်ပျံၤတၢ်ဖုးအိၣ်ပှဲၤလၢအသးပူၤ, ဒီးကပၢၤကနိဘၣ်စီၣ်ဒီဂၤအဃိ တမံဘၣ်မုာ်မုာ်ခုၣ်ခုၣ်န့ၣ် ယံာ်တ့ၢ်မးလံန့ၣ်လီၤ. မုၢ်တနၤဖဲတချုးဒိးစူၢ်ဒိးဘျၢအသးထံအနံၤ, တၢ်ဆိကမိၣ်လၢအတဂ့ၤ တဖၣ် အတၢ်မၤတပျုာ်တပျီၤအီၤန့ၣ် အဝဲထုးထီၣ်ကွံာ်တန့ၢ်ဝဲဘၣ်. စဲ(လ) ဒိးန့ၢ်တၢ်အုၣ်က့ၤခီၣ်က့ၤ လၢကစၢ်ယ့ၣ်ရှူး ခရံာ်အပူၤ ဒီးသ့ၣ်ညါဝဲလၢ အတၢ်ကမၣ် ဘၣ်တၢ်ပျၢ်လံဘၣ်ဆၣ်, နီၣ်သးအတၢ်ဒုးတကပၤန့ၣ်တဝံၤဒံးဘၣ်. အကတီၢ် ဖဲန့ၣ် အမါဟံးဃာ်အစု ဒီးဘါထုကဖၣ်လၢအဂီၢ်န့ၣ်လီၤ. တၢ်ဆၢကတီၢ်တစိၢ်ဖိလဲၤပူၤကွံာ်ဝံၤန့ၣ်ဒီး, လၢတၢ်ပျံၤတၢ်ဖုး အလီၢ်န့ၣ် သးအတၢ်မုာ်တၢ်ဖိးအိၣ်ထီၣ်က့ၤလၢ စဲ(လ) အသးပူၤန့ၣ်လီၤ. တချုးလၢဒိးဘျၢအသးထံ လၢတၢ်အုၣ်အသး အကတီၢ်အဂီၢ် အဝဲဂဲၤဆၢထၢၣ်ကွဲးလီၤတၢ်ကတိၤတဖၣ်, တၢ်လၢအဝဲမၤတ့ၢ်ဝဲ တန့ၢ်ဘၣ်န့ၣ်လီၤ. တၢ်မၤအသးအံၤဝံၤ, အဝဲမံဘၣ်မုာ်မုာ်ခုၣ်ခုၣ်န့ၣ်လီၤ.
စီၤပၤဒၤဝံးစ့ၢ်ကီးသ့ၣ်ညါဝဲလၢ တၢ်တူၢ်ဘၣ်မုၢ်နၤလၢတၢ်အိၣ်ဘှံးတအိၣ်ဘၣ်အဂ့ၢ်န့ၣ်လီၤ. ၂ ရှမူၤ ၁၅-၁၇ ပာ်ဖျါဝဲ, ဖဲအဝဲဘၣ်ဃ့ၣ်ပူၤဖျဲးလၢအဖိခွါစီၤအးဘရှါလိၣ် လၢအအဲၣ်ဒိးဂုာ်ဟံးန့ၢ်အလီၢ်ပစိာ်အကတီၢ်န့ၣ်, စံး ၃:၆ အပူၤ စီၤဒၤဝံး ပာ်ဖျါဝဲလၢအသ့ၣ်ညါ “ပှၤအကလးသ့ၣ်တဖၣ်လၢ အပာ်အသးဝးတရံးထီဒါအီၤ” န့ၣ်လီၤ. အဆၢဖိ ၁ န့ၣ် ကအုကစွါ ဒီးစံးဝဲ, “ယွၤဧၢ, ပှၤလၢအမၤကိၢ်မၤဂီၤယၤအါထီၣ်ဆံးအါလဲၣ်. ပှၤဂဲၤဆၢထၢၣ်ထီဒါယၤအိၣ်အါဂၤလီၤ” န့ၣ်လီၤ. တၢ်ပျံၤ တၢ်ဖုးဒီးတၢ်သးဒ့ဒီ ကမၤနၢၤအီၤသ့ၣ်သ့ၣ်, ဘၣ်ဆၣ်, အဆၢဖိ ၃ အပူၤပကထံၣ်ဘၣ် စီၤဒၤဝံးကိးထီၣ်ကစၢ်ယွၤ, လၢအမ့ၢ် “ကတီၤလၢ အဝးတရံးအီၤတဘ့ၣ်” န့ၣ်လီၤ. လၢခံန့ၣ်, အဆၢဖိ ၅ စီၤဒၤဝံးစံးဝဲလၢ “ယမံလီၤ,ဒီးမံသပ့ၤသ့လီၤ…… အဂ့ၢ်ဒ်အံၤ,ယွၤမၤစၢၤယၤလီၤ” န့ၣ်လီၤ.
ဖဲတၢ်ပျံၤတၢ်ဖုးဒီးတၢ်ဂဲၤလိာ်သ့ၣ်တဖၣ် စှီၤတံၢ်ဃာ်ပသးအတၢ်ဆိကမိၣ်, ဒီးတၢ်အိၣ်ဘှံးအလီၢ်န့ၣ်အိၣ်ပှဲၤဒီးတၢ်ဟူး တၢ်ဂဲၤထီဘိအဆၢကတီၢ်, ဖဲပဃ့ထုကဖၣ်ကစၢ်ယွၤန့ၣ်ဒီး ပဃုထံၣ်န့ၢ်ဝဲတၢ်မုၢ်လၢ်န့ၣ်လီၤ. ဒ်စဲလ်ဒီးစီၤဒၤဝံးအသိး ပမ့ၢ် တလဲၤခီဖျိဘၣ် တၢ်မံမုာ်မုာ်ခုၣ်ခုၣ် တဘျီဃီဘၣ်ဆၣ်, စံး ၄:၈ ပာ်ဖျါဝဲလၢ “ယကမံလီၤဒီးမံသပ့ၤမုာ်မုာ်ခုၣ်ခုၣ်လီၤ. အဂ့ၢ်ဒ်အံၤ, ယွၤဧၢ, ပှၤလၢအဒုးပူၤဖျဲးယၤလၢတၢ်အၢတၢ်သီ” န့ၣ်လီၤ. မ့ၢ်လၢကစၢ်ယွၤအိၣ်ဒီးပှၤ, ဒီးကမ့ၢ်ဝဲပတၢ်အိၣ်ဘှံး အလီၢ်န့ၣ်လီၤ.
