ဖဲအိၣ်ဘှံးနံၤတၢ်ဘါဝံၤ တၢ်ကမၤပံၥ်မ့ၣ်အူတၢ်ကပီၤတဖၣ်, ဒီးတၢ်ကကးတံၥ်က့ၤသရိၥ်အပဲတြီ တဖၣ်အဂီၢ်န့ၣ် မူဒါအိၣ်လၢမတၤအလိၤလဲၣ်န့ၣ် ယတသ့ၣ်ညါလီၤတံၢ်ဘၣ်. ဘၣ်ဆၣ်တၢ်လၢ ယသ့ၣ်ညါ ဘၣ်ဃးဒီးၦၤတဂၤအံၤ, လၢအဂီၢ်န့ၣ် အိၣ်ဘှံးနံၤဟါတၢ်အီၣ်ကစဲၤခံဝဲဒၣ်န့ၣ်လီၤ. ဘၣ်မနုၤအဃိလဲၣ်န့ၣ် ဖဲတၢ်ဘါဝံၤအကတီၢ် ၦၤအါဒံအါဂၤသးအိၣ် ကတိၤသကိးလိာ်သးလၢ တၢ်အိၣ်မူအတၢ်ဆၢတဲၥ်အဂ့ၢ်, တၢ်အဲၣ်အဂ့ၢ်အကျိၤတဖၣ်, ဒီးတၢ်ဂုာ်ကျဲးစၢၤ ဂဲၤလိာ်တၢ်တဖၣ်, ဒီးတၢ်ဂ့ၢ်အဂုၤအဂၤအါမးတဖၣ်အဃိန့ၣ်လီၤ. တၢ်ဘါဝံၤ မံးနံးခံဆံအတီၢ်ပူၤ ပထံၣ်ဘၣ်လၢ တၢ်ကွၢ်တရံးကွၢ်တရး သရိၥ်အခိၣ်အဃၢၤ ဒီးၦၤအါဂၤပၥ်ဖှိၣ်ကတိၤသကိးလိၥ်သးန့ၣ် မ့ၢ်တၢ်လၢ အလီၤသးဖှံ, အလီၤသးမုၥ်ဒိၣ်မးန့ၣ်လီၤ.

တၢ်ရ့လိၥ်မုၥ်လိၥ်န့ၣ် မ့ၢ်တၢ်အကါဒိၣ်တမံၤ, လၢအလီၤဂာ်ဒီးကစၢ်ခရံၥ်အတၢ်အိၣ်မူ န့ၣ်လီၤ. ပမ့ၢ်တအိၣ်ဒီး တၢ်ဘျးစဲအိၣ်ဟဲထီၣ်လၢ ၦၤစူၢ်က့ၤနၥ်က့ၤတၢ်ဖိကဒဲကဒဲ အတၢ်ရ့လိာ် ဘၣ်ထွဲလိာ်သးအပူၤဘၣ်န့ၣ်ဒီး, တၢ်လၢပမ့ၢ်ၦၤစူၢ်က့ၤနၥ်က့ၤတၢ်ဖိတဖၣ် ပတၢ်ကဲဘျုးအါမံၤန့ၣ် ကလဲၤပူၤကွံာ်ပှၤန့ၣ်လီၤ.
အဒိဖဲ ၁ သ့း ၅:၁၁ အပူၤန့ၣ် စီၤပီလူးစံးဝဲႇ “ပမၤထီၣ်လိၥ်ပသးႇ ပမၤထီၣ်မၤထီလိၥ်သး သကိးသကိး” သ့ဝဲန့ၣ်လီၤ. ၦၤကွဲးလံၥ်ဧ့ၤဘြံၤစ့ၢ်ကီး တူၢ်လိာ်ဝဲတၢ်ဂ့ၢ်အံၤအဃိ, ဧ့ၤဘြံၤ ၁၀:၂၅ အပူၤစံးဘၣ်ၦၤ “ပကဟ့ၣ်သဆၣ်ထီၣ်လိာ်ပခံ” အဂီၢ်, မ်ပသုတဟးဆှဲး ပတၢ်အိၣ်ဖှိၣ်ရိဖှိၣ် ဒ်ပှၤတနီၤနီၤ အလုၢ်အလၢ်အသိးန့ၣ်တဂ့ၤလီၤ. အဆၢဖိ ၂၄ အပူၤပာ်ဖျါစ့ၢ်ကီးဝဲ, ဖဲပအိၣ်တပူၤဃီ အကတီၢ်န့ၣ် “မ်ပကွၢ်လိၥ်ပသးတဂၤဒီးတဂၤ, ဒ်သိးပကသဆၣ်ထီၣ်လိၥ်ပခံဆူတၢ်အဲၣ်တၢ်ကွံ, ဒီးတၢ်မၤဂ့ၤတၢ်” အဂီၢ်န့ၣ်လီၤ.

ပပာ်လီၤပသးလၢ ပကအိၣ်မူအိၣ်ဂဲၤလၢကစၢ်ယ့ၣ်ၡူးအဂီၢ်အဃိ, ဒ် ၁သ့း ၅:၁၄ ပာ်ဖျါဝဲ အသိး လၢ “တၢ်မၤမုာ်ထီၣ်ၦၤလၢအသးတခုတဖၣ်,” ဒီးလၢ “တၢ်ဝံသးစူၤၦၤခဲလၢၥ်” အဂီၢ်န့ၣ် မ့ၢ်ဒၣ်ပကတဲၥ်ကတီၤပသးလၢ တၢ်အိၣ်တီအိၣ်လိၤသး, ဒီးမၤတၢ်လၢယွၤအဂီၢ်န့ၣ်လီၤ. တၢ်အိၣ်မူ လၢကျဲဒ်သိးအံၤန့ၣ်, မ့ၢ်လၢယွၤမၤစၢၤၦၤအဃိ, တၢ်ကဒုးအိၣ်ထီၣ်တၢ်သးခုသးမုာ် လၢတၢ်ရ့လိၥ် မုၥ်လိၥ်အမ့ၢ်အတီအပူၤ, ဒီး အဆၢဖိ ၁၅ ပာ်ဖျါဝဲလၢ ကမ့ၢ်တၢ် “လူၤတၢ်ဂ့ၤတၢ်ဝါတထံၣ်ဃီလၢ ၦၤတဂၤစုၥ်စုၥ်, ဒီးၦၤကိးဂၤဒဲးအဂီၢ်” န့ၣ်လီၤ.