တံၤသကိးလၢယအဲၣ်ဘၣ်အီၤတဂၤ ပာ်ဒ့ၣ်ပာ်ကမၣ်ယၤ လၢတၢ်တမ့ၢ်တတီဘၣ်အဃိ, ဖဲယအိးထီၣ် ယထးခိၣ် ဒ်သိးကစံးဆၢက့ၤအဂီၢ်န့ၣ် ယကလၢၢ်ဘၣ်လၢ ယသးဖျၢၣ် စံၣ်ချ့ထီၣ်ဝဲဒၣ်န့ၣ်လီၤ. တၢ်လၢယပာ်ဖျါထီၣ်လၢ အီၣ်လဲ (online) န့ၣ် ဒ်အဆိကမိၣ်ဝဲအသိး တဘၣ်ထွဲဘၣ်ဃးဒီးအီၤ နီတမံၤဘၣ်. ဘၣ်ဆၣ်, တချုးယစံးဆၢက့ၤအီၤ လၢအတၢ်ပယံာ်ပယွဲယၤန့ၣ်, ယဃ့ထုကဖၣ်ကသွံဒံဖိ န့ၣ်လီၤ. အကတီၢ်ဖဲန့ၣ် ယသးဂၢၢ်ထီၣ်, ဒီးယနၢ်ဟူတၢ်လၢအစံးဘၣ်တဲဘၣ်ယၤ, ဒီးအတၢ်ကတိၤ တဖၣ်အလီၢ်ခံန့ၣ် အိၣ်ဒီးအတၢ်သးဘၣ်ဒိဘၣ်ထံးန့ၣ်လီၤ. တၢ်ဂ့ၢ်အံၤ ဒိၣ်န့ၢ်ယိာ်န့ၢ်ဒံး တၢ်လၢအဖျါ လၢမဲာ်ဖံးခိၣ်န့ၣ်လီၤ. ယတံၤသကိးအံၤ အသူၣ်ဘၣ်ဒိအသးဘၣ်ဒိ, ဒီးဖဲယဃုထၢ ဒ်သိးယကမၤစၢၤ တၢ်လၢတူၢ်ဘၣ်ခီၣ်ဘၣ်ဝဲန့ၣ်ဒီး တၢ်ဂ့ၢ်လၢယအဲၣ်ဒိးဒီတဒၢလီၤယသးန့ၣ် ဟါမၢ်ကွံာ်ဝဲဒၣ်န့ၣ်လီၤ.

ဖဲတၢ်ကတိၤလိာ်သကိးသးအကတီၢ်အံၤ, ယမၤလိန့ၢ် တၢ်လၢစီၤယၤကိာ် အဲၣ်ဒိးစံးဝဲတၢ်ဂ့ၢ် ဖဲလၢတနံၤအံၤ လံာ်စီဆှံအဆၢ ယၤကိာ် ၁:၁၉ အပူၤ, အဝဲဟ့ၣ်သဆၣ်ထီၣ်ပှၤအခံလၢ “နၢ်ဟူတၢ် ချ့သဒံး, ကတိၤတၢ်နီၢ်ကတုၤ, သးထီၣ်နီၢ်ကတုၤ” န့ၣ်လီၤ. တၢ်ဒိကနၣ်တၢ်န့ၣ် မၤစၢၤပှၤသ့ဝဲဒၣ် ဒ်သိးပကနၢ်ဟူ တၢ်အိၣ်အသးလၢ တၢ်ကတိၤအဖျၢၣ်တဖၣ်အလီၢ်ခံ, ဒီးလၢတၢ်ကဟးဆှဲး တၢ်သူၣ်ဒိၣ်သးဖျိးအဂီၢ်အဃိ အဆၢဖိ ၂၀ ပာ်ဖျါဝဲ “လၢအတမၤဘၣ် ယွၤအတၢ်တီတၢ်လိၤ န့ၣ်ဘၣ်” လီၤ. တၢ်ဒိကနၣ်ပျဲပကနၢ်ဟူ တၢ်အိၣ်အသးလၢပှၤကတိၤတၢ်တဂၤအံၤအသးကံၢ်ပူၤ န့ၣ်လီၤ. ယအိၣ်ပတုာ်တစိၤဖိ ဒီးဃ့ထုကဖၣ်တၢ်န့ၣ် ယထံၣ်လၢ အမၤစၢၤယၤ, ဒီးယသကိး လၢပတၢ်ဘၣ်ထွဲလိာ်သး ဒိၣ်ဒိၣ်မုၢ်မုၢ်န့ၣ်လီၤ. ယတၢ်ပာ်သးလၢ ယကဒီဒၣ်လီၤက့ၤယသးဒၣ်ယဲ အလီၢ်န့ၣ် ယသးစဲ အါထီၣ်ဒိၣ်ထီၣ်ဝဲလၢ အတၢ်ကတိၤအဖျၢၣ်တဖၣ်န့ၣ်လီၤ. ယမ့ၢ်တဆိကတီၢ် ဒီးဃ့ထုကဖၣ်ဘၣ်တၢ်န့ၣ်, ဘၣ်သ့ၣ်သ့ၣ်, ယကတဲဆၢဘၣ်အီၤ ယတၢ်ဆိကမိၣ်တဖၣ် လၢယသးဘၣ်တူၢ်ဘၣ်ခီၣ်ဘၣ်ဒ်လဲၣ်အဂ့ၢ်န့ၣ်လီၤ.

ယတအိၣ်မူပိာ်ထွဲ လံာ်ယၤကိာ် အတၢ်နဲၣ်လိယၤထီဘိဘၣ်ဆၣ်, ဖဲလၢနံၤအဝဲန့ၣ်, ယဆိကမိၣ်လၢ ယလူၤပိာ်ထွဲဝဲဒၣ်န့ၣ်လီၤ. တချုးယပျဲ တၢ်သးထီၣ် ဒီးတၢ်စံးဆၢမၤဆၢပှၤဂၤ လၢတၢ်ကဒီဒၣ်လီၤက့ၤပသးအဂီၢ်အဆၢကတီၢ်, တၢ်အိၣ်ဃိကလာ်တစိၢ်ဖိ လၢတၢ်ဃ့ထုကဖၣ် ကသွံဒံဖိန့ၣ်, မ့ၢ်ဝဲနီၣ်ဝံာ်ခံ လၢတၢ်ကဒိနၣ်တၢ်ချ့သဒံး, ဒီးလၢတၢ်ကတိၤတၢ် ကယီကယီဖိအဂီၢ် န့ၣ်လီၤ. ယဃ့ထုကဖၣ်လၢ, ကစၢ်ယွၤကဟ့ၣ်လီၤလၢ်ဘၣ်ယၤတၢ်ကူၣ်သ့ လၢယကမၤအါထီၣ် တၢ်ဒ်သိးအံၤ တလီၢ်လီၢ်အဂီၢ်န့ၣ်လီၤ (ကတိၤ ၁၉:၁၁).