“ယအဲၣ်နၤဒ်လဲၣ်. ပျဲယဂံၢ်ဒွးကျဲ ပျိၤပျဲလၢယအဲၣ်နၤတဖၣ်တက့ၢ်” တၢ်ကတိၤတဖၣ်အံၤ အိၣ်ဟဲလၢ အဲလံစဘဲး ဘါရဲး ဘရီန့ၣ် (Elizabeth Barrett Browning) အတၢ်ကွဲး, ပီၤတူၤကံၤစ် အထါအိၣ်ဝဲ ၁၄ ကျိၤ ‘Sonnets from the Portuguese’, မ့ၢ်လံာ်တဘ့ၣ်လၢ အလံာ်မံၤဟူသၣ်ဖျါ ဘၣ်တၢ်ကွဲးအီၤလၢ အဲးကလံးအကျိာ်န့ၣ်လီၤ. တချုးလၢအဝဲသ့ၣ်ဒိးတ့ဒိးဖျီအသးန့ၣ်, ကွဲးဝဲဆူ အတၢ်အဲၣ်တီ ရီဘၢး ဘရီန့ၣ် အအိၣ် ဒီးအဝဲဘၣ်သူၣ်ဘၣ်သးဒိၣ်မးအဃိ ဟ့ၣ်ဂံၢ်ဟ့ၣ်ဘါအီၤ ဒ်သိး ကစဲးကျံးထုးထီၣ် အတၢ်ကွဲးထါပာ်ဖှိၣ်န့ၣ်လီၤ. ဘၣ်ဆၣ် မ့ၢ်လၢ တၢ်စူးကါကျိာ်တၢ်ကတိၤ တဖၣ် မုာ်, ကပုာ်လုာ်ဒိၣ်မးဒီး, ခီဖျိလၢအဲၣ်ဒိးပာ်ဝဲ ဒ်နီၢ်ကစၢ်အတၢ်ခူသူၣ်အသိးအဃိ ဘါရဲး စဲးကျံးထုးထီၣ် ဒ်သိး တၢ်ကွဲးကျိာ်ထံက့ၤအီၤလၢ ပီၣ်တူၢ်ကံၢ် ပှၤကွဲးတၢ်တဂၤအအိၣ်အသိးန့ၣ်လီၤ.

ဘၣ်တဘျီဘျီ ဖဲပဒုးနဲၣ်ဖျါထီၣ် ပတၢ်အဲၣ်ဆူ ပှၤအဂၤတဖၣ်အလိၤန့ၣ် ကဲထီၣ်တၢ်ဂ့ၢ်ကီ လၢပဂီၢ်န့ၣ်လီၤ. ဘၣ်ဆၣ် တၢ်လၢအတဒ်သိးလိာ်အသးတမံၤမ့ၢ်ဝဲ ဖဲလံာ်စီဆှံပာ်ဖျါထီၣ် ကစၢ်ယွၤ အတၢ်အဲၣ်အဂ့ၢ်န့ၣ် တပာ်လီၤတဲာ်တ့ၢ်တၢ်နီၤတမံၤဘၣ်. ပကထံၣ်ဘၣ် ဝံယံးရမံယၤ ဂံၢ်ကဒါက့ၤ ယွၤအတၢ်သူၣ်အိၣ်သးအိၣ် အပှၤဂီၢ်မုၢ်တဖၣ်လၢ တၢ်ကတိၤအမုာ်ဖိတဖၣ် ဖျါလၢ ယံး ၃၁:၃ အပူၤ “ယအဲၣ်တ့ၢ်နၤလၢ တၢ်အဲၣ်အထူအယိာ်လီၤ. မၤသးဒ်န့ၣ်ဒီး ယမိၤလံနၤလၢ တၢ်ဘျုးတၢ်ဖှိၣ်လံ” န့ၣ်လီၤ. အပှၤဂီၢ်မုၢ်တဖၣ် မ့ၢ်လဲၤကပာ်အီၤဘၣ်ဆၣ် ကစၢ်ယွၤအၢၣ်လီၤအီလီၤဝဲလၢ ကပာ်က့ၤအပှၤ ဂီၢ်မုၢ် ဒ်အလီၢ်လီၢ်ဒၣ်ဝဲ, ဒီးကမိၤက့ၤအဝဲသ့ၣ်ဆူ အနီၢ်ကစၢ်ဒၣ်ဝဲအအိၣ်န့ၣ်လီၤ. အဆၢဖိ ၂ အပူၤ ကစၢ်ယွၤစံးဘၣ်အပှၤဂီၢ်မုၢ်လၢ “ယလဲၤဒုးအိၣ်ဘှံးအီၤလီၤ” န့ၣ်လီၤ.

ကစၢ်ယ့ၣ်ရှူးမ့ၢ် ကစၢ်ယွၤအတၢ်အဲၣ်, လၢကမၤဂ့ၤမၤသီက့ၤပှၤအလၢအပှဲၤ, ဒီးကယဲၢ်ပှၤ ဟဲက့ၤကဒါဆူအအိၣ်န့ၣ် ကစၢ်ယွၤကဟ့ၣ်လီၤ သးအတၢ်ဃူတၢ်ဖိး, ဃုာ်ဒီးတၢ်အိၣ်ဘှံးန့ၣ်လီၤ. စးထီၣ်လၢကျီၣ်အီၣ်ဆၣ်အလီၢ်, ဒီးဆူထူၣ်စုညါအလိၤ, ဆူတၢ်သွၣ်ခိၣ်လၢအအိၣ်လီၤဟိ, ကစၢ် ယ့ၣ်ရှူးမ့ၢ် ပှၤလၢအလီၣ်ဖျါထီၣ် ကစၢ်ယွၤအနီၢ်ကစၢ်, ဒီးတၢ်ဘၣ်ယွၤအသး, ဒ်သိးကကိးက့ၤ ဟီၣ်ခိၣ်လၢအဟးဖျိးကျဲအံၤ ဆူအအိၣ်န့ၣ်လီၤ. ဖးလံာ်စီဆှံစးထီၣ်လၢအခီၣ်ထံး တုၤအကတၢၢ်န့ၣ် နက “ဂံၢ်ထီၣ်ဒွးထီၣ်ဘၣ်ကျိၤကျဲတဖၣ်” လၢအဘၣ်ထွဲဒီးယွၤအတၢ်အဲၣ်, တဘျီဘၣ်တဘျီ, ဘၣ်ဆၣ် ကစၢ်ယွၤအတၢ်အဲၣ်မ့ၢ် တၢ်လီၤထူလီၤယိာ်အဃိ နဂံၢ်ထီၣ်ဒွးထီၣ်တလၢာ်နီတဘျီဘၣ် န့ၣ်လီၤ.