ၦၤဆှၢလံၥ်ဖိတဂၤ, ညီနုာ်အလဲၤဆှၢဝဲဒၢးတဖျၢၣ်န့ၣ် ထံၣ်န့ၢ်ဘၣ်လံၥ်ပရၢတဖၣ် အိၣ်ထီၣ်ပူၣ်အသး အဃိဒီး, ပၥ်သူၣ်ပၥ်သးဝဲ, ဒီးသ့ၣ်ညါဝဲလၢ သးၦၢ်မုၣ်အိၣ်ဆိးထဲတဂၤန့ၣ် ညီနုၢ်ဟဲဟံးန့ၢ် အလံာ်ပရၢကိးနံၤဒဲးန့ၣ်လီၤ. ၦၤမၤတၢ်ဖိအံၤ ဃုထၢမၤဝဲတၢ်မၤ လၢအပှဲၤဒီးတၢ်ကူၣ်သ့, ဒ်အမ့ၢ် ဒုးသ့ၣ်ညါအတၢ်ဘၣ်ယိၣ်လၢပိၥ်မုၣ်သးၦၢ်အံၤအဂီၢ် ဆူဟံၣ်ကပိၤကပၤ ၦၤတဂၤအအိၣ် န့ၣ်လီၤ. ၦၤတဂၤအံၤ ဒုးသ့ၣ်ညါကဒီး ၦၤအိၣ်ဆိးလၢတၢ်အဃၢၤအဂၤတဂၤ, လၢအဟံးပာ်ဝဲ နီၣ်ဝံၥ်ခံ လၢပိၥ်မုၣ်သးၦၢ်အဟံၣ်အဂီၢ်န့ၣ်လီၤ. အဝဲသ့ၣ် နုၥ်လီၤသကိးဆူ အတံၤသကိး သးပှၢ်မုၣ်အဟံၣ်ပူၤ ဒီးထံၣ်ဝဲသးၦၢ်မုၣ်န့ၣ် အိၣ်မံလီၤအသး လၢဟံၣ်အဒါလိၤန့ၣ်လီၤ. အပူၤကွံၥ်လွံၢ်သီန့ၣ် သးၦၢ်မုၣ်အံၤလီၤဃံၤဝဲ, ဒီးအကစၢ်ဒၣ်ဝဲ ဝံၢ်ဆၢထၢၣ်အသး မ့ၢ်ဂ့ၤ ကိးတၢ်မၤစၢၤအဂီၢ်မ့ၢ်ဂ့ၤ မၤဝဲတန့ၢ်ဘၣ်. လံၥ်ပရၢအတၢး ၦၤဆှၢလံာ်ဖိ အတၢ်ကူၣ်သ့, တၢ်သူၣ်အိၣ်သးအိၣ်, ဒီးအတၢ်ဆၢတဲၥ်ဒီး အတၢ်မၤတဖၣ်န့ၣ် အုၣ်က့ၤခီၣ်က့ၤ ပိၥ်မုၣ်သးၦၢ် အသးသမူန့ၣ်လီၤ.
လံၥ်တၢ်ကတိၤဒိ ၁၁:၃၀ န့ၣ်ပာ်ဖျါဝဲ “ၦၤလၢအကူၣ်တၢ်သ့န့ၣ် မၤန့ၢ်ၦၤအသးတဖၣ်လီၤ.” တၢ်သ့ပဲၥ်ဖးမၤတၢ်လၢတၢ်ကူၣ်သ့န့ၣ် အိၣ်ဟဲလၢ တၢ်မၤတၢ်လၢအဘၣ်, ဒီးအိၣ်မူအိၣ်ဂဲၤ ဒ်ယွၤအတၢ်ကူၣ်သ့န့ၣ် တမ့ၢ်တၢ်ဒုးအိၣ်ထီၣ်အဘျုးအဖှိၣ် ထဲလၢပကစၢ်ဒၣ်ဝဲအဂီၢ်ဘၣ်, မ့မ့ၢ် ၦၤလၢအထံၣ်လိၥ်သးဒီးၦၤတဖၣ်စ့ၢ်ကီး ဘၣ်ဘျုးဘၣ်ဖှိၣ်သ့ဝဲဒၣ်န့ၣ်လီၤ. တၢ်အိၣ်မူပာ်ဖျါထီၣ် ယွၤအလၤကပီၤ, ဒီးယွၤအကျဲဧိၤကပိၤဧိၤတဖၣ် အတၤသၣ်န့ၣ် ဒုးအိၣ်ထီၣ်တၢ်အိၣ်မူလၢအဂ့ၤ, ဒီးတၢ်အိၣ်မူလၢအမၤကဆှီ,မၤသီထီၣ်တၢ်တမံၤန့ၣ်လီၤ. ဒီးပတၤသၣ်စ့ၢ်ကီး ထိၣ်ဟူးထိၣ်ဂဲၤၦၤ လၢတၢ်ကဟုကယၥ်ၦၤဂၤ, ဒီးပကပာ်သူၣ်ပာ်သးမၤတၢ်လၢ အဝဲသ့ၣ်အတၢ်ဂ့ၤအဂီၢ်န့ၣ်လီၤ.
လၢလံၥ်တၢ်ကတိၤဒိဒီတဘ့ၣ်အပူၤ, ဒ်ၦၤကွဲးလံၥ်စံးကတိၤပာ်ဖျါဝဲ လီၤတံၢ်လီၤဆဲးအသိး, တၢ်ကူၣ်သ့န့ၣ် ဘၣ်တၢ်ဃုထံၣ်န့ၢ်အီၤ ခီဖျိလၢတၢ်သန့ၤသးလၢယွၤန့ၣ်လီၤ. ကတိၤ ၈:၁၁ အပူၤ ပာ်ဖျါဝဲ တၢ်ကူၣ်သ့န့ၣ် ဘၣ်တၢ်ပၥ်အီၤ ဒ်တၢ်လၢအ “ဂ့ၤန့ၢ်တၢ်မျၢ်ပလဲ, ဒီးကယဲၢ်တၢ်လုၢ်ဒိၣ် ပှ့ၤဒိၣ်ခဲလၢၥ်န့ၣ် တၢ်တထိၣ်သတြီၤ ဘၣ်ဒီးအီၤဘၣ်” န့ၣ်လီၤ. တၢ်ကူၣ်သ့လၢ ကစၢ်ယွၤ ဟ့ၣ်လီၤန့ၣ် ကနဲၣ်ဆှၢၦၤလၢပတၢ်အိၣ်မူအပူၤန့ၣ်လီၤ. လၢတၢ်လီၤထူလီၤယိၥ်အဂီၢ် ကအုၣ်က့ၤခီၣ်က့ၤသးသမူ တဖျၢၣ်သ့ၣ်သ့ၣ်န့ၣ်လီၤ.
