ယဝၤဆူးဆါတဘျုးသီ ဒီးအလိၤကိၢ်ဖးဒိၣ်အဃိ, ဖျါလၢ အလိၣ်ဘၣ် ဂ့ၢ်ဂီၤအူတၢ်ကဟုကယာ်အီၤန့ၣ်လီၤ. တၢ်ဆါဟံၣ် တူၢ်လိာ်အီၤတဘျီဃီ လၢကထီၣ်ကူစါယါဘျါအသးအဂီၢ်န့ၣ်လီၤ. မုၢ်နံၤ လဲၤပူၤကွံာ်တသီဝံၤ အတၢ်ကိၢ်လီၤဘၣ်ဆၣ် ကဘၣ်စံၣ်လီၤတၢ်ဆါဟံၣ်အဂီၢ်တသ့ဒံးဘၣ်န့ၣ်လီၤ. ယဘၣ်ကွၢ်ဆၢၣ်မဲာ်ဒီးတၢ်ဃုထၢအကီခံမံၤ- မ့ၢ်ယကဘၣ်အိၣ်ဒီးယဝၤ ဖဲတၢ်ဆါဟံၣ်ဧါ မ့တမ့ၢ်ဘၣ်ဒီး မ့ၢ်ပကဘၣ်လဲၤမၤ တၢ်ဖံးတၢ်မၤတဖၣ်လၢအကါဒိၣ်, ဃုာ်ဒီးတၢ်မၤသကိးတၢ်ဒီးပှၤအါဂၤဧါန့ၣ်လီၤ. ယဝၤမၤဂၢၢ်မၤကျၢၤယၤ ဒ်သိးယသုတကိၢ်တဂီၤလၢအဂီၢ် ဘၣ်ဆၣ် လၢယဝၤဒီးယတၢ်မၤအဘၢၣ်စၢၤ ယသးထုးဃၢယၤခံကပၤန့ၣ်လီၤ.
ယွၤအပှၤဂီၢ်မုၢ်တဖၣ်လိၣ်ဘၣ် ကစၢ်ယွၤတၢ်မၤစၢၤ ဖဲအတုၤကျဲဂာ်တဲာ် လၢကဘၣ်မၤသးသမူ အတၢ်ဆၢတဲာ်တဖၣ်န့ၣ်လီၤ. တလီၢ်လီၢ်န့ၣ် အဝဲသ့ၣ်ကအိၣ်မူပိာ်ထွဲ ကစၢ်ယွၤအတၢ်နဲၣ်ကျဲအဂီၢ် ယံၤဝဲကီဝဲဒိၣ်မးအဃိ, ၅ မိၤ ၃၀:၁၉ အပူၤန့ၣ် စီၤမိၤရှ့ ဃ့ကညးပှၤဂီၢ်မုၢ် ဒ်သိး က “ဃုထၢတၢ်မူ” ခီဖျိ အိၣ်မူပိာ်ထွဲယွၤအတၢ်သိၣ်တၢ်သီန့ၣ်လီၤ. လၢခံန့ၣ် ဝံယံးရမံယၤ စံးကတိၤလီၤ ဒ်တၢ်ဟံးစုနဲၣ်ကျဲ အတၢ်ကတိၤတဖၣ် ဆူယွၤအပှၤဂီၢ်မုၢ် လၢအလဲၤကပာ် ကစၢ်ယွၤအတၢ်မၤလိာ်တဖၣ် ဒီးကွဲန့ၢ် အဝဲသ့ၣ်လၢ ကပိာ်ယွၤအကျဲတဖၣ်- ဒီးစံးဝဲ “ဆၢထၢၣ်လၢကျဲပူၤ ဒီးကွၢ်တၢ်, ဒီးသံကွၢ် တၢ်လၢကျဲလီၢ်လံၤတဖၣ်အဂ့ၢ်, ကျဲအဂ့ၤန့ၣ် မ့ၢ်အအိၣ်ဖဲလဲၣ်န့ၣ်တက့ၢ်. ဒီးပိာ်ကျဲန့ၣ်တက့ၢ်. ယွၤအကလုၢ်ကထါအကျဲ လၢပျၢၤဒီး ယွၤအတၢ်ဟ့ၣ်ပှၤတၢ်တဖၣ် နဲၣ်ပကျဲသ့လီၤ” န့ၣ်လီၤ.
ယထံၣ်မှံလီၤက့ၤယသး ဒ်ယအိၣ်လၢကျဲဂာ်တဲာ်နီၢ်နီၢ်အသိး, ဒီးယအိၣ်မူအိၣ်ဂဲၤ ဒ်ယံးရမံယၤ အတၢ်ကူၣ်သ့ ဟ့ၣ်ကူၣ်နဲၣ်ကျဲအသိးန့ၣ်လီၤ. ယဝၤလိၣ်ယၤဘၣ်အသိး ယတၢ်ဖံးတၢ်မၤစ့ၢ်ကီး လိၣ်ဘၣ်ယၤန့ၣ်လီၤ. အဆၢကတီၢ်ဖဲန့ၣ် ပှၤကွၢ်ထွဲယတၢ်မၤအခိၣ်တဂၤ ကိးယၤ, ဒီးဟ့ၣ်ဂံၢ်ဟ့ၣ်ဘါယၤ ဒ်သိးယကအိၣ်လၢဟံၣ်န့ၣ်လီၤ. ဖဲယအိၣ်လၢကျဲဂာ်တဲာ်အကတီၢ်, မ့ၢ်လၢကတဲာ်ကတီၤန့ၢ်ယၤအဃိ ယသါထုးထီၣ်ကလံၤ ဒီးစံးဘျုးယွၤလၢယသးပူၤန့ၣ်လီၤ. ထီဘိန့ၣ် ယွၤအတၢ်နဲၣ်ကျဲတဟဲ ဖျိဖျိဖျါဖျါ ဘၣ်ဆၣ် ကဟဲဝဲသပှၢ်တၢၢ်န့ၣ်လီၤ. ဖဲပအိၣ်ဆၢထၢၣ်လၢကျဲဂာ်တဲာ်အကတီၢ်, ပကကွၢ်စိအီၤအဂီၢ် မ်ပကမၤလီၤတံၢ်က့ၤပသးန့ၣ်တက့ၢ်.
