ယဖိမုၣ်အိၣ်ဆၢထၢၣ်လၢ ဖၣ်ကပူၤဒီးကိးသတြီထီၣ်ဝဲ “မိမိၢ်ဧၢ, သၣ်ဘုလါတဘ့ၣ် အိၣ်လၢ ကနဲစီအလီခီပူၤ” န့ၣ်လီၤ. ယစံးဆၢအီၤချ့ချ့ ဒ်ညီနုၢ်ပှၤစံးကတိၤတၢ် အိၣ်ဝဲအသိး လၢ, “နဖီၣ် သၣ်ဘုလါ လၢကနဲစီအလီခီပူၤန့ၣ် ကန့ၢ်အါန့ၢ်ဒံး နဖီၣ်လၢ တၢ်ဆံၣ်ထံအလီခီပူၤန့ၣ်လီၤ.” တၢ်အံၤမ့ၢ် တၢ်အဆိကတၢၢ်တဘျီ လၢတၢ်တဆိကမိၣ်အပူၤန့ၣ် ယဖီၣ်န့ၢ် သၣ်ဘုလါတဘ့ၣ် လၢကနဲစီ, ဒီးယထံၣ်လီၤက့ၤယသး လၢယပာ်ဖျါထီၣ်ဘၣ် တၢ်ကတိၤဒိတထံၣ်, လၢအဘၣ်တၢ်စူးကါအီၤ လၢစိၤခဲအံၤ- ခီဖျိအတၢ်ကူၣ်သ့လၢအမ့ၢ်, တၢ်ဃ့ကညးတၢ်မုာ်မုာ်ခုၣ်ခုၣ် မ့ၢ်တၢ်လၢအထုးန့ၢ် ပှၤဂၤအသး အါန့ၢ်ဒံး တၢ်ပာ်သူၣ်ပာ်သး လၢအခၣ်တမံၤန့ၣ်လီၤ.
လံာ်ကတိၤဒိဟ့ၣ်ပှၤ တၢ်ကွဲးပာ်ဖှိၣ် ပှၤကူၣ်သ့အတၢ်စံးကတိၤတဖၣ် အိၣ်ဟဲခီဖျိလၢ ကစၢ်ယွၤအသးစီဆှံန့ၣ်လီၤ. တၢ်တဖၣ်အံၤ မၤစၢၤပှၤ လၢတၢ်နဲၣ်ဆှၢပကျဲ, ဒီးသိၣ်လိသီလိ တၢ်မ့ၢ်တၢ်တီလၢအကါဒိၣ်တဖၣ်, တၢ်အိၣ်မူကျိၤကျဲလၢ အမၤလၤကပီၤကစၢ်ယွၤအဂီၢ်န့ၣ်လီၤ. တၢ်ကတိၤဒိအါထံၣ်အါဘီ အတၢ်ပညိၣ်အခိၣ်သံၣ်မ့ၢ်ဝဲ ပှၤကညီကဒဲကဒဲ အတၢ်ရ့လိာ် ဘၣ်ထွဲလိာ်သး ဃုာ်ဒီးပတၢ်ကတိၤတဖၣ် လၢအမၤဘၣ်ဒိဘၣ်ထံးပှၤဂုၤပှၤဂၤသ့ဝဲဒၣ်န့ၣ်လီၤ.
လံာ်တၢ်ကတိၤဒိတဖၣ် လၢအဘၣ်ထွဲဒီးစီၤပၤရှလိၤမိၤ, ဖျါဖဲ ကတိၤဒိ ၂၅:၁၈ အပူၤန့ၣ် စီၤရှလိၤမိၤ ဟ့ၣ်ပလီၢ်ဝဲ ခီဖျိလၢတၢ်ကတိၤကဘျံးကဘျၣ် ထီဒါပှၤလၢအဃၢၤန့ၣ် ဒုးကဲထီၣ် တၢ်ဘၣ်ဒိဘၣ်ထံး ဆူပှၤလၢအခိၣ်အဃၢၤအဂ့ၢ်န့ၣ်လီၤ. အဆၢဖိ ၂၃ န့ၣ် အဝဲဟ့ၣ်ကူၣ်ဝဲလၢ “ပျ့ၤလၢသီၣ်ဝံသဲကလၤ” န့ၣ်, ဟဲစိာ်တၢ်သးအုး လၢတၢ်ရ့လိာ်မုာ်လိာ်သးကဒဲကဒဲန့ၣ်လီၤ. အဆၢဖိ ၂၄ န့ၣ် စီၤရှလိၤမိၤဟ့ၣ်ပလီၢ်ဝဲလၢ တၢ်ကတိၤဂ့ၢ်လိာ်ဘှီလိာ်တၢ်တပယူာ်ဃီန့ၣ် ဒုးကဲထီၣ် တၢ်မၤပျံၤမၤဖုးတၢ်န့ၣ်လီၤ. ဒီးအဆၢဖိ ၂၅ န့ၣ် စီၤပၤဟ့ၣ်ဂံၢ်ဟ့ၣ်ဘါ ပှၤဖးလံာ်ဖိတဖၣ်လၢ ပတၢ်ကတိၤတဖၣ် မ့ၢ်ဟဲစိာ်တၢ်ကစီၣ်အဂ့ၤန့ၣ်ဒီး တၢ်ဆိၣ်ဂ့ၤကဟဲဝဲန့ၣ်လီၤ.
ဖဲပဃုထံၣ်, ဒီးအိၣ်မူမၤထွဲတၢ်မ့ၢ်တၢ်တီတဖၣ်အံၤန့ၣ်, ပအိၣ်ဒီးကစၢ်ယွၤအသးလၢ ကမၤစၢၤပှၤ, ဒ်ကတိၤဒိ ၁၆:၁ စံးဝဲအသိး ပကအိၣ်ဒီး “ပျ့ၤအတၢ်စံးဆၢဟဲလၢယွၤ” န့ၣ်လီၤ. ခီဖျိလၢကစၢ်ယွၤဟ့ၣ်ဆူၣ်ထီၣ်ပသးအဃိ, ပတၢ်စံးတၢ်ကတိၤတဖၣ်ကဆၢ, ဒီးမၤဖှံမၤသီထီၣ် ပသူၣ်ပသးသ့ဝဲဒၣ်န့ၣ်လီၤ.
