“နမ့ၢ်ထံၣ်ဆၣ်တဖျၢၣ်အံၤ နဃုထံၣ်န့ၣ်က့ၤကျဲဆူဟံၣ် သ့ထီဘိလီၤ.” လၢယနီၢ်ဆံးဒံးအကတီၢ်, ယပၢ်စံးကတိၤ တၢ်ကတိၤတထံၣ်အံၤ, ဖဲအသိၣ်လိယၤ တၢ်ဃုထံၣ်ဆၣ်ဖးဒိၣ် လၢကလံၤစိးန့ၣ် ကမ့ၢ်တၢ်ဒ်လဲၣ်န့ၣ်လီၤ. လၢတၢ်ဒုးတၢ်ယၤအကတီၢ်, ယပၢ်မ့ၢ်ပှၤသုးဖိ, ဒီးကအိၣ်မူအိၣ်ဂဲၤအဂီၢ် ဘၣ်သန့ၤအသး လၢတၢ်ကွၢ်မုၢ်နၤအမူကပိၥ်လိၤ, ဒီးဃုကျဲလၢကဘၣ်လဲၤတၢ်အဂီၢ် အကတီၢ် အိၣ်ဝဲဒၣ်န့ၣ်လီၤ. လၢတၢ်န့ၣ်အဃိ, ယပၢ်ဒုးသ့ၣ်ညါယၤ ဆၣ်ဧိၤဖီဧိၤအမံၤ, ဒီးအိၣ်ဆိးလီၢ်ကျဲလၢ မူကပိၥ်လိၤ, ဘၣ်ဆၣ်ဒီး တၢ်ဃုထံၣ်ဆၣ်ဖးဒိၣ် လၢကလံၤစိးတကပၤမ့ၢ် တၢ်အကါဒိၣ်ကတၢၢ် လၢတၢ်ခဲလၢၥ်အဖီခိၣ်လီၤန့ၣ် အဝဲမၤလီၤတံၢ်, ဒုးသ့ၣ်ညါယၤန့ၣ်လီၤ. တၢ်သ့ၣ်ညါ ဆၣ်ဖးဒိၣ်အံၤ အိၣ်တၢ်အလီၢ်န့ၣ် မ့ၢ်တၢ်အခီပညီတမံၤဃီလၢ ဖဲယအိၣ်တပူၤဂ့ၤတပူၤဂ့ၤ ယအိၣ်ဒီးတၢ်သ့ၣ်ညါ, လၢအဘၣ်ထွဲဒီးတၢ်နဲၣ်ကျဲ ဒ်သိးယကဃုထံၣ်န့ၢ် တၢ်လီၢ်တၢ်ကျဲလၢယကဘၣ်လဲၤတၢ်န့ၣ်လီၤ.

လံၥ်စီဆှံပာ်ဖျါဝဲ ဆၣ်အဂၤလၢ အကါဒိၣ်ဝဲနီၢ်နီၢ်တဖျၢၣ်အဂ့ၢ်န့ၣ်လီၤ. “ၦၤမၢ်ကူးတဖၣ်လၢ မုၢ်ထီၣ်” ၦၤကူၣ်သ့ကူၣ်ဘၣ်တဖၣ် (အိၣ်ဟဲဝဲလၢ ခ့ခါ အံၣ်ရၣ် ဒီး အံၣ်ရး ဟီၣ်ကဝီၤ) အိၣ်ခိးကွၢ် တၢ်ပနီၣ်လၢမူခိၣ် ဘၣ်ထွဲဒီးကစၢ်တဂၤ ကဟဲအိၣ်ဖျဲၣ်ထီၣ်အဂ့ၢ်, ဒီးကမ့ၢ်ဝဲယွၤအၦၤဂီၢ်မုၢ်တဖၣ် အစီၤပၤန့ၣ်လီၤ. မး ၂:၁-၂ ပာ်ဖျါဝဲ ပှၤကူၣ်ဘၣ်ကူၣ်သ့တဖၣ် ဟဲဆူဝ့ၢ်ယရူၤၡလ့ၣ်, ဒီးသံကွၢ်ဝဲ “ၦၤအိၣ်ဖျဲၣ်ယူဒၤအစီၤပၤန့ၣ် မ့ၢ်အအိၣ်ဖဲလဲၣ်. အဂ့ၢ်ဒ်အံၤႇ ပထံၣ်ဘၣ်အဆၣ်တဖျၢၣ်လၢ မုၢ်ထီၣ်န့ၣ်, ဒီးပဟဲဘူၣ်ထီၣ်ဘါထီၣ်အီၤလီၤ” န့ၣ်လီၤ.

“ဆၣ်ဖးဒိၣ်လၢဘ့ၤသလ့ဃ့ၣ်” ဟဲဖျါထီၣ်အဂ့ၢ်န့ၣ် ၦၤကူၣ်သ့လၢအနၢ်ပၢၢ် မုၢ်လါဆၣ်, ဒီးမူဖျၢၣ်အဂ့ၢ်တဖၣ် တသ့ၣ်ညါဝဲဘၣ်ဆၣ်, လံၥ်စီဆှံပၥ်ဖျါဝဲလၢ ကစၢ်ယွၤတ့လီၤဆၣ်အံၤ ဒ်သိးကဒုးနဲၣ်ပှၤဟီၣ်ခိၣ်ဖိတဖၣ်လၢ ကစၢ်ယ့ၣ်ၡူး – ဒီးလံာ်လီၣ်ဖျါ ၂၂:၁၆ ပာ်ဖျါဝဲလၢ “ဆၣ်တူၢ်ဂီၤကတြ့ၣ်ကတြိၣ်” န့ၣ်လီၤ. ကစၢ်ခရံၥ်ဟဲဝဲ ဒ်သိးကမၤပူၤဖျဲးပှၤ လၢပတၢ်ဒဲးဘးဒီး နဲၣ်ဆှၢက့ၤပှၤဆူ ကစၢ်ယွၤအအိၣ်အဂီၢ်န့ၣ်လီၤ. ပိၥ်ကစၢ်ယ့ၣ်ရှူးအခံႇ ဒီးနကဃုထံၣ်န့ၢ်ကျဲ ဆူဟံၣ်န့ၣ်လီၤ.