ဖဲနံၣ်ထီၣ်သီ ၂,၀၀၀ နံၣ် န့ၣ် ပဒိၣ်ပၦၢ်ခိၣ်နၢ်လၢ ဝ့ၢ်ဒံးထရွဲး(Detroit)တဖၣ် အိးထီၣ်တလါလၢ အသးအနံၣ်အလါအိၣ်လံ တကယၤတဖျၢၣ် လၢတၢ်ပလီၢ်သးအပူၤန့ၣ်လီၤ. လၢတိၢ်ဂီၤတလါအပူၤန့ၣ် အိၣ်ဒီးတၢ်အီၣ်ကုးအီၦဲၤအဂီၢ် တၢ်ထံၣ်လၢညါခီ လၢဝ့ၢ်ခိၣ်နၢ်တနီၤ မုၢ်လၢ်စံးကတိၤ ပာ်ဖျါဆိတဖၣ်န့ၣ်လီၤ. ဘၣ်ဆၣ် ဝ့ၢ်ခိၣ်အတၢ်ကစီၣ်န့ၣ် ဟ့ၣ်ထီၣ်ဝဲလၢကျဲလီၤဆီတဘိန့ၣ်လီၤ. အဝဲကွဲးပာ်ဖျါ, “မ်ပကဘၣ်တၢ်ပျဲၦၤလၢ ပကပာ်ဖျါတၢ်မုၢ်လၢ်တမံၤ ဂ့ၤန့ၢ်တၢ်ဂၤခဲလၢၥ် … လၢအမ့ၢ် ပှၤခဲလၢာ်သ့ၣ်ညါနၢ်ပၢၢ် ထံကီၢ်တဘ့ၣ်, ၦၤကညီတဂၤ, ဒီးဝ့ၢ်တဝ့ၢ်, မ့ၢ်ဒိၣ်ထီၣ်လၢ တၢ်တီတၢ်လိၤအပူၤန့ၣ်ဒီး, တၢ်တီတၢ်လိၤအံၤ မ့ၢ်တၢ်တမံၤလၢအစိၥ်ထီၣ်ထီ ထံကီၢ်, ဒီးၦၤကလုၥ်န့ၣ်လီၤ.”

အါန့ၢ်တၢ်မၤန့ၢ်မၤနၢၤ, တၢ်သူၣ်ခုသးခု, မ့တမ့ၢ် တၢ်မုာ်တၢ်ပၢၤန့ၣ်, ဝ့ၢ်ခိၣ်ဆၢမုၢ်လၢ်ဝဲလၢ ခါဆူညါၦၤဝ့ၢ်ဖိတဖၣ် ကဒိၣ်ထီၣ်လၢ တၢ်တီတၢ်လိၤ, ဒီးတၢ်သူၣ်ဘျၢသးဘျၢနီၢ်နီၢ်အပူၤန့ၣ်လီၤ. ဘၣ်သ့ၣ်သ့ၣ် အဝဲကဟံးန့ၢ် ကစၢ်ယ့ၣ်ၡူးအတၢ်သိၣ်လိနဲၣ်လိတၢ် ဖျါဖဲ မးသဲ ၅:၆ အပူၤ, “ပှၤလၢတၢ်သၣ်ဝံၤအသးဒီး တၢ်သူအသးလၢတၢ်တီတၢ်လိၤတဖၣ်န့ၣ် ဘၣ်ဆိၣ်ဂ့ၤဝဲလီၤ” န့ၣ်လီၤ. ဘၣ်ဆၣ် ဖဲပဆိကမိၣ်ကစၢ်ယွၤအနီၣ်ထိၣ် အတၢ်လၢတၢ်ၦဲၤအဂ့ၢ်န့ၣ်ဒီး တၢ်သးဟးဂီၤ ကဟဲအိၣ်ထီၣ် ညီဝဲဒၣ်လၢပဂီၢ်န့ၣ်လီၤ.

ဒ်သိးပကဒိၣ်ထီၣ်ထီထီၣ်အဂီၢ် တလိၣ်လၢပကဘၣ်သန့ၤလီၤပသး လၢပနီၢ်ကစၢ် အတၢ်ဂုာ်ကျဲးစၢးအဃိ, ပကဘၣ်စံးထီၣ်ပတြၢၤယွၤန့ၣ်လီၤ. ဧ့ၤဘြံၤ ၁၃:၂၀-၂၁ အပူၤ ၦၤကွဲး လံၥ်ဧ့ၤဘြံၤစံးဝဲဒ်အံၤ, “ဒီးတၢ်ဃူတၢ်ဖိးအကစၢ် …မ်အမၤလၢထီၣ်ၦဲၤထီၣ်သုလၢ တၢ်မၤဂ့ၤကိးအမံၤဒဲး ဒ်သိးသုကမၤဖဲဒၣ်အသးဒီး, မ်အမၤတၢ်လၢပပူၤဖဲအဘၣ်အသး လၢယ့ၣ်ၡူးခရံၥ်န့ၣ်တက့ၢ်” န့ၣ်လီၤ. အဆၢဖိ ၁၂ ပာ်ဖျါဝဲလၢ ဖဲပစူၢ်က့ၤနၥ်က့ၤယ့ၣ်ၡူးခရံၥ်တကီၢ်ခါန့ၣ်, ပဝဲ ၦၤအိၣ်ဆိးလၢခရံၥ်အပူၤတဖၣ် ပဘၣ်တၢ်မၤစီဆှံၦၤလၢယ့ၣ်ၡူးအသွံၣ်န့ၣ်လီၤ, ဘၣ်ဆၣ် ခရံၥ်သူၣ်လီၤန့ၢ် တၢ်တီတၢ်လိၤအတၤသၣ် လၢပသးပူၤ လၢပတၢ်အိၣ်မူဒီစိၤအဂီၢ်န့ၣ်လီၤ. လၢပသးသမူအတၢ်လဲၤကျဲန့ၣ် ပခီၣ်ကဘၣ်တိၢ်တလီၢ်လီၢ်, ဘၣ်ဆၣ် အဆၢဖိ ၁၄ ပာ်ဖျါဝဲလၢ ပကမုၢ်လၢ်ကွၢ်စိတၢ်ဆူ “ပခူပဝ့ၢ်လၢ အကအိၣ်ဆူညါ,” ဖဲလၢကစၢ်ယွၤအတၢ်တီတၢ်လိၤ ကပၢတၢ်အလီၢ်န့ၣ်လီၤ.