ပှၤလိာ်ကွဲတၢ်ဝံၤဒီး, ခီလ့ၣ်ကၠိ ပှၤလိာ်ကွဲဖျၢၣ်သွ့ (Basketball) မံၤဟူသၣ်ဖျါတဂၤ အိၣ်တ့ၢ်မၤစၢၤဝဲ ပှၤမၤတၢ်ဖိတဖၣ်လၢ တၢ်ထၢက့ၤလီခီ, ဒီးကိၣ်ထၢၣ်အဖံးတၢ်ကမှံၤတဖၣ်အဂီၢ်န့ၣ်လီၤ. ပှၤလၢအဘၣ်သူၣ်ဘၣ်သးအီၤတဂၤ ဆှၢထီၣ်တၢ်ဂီၤမူ လၢအမၤတၢ်အံၤ, ဆူပှာ်ဘျးစဲပူၤ ဒီးပှၤကွၢ်တၢ်ဂီၤမူ အိၣ်ဃိးကလးဘျဲၣ်န့ၣ်လီၤ. ပှၤတဂၤ ကွဲးဟ့ၣ်ထီၣ်အတၢ်ထံၣ်လၢ, “ပှၤသးစၢ်တဂၤအံၤ ကမ့ၢ်ပှၤလၢအဆီၣ်လီၤအသးစဲၣ်နီၤတဂၤ လၢပကထံၣ်ဘၣ် လၢတၢ်အိၣ်မူအပူၤ န့ၣ်လီၤ.” အဝဲမ့ၢ်ဟးထီၣ်ဃုာ်ဒီး အတံၤသကိးပှၤလိာ်ကွဲတၢ်တဖၣ် လၢတၢ်မၤလၤကပီၤ တၢ်မၤနၢၤတၢ်လိာ်ကွဲန့ၣ်, ကမ့ၢ်တၢ်ညီကဒၣ်လၢအဂီၢ်ဘၣ်ဆၣ် လၢတၢ်အံၤအလီၢ်န့ၣ်, အိၣ်တ့ၢ်မၤစၢၤဝဲ မုာ်သးမၤကလီတၢ်မၤလၢ တလိၣ်တၢ်စံးဘျုးအီၤဘၣ်န့ၣ်လီၤ.

သးလၢအဆီၣ်လီၤသး အဒိၣ်ကတၢၢ်အံၤ ပကထံၣ်ဘၣ်လၢ ကစၢ်ယ့ၣ်ရှူးအပူၤ, ဒ် ဖံလံး ၂:၇ ပာ်ဖျါဝဲ ကစၢ်ယ့ၣ်ရှူး ပာ်တ့ၢ်ကွံာ်အလီၢ်အလၤအဒိၣ်အထီ လၢမူခိၣ်, ဒီးဟံးန့ၢ်ကုၢ်အလီၢ်လၢဟီၣ်ခိၣ်အံၤန့ၣ်လီၤ. တလိၣ်လၢကစၢ်ယ့ၣ်ရှူးမၤတၢ် ဒ်သိးအံၤဘၣ်ဆၣ်, လၢတၢ်သူၣ်အိၣ်သးအိၣ်အပူၤ အဝဲဆီၣ်လီၤအသးန့ၣ်လီၤ. အတၢ်ဖံးတၢ်မၤ လၢဟီၣ်ခိၣ်ချၢအံၤ ပာ်ဃုာ်ဒီး သိၣ်လိၤသီလိၤတၢ်, ကူစါယါဘျါတၢ်, ဒီးအဲၣ်ပှၤဟီၣ်ခိၣ်ဖိခဲလၢာ်- ဒီးဒ်သိးကအုၣ်က့ၤခီၣ်က့ၤအဝဲသ့ၣ်အဂီၢ် တူၢ်သံအသး, ဒီးဂဲၤဆၢထၢၣ်သမူထီၣ်က့ၤတၢ်တဖၣ်န့ၣ်လီၤ.

ကစၢ်ခရံာ် အတၢ်ဒိတၢ်တဲာ်န့ၣ် လၢတၢ်ခွဲသိၣ်ခွဲပျီတၢ်, လၢတၢ်ဟံးထီၣ်နီၣ်ဒိ ဒ်သိးကမၤစၢၤဒိတီၢ်တၢ်, မ့တမ့ၢ် ကတဲာ် ကတီၤတၢ်အီၣ်တၢ်အီ လၢလီခီပူၤတဖၣ်န့ၣ် ထိၣ်ဟူးထိၣ်ဂဲၤပှၤသ့ဝဲဘၣ်ဆၣ်, ပတၢ်ပာ်သူၣ်ပာ်သးလၢပှၤဂၤအဂီၢ် မ့မ့ၢ်ဝဲ ဒ်သိးအံၤန့ၣ်ဒီး ကမ့ၢ် တၢ်လၢအသဟီၣ်အဂံၢ်ဆူၣ်ကတၢၢ်န့ၣ်လီၤ. တၢ်ဆီၣ်လီၤသးအမ့ၢ်အတီ မ့ၢ်ဝဲနီၢ်သးအကံၢ်အစီ, ဒီးတမ့ၢ်ထဲလၢ ကဆီတလဲ ပဖံးတၢ်မၤတၢ်တဖၣ်န့ၣ်ဘၣ်. မ့မ့ၢ်ကဆီတလဲတၢ်လၢအကါဒိၣ်လၢပဂီၢ်တဖၣ်စ့ၢ်ကီးန့ၣ်လီၤ. ဖံလံး ၂:၃ ပာ်ဖျါဝဲ, တၢ်ဆီၣ်လီၤသးနီၢ်နီၢ် ဟ့ၣ်သဆၣ်ထီၣ်ပှၤလၢ “မ်ပှၤပာ်ပှၤဂၤဂ့ၤန့ၢ် အကစၢ်ဒၣ်ဝဲတက့ၢ်” န့ၣ်လီၤ.

ပှၤကွဲးလံာ်, ဒီးပှၤစံၣ်တဲၤတဲလီၤတၢ်သရၣ် အဲၣ်ဒရူ မၢရ့ၤ (Andrew Murray) စံးဝဲ, “တၢ်ဆီၣ်လီၤသးမ့ၢ် တၢ်စီတၢ်ဆှံ အဘိၣ်အဖီ, ဒီးအတၢ်ဃံတၢ်လၤ” န့ၣ်လီၤ. ဖံလံး ၂:၂-၅ စံးဘၣ်ပှၤလၢ, ဒ်ပလီၣ်ဖျါထီၣ် ကစၢ်ယ့ၣ်ရှူးခရံာ်အသးအသိးန့ၣ် မ်ပကအိၣ်မူလီၣ်ဖျါ တၢ်ဃံတၢ်လၤအံၤ ခီဖျိလၢသးစီဆှံအစိကမီၤန့ၣ်တက့ၢ်.