ခရံၥ်အိၣ်ဖျဲၣ်နံၤ အတၢ်သးခုလဲၤပူၤကွံၥ်ဝံၤ, လၢခံတနံၤန့ၣ် တၢ်မၤအသးဒ်တၢ်လီၤသးဟးဂီၤ တမံၤန့ၣ်လီၤ. ဒီတနၤကျၢၤပအိၣ်သကိးဒီးတံၤသကိးတဖၣ်အဃိ ပမံတန့ၢ်ဂ့ၤဂ့ၤဘၣ်. ဝံၤန့ၣ်ဒီး ပဟဲက့ၤဆူဟံၣ်, ဒီးပသိလ့ၣ်ဟးဂီၤဝဲ. တဝံၤဒံးဘၣ် ဘှ့ၣ်ပစီၤစးထီၣ်လီၤဝဲအဃိ, ပဘၣ်ပၥ်တ့ၢ် သိလ့ၣ်, ဒီးပဘၣ်ဟဲက့ၤဆူဟံၣ် လၢ ထဲးကစံၣ် (taxi) လၢဘှ့ၣ်ကျါသူၣ်ကျါန့ၣ်လီၤ. လၢာ်ဂံၢ် လၢာ်ဘါ, လီၤဘှံးလီၤတီၤဒိၣ်မးန့ၣ်လီၤ.
ခရံၥ်အိၣ်ဖျဲၣ်အနံၤဝံၤန့ၣ် တမ့ၢ်ထဲ ပလီၤဘှံးလီၤဘှါ, လီၤသးဟးဂီၤ န့ၣ်ဘၣ်. ပအီၣ်ဘၣ် တၢ်အီၣ်အါအါဂီၢ်ဂီၢ် မ့ၢ်ဂ့ၤ, ခရံၥ်အိၣ်ဖျဲၣ်တၢ်ဆၢဂ့ၤဆၢဝါအတၢ်သးဝံၣ် လၢကွဲၤလ့လိၤတဖၣ် ပတနၢ်ဟူလၢၤဘၣ်မ့ၢ်ဂ့ၤ, ပပှ့ၤတၢ်အဲၣ်အတၢ်ဟ့ၣ်ဖိ လၢအပူၤကွံၥ်အနွံန့ၣ် ခဲအံၤအပှ့ၤ အိၣ်တ့ၢ်ဒၣ်တဝၥ်မ့ၢ်ဂ့ၤ, ခရံၥ်အိၣ်ဖျဲၣ်မုၢ်နံၤ အတၢ်သးခုတဖၣ် လီၤမၢ်ဒံကွံၥ်ဝဲချ့သဒံးန့ၣ်လီၤ.
ကစၢ်ယၣ်ၡူးအိၣ်ဖျဲၣ်အနံၤဝံၤ မုၢ်နံၤလၢအဟဲတနံၤအဂ့ၢ်န့ၣ် လံၥ်စီဆှံတပာ်ဖျါထီၣ် နီတဘျီဘၣ်. ဘၣ်ဆၣ် လူၤ ၂:၄-၁၈ အတၢ်ပာ်ဖျါ, တၢ်လဲၤဆူဝ့ၢ်ဘ့ၤသလ့ဃ့ၣ်န့ၣ် ဘၣ်လဲၤဝဲ လၢခီၣ်, ဘၣ်လူၤဃုတၢ်အိၣ်ဆိးလီၢ်ကီကီခဲခဲ, ဖဲနီၢ်မၤရံဆံးစၢ်အဖိဒီးတူၢ်ဘၣ်ခီၣ်ဘၣ်တၢ်, ဒီးလၢတၢ်တဆိကမိၣ်အပူၤ ၦၤကွၢ်သိတဖၣ်ဟဲတုၤဝဲသတူာ်ကလာ်, ခီဖျိလၢတၢ်ဂ့ၢ်တဖၣ်အံၤ အဃိ, နီၢ်မၤရံဒီးစီၤယိၤသး ကလီၤဘှံးလီၤဘှါလီၤန့ၣ် ပဆိကမိၣ်ကွၢ်သ့ဝဲဒၣ်န့ၣ်လီၤ. ဘၣ်ဆၣ် ဖဲနီၢ်မၤရံစိၥ်ဃၥ်ဖိဆံးလၢအစုတီၤလိၤန့ၣ်ဒီး, ယဆိကမိၣ် အဝဲကသ့ၣ်နီၣ်ထီၣ်က့ၤ မူခိၣ်ကလူး တဖၣ် အတၢ်ဟဲအိၣ်သကိး (၁:၃၀-၃၃), နီၢ်အံၤစ့ဘ့ၤလးအတၢ်ဆိၣ်ဂ့ၤ (:၄၂-၄၅), အနီၢ်ကစၢ် သ့ၣ်ညါဝဲ ဘၣ်ဃးဒီးအဖိဆံးဖိအတၢ်ဟဲဝံတဖၣ် (:၄၆-၅၅) န့ၣ်လီၤ. လူၤ၂:၁၉ န့ၣ် ပာ်ဖျါဝဲ နီၢ်မၤရံ ဆိကမိၣ်ထံတၢ်ဂ့ၢ်တဖၣ်လၢအသးပူၤဒီး, ကကဲထီၣ်တၢ်မၤဖှံထီၣ် အတၢ်လီၤဘှံး, ဒီးတၢ်ဘၣ်ဒိဆါလၢနီၢ်ခိတကပၤ ဖဲကစၢ်ယ့ၣ်ရှူးအိၣ်ဖျဲၣ်ဝံၤ မုၢ်နံၤတဖၣ်အပူၤန့ၣ်လီၤ.
ဘၣ်သ့ၣ်သ့ၣ်ခရံာ်အိၣ်ဖျဲၣ်နံၤဝံၤ လၢခံတနံၤဒၣ်လဲၥ်အသိးပဝဲကိးဂၤပအိၣ်ဒီး “မုၢ်နံၤလၢ အဘျုးတအိၣ်,အခီပညီတအိၣ်” တဖၣ်, န့ၣ်လီၤ. ဒ်နီၢ်မၤရံအသိး မ်ပကလဲၤခီဖျိမုၢ်နံၤတဖၣ်န့ၣ် ခီဖျိတၢ်ဆိကမိၣ်ထံ ကစၢ်တဂၤဟဲဒွဲၣ်ကပီၤထီၣ်ဟီၣ်ခိၣ်လီၤထူလီၤယိာ်, ဟီၣ်ခိၣ်လၢပအိၣ်ဆိး တၢ်အလီၢ်အံၤ, လၢအတၢ်ဟဲလီၤအိၣ်ဒီးၦၤအဂ့ၢ်န့ၣ်တက့ၢ်.
