လီတၢ်ကစီၣ်ပရၢဃုာ်ဒီးတၢ်ဂီၤတဖၣ် ဘၣ်တၢ်ဆှၢလီၤလၢတံၤသကိးတဂၤန့ၣ် မ့ၢ်တၢ်ကမၢကမၣ် ဖးဒိၣ်လၢပဂီၢ်န့ၣ်လီၤ. တၢ်ဂီၤတဖၣ် ဒ်အမ့ၢ်တၢ်ဟ့ၣ်သတူၢ်ကလာ် လၢတၢ်မၤကမၢကမၣ် အမါအသး အဂီၢ်အကျါ တၢ်ဂီၤတဘ့ၣ်န့ၣ် ပာ်ဖျါထီၣ် တၢ်မၤသီထီၣ်က့ၤ ၁၉၆၅ နံၣ် သိလ့ၣ် ဖီး(ဒ) မး(စ) တဲ (Ford Mustang) တဆိ – ဖျါကပီၤကျံာ်ကျုာ်, အလွဲၢ်မ့ၢ် အလါအဲးပှၢ်, အကနူၤတဖၣ် အိၣ်ဒီး အလွဲၢ်ဘီကပြ့ၢ်, သိလ့ၣ်အကိပူၤန့ၣ် ဘၣ်တၢ်တ့အီၤ ဒီးတၢ်ဖံးကပုာ်ကလုာ်အသူ, ဒီးဒ်သိးကမ့ၢ် သိလ့ၣ်လၢ လူၤထီၣ်ဆၢကတီၢ်ချုးအဂီၢ် ပှၤတ့တ့ၢ်နုာ်မီထၢၣ်တဖျၢၣ်န့ၣ်လီၤ. သိလ့ၣ်တခိၣ်ဃီအံၤ အတၢ်ဂီၤလီၤလံၤတဘ့ၣ်စ့ၢ်ကီးအိၣ်ဝဲ, ဒီးပာ်ဖျါဝဲသိလ့ၣ်အံၤလၢတချုးတၢ်တ့မၤသီထီၣ်က့ၤအပတီၢ်, လီၢ်လံၤဖီဃာ်, အလွဲၢ်ဘီလၢဖျါတဃံတလၤတခိၣ်န့ၣ်လီၤ. ပမ့ၢ်ကွၢ်ဆိကမိၣ်န့ၣ်ဒီး ကကဲထီၣ်တၢ်ကီ တၢ်ခဲဖးဒိၣ်လၢ, ဖဲသိလ့ၣ်အံၤ ဘၣ်တ့ထုးထီၣ်သီန့ၣ် ကဖျါဃံဖျါလၤဝဲသ့ၣ်သ့ၣ်န့ၣ်လီၤ. ဘၣ်ဆၣ် လၢတၢ်ဆၢကတီၢ်ဖးယံာ်အတီၢ်ပူၤ, ကဟးဂီၤ, ဒီးကဘၣ်ဒိဘၣ်ထံး, ဒီးလၢတၢ်ဂ့ၢ်အဂၤတဖၣ်အဃိ, ဘၣ်ဆၢဘၣ်ကတီၢ်လၢ တၢ်ကမၤသီထီၣ်က့ၤအီၤန့ၣ်လီၤ.
စံးထီၣ်ပတြၢၤ ၈၀ အပူၤန့ၣ် ယွၤအပှၤဂီၢ်မုၢ် အတၢ်အိၣ်သးမၤအသးတဖၣ် ဒ်သိးအံၤအဃိ အကတီၢ်ဘၣ်လၢ တၢ်ကမၤဂ့ၤထီၣ်က့ၤတၢ်န့ၣ်လီၤ. လၢတၢ်န့ၣ်အဃိ, အဆၢဖိ ၃, ၇, ၁၉ အပူၤ ပကထံၣ် တၢ်ထုကဖၣ်တဘျီဘၣ်တဘျီ လၢအမ့ၢ် “ယွၤဧၢ ဒုးဟဲက့ၤပှၤဒီး ဒုးကပီၤထီၣ်နမဲာ်တက့ၢ်. ဒီးပကတုၤလၢ တၢ်အုၣ်က့ၤခီၣ်က့ၤပှၤလီၤ” န့ၣ်လီၤ. အဆၢဖိ ၈-၁၁ ပာ်ဖျါဝဲ လၢအတၢ်စံၣ်စိၤတဲစိၤပူၤ အိၣ်ဒီး တၢ်အုၣ်က့ၤခီၣ်က့ၤ လၢအဲၤကူပတူးအဂ့ၢ်, ဒီးဘၣ်တၢ်ဒုးအိၣ်ဂၢၢ်ဆိးကျၢၤ ဖဲတၢ်လီၢ်လၢ ဟ့ၣ်ထီၣ်တၢ်အါ, ဟဲစိာ်နုာ်တၢ်အကတီၢ်လၢအဂ့ၤအဝါတဖၣ်, ဒီးတၢ်အဂ့ၤအဝါတဖၣ်အံၤ လဲၤပူၤကွံာ်ဝဲန့ၣ်လီၤ. မ့ၢ်လၢပှၤဂီၢ်မုၢ်တဖၣ်ပူထီၣ်ယွၤအဃိ အဆၢဖိ ၁၂-၁၃ စံးဘၣ်ပှၤလၢ အပှၤဂီၢ်မုၢ် တူၢ်ဘၣ်ခီၣ်ဘၣ် တၢ်စံၣ်ညီၣ်လၢယွၤအစုပူၤန့ၣ်လီၤ. လၢတၢ်န့ၣ်အဃိ, အဆၢဖိ ၁၄ အပူၤ ပှၤဂီၢ်မုၢ်တဖၣ်ဃ့ကညးဝဲ “တၢ်သုးမုၢ်အကစၢ်ဧၢ, ဟဲက့ၤလၢ်တက့ၢ်. ကွၢ်လီၤလၢမူခိၣ်, ဒီးကွၢ်ထံကွၢ်ဆး” ဒ်သိးအံၤန့ၣ်လီၤ.
မ့ၢ်နသးဃၢ, မ့ၢ်နအိၣ်ယံၤ, မ့တမ့ၢ် နတၢ်ဘၣ်ထွဲလိာ်သးဒီးယွၤမ့ၢ်အိၣ်ပတုာ်အသး တဘျီဘျီဧါ. နီၢ်သးအတၢ်သူၣ်မံသးမုာ် ဃုာ်ဒီးတၢ်သးခု မ့ၢ်လီၤမၢ်လၢနဂီၢ်ဧါ. မ့ၢ်လၢနကျဲနကပိၤဒီးကစၢ်ယ့ၣ်ရှူး, ဒီးအဝဲအတၢ်တိာ်ပာ်လၢနဂီၢ် တမ့ၢ်တၢ်တမံၤဃီဧါ. အဆၢဖိ ၁ စံးဘၣ်ပှၤလၢ ယွၤနၢ်ဟူပတၢ်ထုကဖၣ် လၢကမၤဂ့ၤမၤသီထီၣ်က့ၤပှၤအဂီၢ်န့ၣ်လီၤ.
