ခၠါလံၣ် ဒီး ကၠဲ(န) အတၢ်ဖျီ ပှဲၤထီၣ် နံၣ် ၅၀ အနံၤန့ၣ်, အဝဲသ့ၣ် လဲၤအီၣ်သကိးဂီၤတၢ်အီၣ်ဒီးအဖိခွါ ကၠီ(န) လၢကျးတဖျၢၣ်န့ၣ်လီၤ. ဖဲမုၢ်နံၤအံၤန့ၣ်, တၢ်အီၣ်ကျးအပှၤမၤတၢ်ဖိစှၤဝဲဒိၣ်မး, ပှၤအိၣ်ထဲ တၢ်မၤမူဒါခိၣ်တဂၤ, ပှၤဖီအီၣ်တ့ၤအီၣ်တၢ် ဒီးမုၣ်လိၤဘိသးစၢ် လၢအမၤတၢ် ဒ်ပှၤတူၢ်လိာ်တမှံၤ, ပှၤပာ်လီၤတၢ်အီၣ်, ဒီးပှၤမၤကဆှဲကဆှီစီၢ်နီၤခိၣ်တဂၤအသိးန့ၣ်လီၤ. ဖဲအဝဲသ့ၣ်အီၣ်ဂီၤတၢ်အီၣ်ဝံၤ, ခၠါလံၣ် ကွၢ် အမါဒီးအဖိခွါ ဒီးတဲအဝဲသ့ၣ်လၢ, “မ့ၢ်သုအိၣ်ဒီး တၢ်မၤအကါဒိၣ်တမံၤမံၤလၢ သုကဘၣ်မၤအီၤဒံးဧါ.” ဒီးအဝဲသ့ၣ်စံးဆၢက့ၤလၢ “တအိၣ်ဘၣ်” န့ၣ်လီၤ.
ဖဲခၠါလံၣ် ဒီး ကၠဲန် ဒိးန့ၢ်တၢ်ပျဲလၢ တၢ်မၤမူဒါခိၣ်န့ၣ်ဒီး, စးထီၣ်သ့စီလီခီတဖၣ် လၢကျးအလီၢ်ခံ, ဒီးတကတီၢ်ဃီန့ၣ် ကၠီ(န) စးထီၣ်မၤကဆှီ စီၢ်နီၤခိၣ်တဖၣ်န့ၣ်လီၤ. ကၠိန် ပာ်ဖျါဝဲဒၣ်လၢ, တၢ်မၤအသး ဖဲလၢမုၢ်နံၤအဝဲန့ၣ် တမ့ၢ်တၢ်လၢ အလီၤတိၢ်လီၤဆီလၢအဂီၢ်ဘၣ်န့ၣ်လီၤ. ထီဘိန့ၣ် အမိၢ်အပၢ် အိၣ်မူအိၣ်ဂဲၤဒ် ကစၢ်ယ့ၣ်ရှူး အတၢ်ဒိတၢ်တဲာ်အသိး, ဖျါလၢ မၢ်ကူး ၁၀:၄၅ အပူၤ “ပှၤကညီဖိခွါအံၤ, တဟဲဘၣ်ဝဲဒ်သိး ပှၤကမၤအီၤလၢ အခ့အပှၤ အတၢ်ဘၣ်. မ့ၢ်ဒ်သိး အကမၤ အခ့အပှၤအတၢ်မၤ…လီၤ” န့ၣ်လီၤ.
လံာ်ယိၤဟၣ် ၁၃ အပူၤ, ပကဖးဘၣ် ကစၢ်ခရံာ် အီၣ်သကိးဟါတၢ်အီၣ်ဒီးအပျဲၢ်အဘီၣ်တဖၣ် လၢခံကတၢၢ်တဘျီအဂ့ၢ်န့ၣ်လီၤ. ဖဲဟါတၢ်အီၣ် အနၤအံၤန့ၣ်, အဆၢဖိ ၁၄-၁၅ အပူၤပာ်ဖျါဝဲလၢ ကစၢ်ခရံာ် သိၣ်လိအပျဲၢ်အဘီၣ်တဖၣ်လၢ တၢ်သိၣ်တၢ်သီမိၢ်ပှၢ် ဘၣ်ထွဲဒီး တၢ်ခ့တၢ်ပှၤအတၢ်မၤလၢ တၢ်ဆီၣ်လီၤသးအပူၤ ခီဖျိသ့စီကွံာ် အပျဲၢ်အဘီၣ်တဖၣ်အခီၣ်အဂ့ၢ်န့ၣ်လီၤ. ကစၢ်ယ့ၣ်ရှူး မ့ၢ်သးအိၣ်မၤ တၢ်မၤလၢအပတီၢ်အဖုၣ်ကတၢၢ်တမံၤ, လၢအမ့ၢ်တၢ်သ့စီ ပှၤတဆံခံဂၤအခီၣ်န့ၣ်ဒီး, အဝဲသ့ၣ်စ့ၢ်ကီး ကြၢးမၤ တၢ်ခ့တၢ်ပှၤအတၢ်မၤ ဆူပှၤဂုၤပှၤဂၤတဖၣ်အဂီၢ် လၢတၢ်သးခုအပူၤန့ၣ်လီၤ.
ကယဲၢ်တၢ်မၤ တၢ်ခ့တၢ်ပှၤအတၢ်မၤ ကျိၤကျဲကိးမံၤန့ၣ် ကဖျါလီၤဆီလိာ်သးဘၣ်ဆၣ်, တၢ်လၢအဒ်သိးလိာ်သးအိၣ်ဝဲတမံၤ, ဒီးမ့ၢ်ဝဲ တၢ်ခ့တၢ်ပှၤ အတၢ်မၤန့ၣ် အိၣ်ဒီးတၢ်သးခုဖးဒိၣ်န့ၣ်လီၤ. တၢ်မၤတၢ်ခ့တၢ်ပှၤအတၢ်မၤ အတၢ်ပညိၣ်န့ၣ် တမ့ၢ်တၢ်ကဟဲစိာ်တၢ်စံးထီၣ်ပတြၢၤဆူ ပှၤလၢအမၤတၢ် တဖၣ်အဂီၢ်ဘၣ်. တၢ်မၤတၢ်ခ့တၢ်ပှၤအတၢ်မၤ လၢတၢ်အဲၣ်တၢ်ကွံအပူၤ ဆူပှၤဂုၤပှၤဂၤအဂီၢ်, တကတီၢ်ဃီန့ၣ် ပကဒုးနဲၣ်ဖျါထီၣ် တၢ်စံးထီၣ်ပတြၢၤ ကိးမံၤဆူ ပကစၢ်လၢအဆီၣ်လီၤသး, လၢအလုၢ်ထီၣ်အသးသမူတဂၤအအိၣ်န့ၣ်လီၤ.
