ဖဲ နံးခိလးစ် (Nicholas) နီၣ်သိလ့ၣ် လၢတၢ်ခံးယိာ်မးအကတီၢ်, ထံၣ်ဝဲမ့ၣ်အူအီၣ်ဟံၣ်တဖျၢၣ် န့ၣ်လီၤ. အဝဲပာ်ကတီၢ်အသိလ့ၣ်လၢ ကျဲဖးဒ့, ဃ့ၢ်နုာ်လီၤဆူဟံၣ်လၢမ့ၣ်အူအီၣ်တဖျၢၣ်အံၤအပူၤ, ဒီးဂုာ်မၤပူၤဖျဲးဝဲ ဖိသၣ်လွံၢ်ဂၤန့ၣ်လီၤ. ပိာ်မုၣ်ဖိသၣ် လၢကွၢ်ထွဲဖိသၣ်တဖၣ်န့ၣ် သ့ၣ်နီၣ်ထီၣ်ဝဲ, လၢဟံၣ်ပူၤဖိသၣ်အိၣ်တ့ၢ်ဒံးတဂၤအဃိ ဒုးသ့ၣ်ညါဝဲ နံးခိလးစ် န့ၣ်လီၤ. ဒ်သိးကလဲၤမၤပူၤဖျဲး ဖိသၣ်အဂီၢ် အဝဲက့ၤနုာ်ဝဲဆူဟံၣ်ပူၤသတူၢ်ကလာ်ဝံၤန့ၣ်ဒီး အဝဲဒီးဖိသၣ်ခံဂၤန့ၣ် မ့ၣ်အူကဝီၤဃာ်ဖဲ တၢးခံကထၢတကထၢန့ၣ်လီၤ. အဝဲမၤသ့ၣ်ဖး ပဲတြီဖိ ဒီးလၢအစုပူၤစိာ်ဖိသၣ်တခီခီ စံၣ်လီၤဖုလီၤဆူ တၢ်ဖီလာ်, ဒီးတကတီၢ်ဃီန့ၣ် ပှၤမၤစၢၤတၢ်ဖိတဖၣ် ဟဲတုၤဝဲန့ၣ်လီၤ. ဃုထၢဝဲတၢ်သူၣ်အိၣ်သးအိၣ် ပှၤဂၤအဂီၢ် အါန့ၢ်အကစၢ်ဒၣ်ဝဲအဂီၢ်အဃိ, အဝဲမၤပူၤဖျဲးဖိသၣ်တဖၣ်န့ၣ်လီၤ.
နံခိလးစ် ဒုးနဲၣ်ဖျါထီၣ် ပှၤဒူပှၤဃိၤအတၢ်ပာ်သူၣ်ပာ်သး, လၢအသးအိၣ်ဟ့ၣ်လီၤ အတၢ်ဘံၣ် တၢ်ဘၢလၢ ပှၤဂၤတဖၣ်ကပူၤဖျဲးအဂီၢ်န့ၣ်လီၤ. တၢ်အဲၣ်အတၢ်မၤ လၢအပှဲၤဒီးအစိကမီၤအံၤ ဒုးနဲၣ်ဖျါထီၣ် တၢ်အဲၣ်လၢအလုၢ်ထီၣ်အသးသမူ, ဘၣ်တၢ်ပာ်ဖျါလၢပှၤသူၣ်အိၣ်သးအိၣ် အုၣ်က့ၤ ခီၣ်က့ၤတၢ်တဂၤ, လၢအဟ့ၣ်လီၤကွံာ်အသးသမူ, ဒ်သိးကမၤပူၤမၤဖျဲးပှၤ လၢတၢ်ဒဲးဘးဒီးတၢ်သံ, လၢအမ့ၢ်ကစၢ်ယ့ၣ်ရှူးန့ၣ်လီၤ. ရိမ့ၤ ၅:၆ ပာ်ဖျါဝဲ “ဖဲပဂံၢ်စၢ်ဘါစၢ်န့ၣ် အမုၢ်အလါဘၣ်ဒီး ခရံာ်ဒိးသံ အသးလၢ ပှၤတယူးတယီၣ်ဘၣ်ယွၤအဂီၢ်လီၤ ” န့ၣ်လီၤ. စီၤပီလူးပာ်ဝဲတၢ်ဂ့ၢ်အကါဒိၣ်တမံၤ ဒ်အမ့ၢ် ကစၢ်ယ့ၣ်ရှူးမ့ၢ်ယွၤနီၢ်နီၢ်ဒီးပှၤကညီနီၢ်နီၢ်တဂၤအံၤ, ဃုထၢဝဲလၢ ကဟ့ၣ်လီၤကွံာ်အသးသမူ ဒ်သိး ကဟ့ၣ်တၢ်အပှ့ၤလၢ ပတၢ်ဒဲးဘးအဂီၢ်, တၢ်အပှ့ၤလၢ ပဟ့ၣ်ပကစၢ်ဒၣ်ဝဲတန့ၢ်တသ့နီတဘျီဘၣ် န့ၣ်လီၤ. လၢတၢ်န့ၣ်အဃိ, အဆၢဖိ ၈ အပူၤစံးဘၣ်ပှၤ “ဖဲပမ့ၢ် ပှၤတၢ်ဒဲးဘးဖိအဖၢမုၢ်ဒီး ခရံာ် ဒိးသံအသးလၢပဂီၢ်သတးဒီး, ယွၤပာ်ဖျါထီၣ် အတၢ်အဲၣ်တၢ်ကွံဒၣ်ဝဲလၢပှၤလီၤ” န့ၣ်လီၤ.
ဒ်ပစံးဘျုးအီၤဒီးနာ်န့ၢ်ကစၢ်ယ့ၣ်ရှူးအသိး, ပတၢ်အုၣ်က့ၤခီၣ်က့ၤကစၢ် လၢအသူၣ်အိၣ် သးအိၣ်ပှၤတဂၤအံၤ, ကဟ့ၣ်ပှၤတၢ်စိကမီၤ ဒ်သိး ပကအဲၣ်ပှၤဂၤတဖၣ်လၢတၢ်လုၢ်ထီၣ်ပသးသမူ ခီဖျိပတၢ်ကတိၤတဖၣ်, ဒီးပတၢ်မၤတဖၣ်န့ၣ်လီၤ.
