ယမိၢ်အထူၣ်စုညါအလွဲၢ်ဂီၤဖိလၢအကတြ့ၣ်ကတြိၣ် ကြၢးဘၣ်တၢ်ဘျးလီၤစဲၤ လၢအလီၢ်မံခး ဘးခီတကပၤႇ ဖဲတၢ်အံးထွဲကွၢ်ထွဲ ခဲစၢၣ်တၢ်ဆါအလီၢ်ခၢၣ်သးန့ၣ်လီၤ. ဒီးဖဲတၢ်မၤ နံၤသဘျ့အကတီၢ်, ကြၢးလၢယကတဲၥ်ကတီၤဆိပၥ် တၢ်လဲၤအိၣ်သကိးအီၤ ဖဲကဘၣ်ဟံးန့ၢ် တၢ်ယါဘျါအကတီၢ်န့ၣ်လီၤ. ခရံာ်အိၣ်ဖျဲၣ်အနံၤန့ၣ် တၢ်လၢယသးအိၣ်ဒိးန့ၢ်တၢ်အဒိၣ်ကတၢၢ် မ့ၢ်ယအဲၣ်ဒိး အိၣ်ဒီးယမိၢ် ဆူညါတသီန့ၣ်လီၤ. ဘၣ်ဆၣ်ယအိၣ်ဒၣ်လၢဟံၣ်, ….. ဒီးဘျးလီၤစဲၤ ယမိၢ်အထူၣ်စုညါဖိလၢသ့ၣ်တၢ်ဂီၤတထံးအလိၤန့ၣ်လီၤ.
ဖဲယဖိခွါ စ့ဘံၣ်ယၢၣ် (Xavier) လ့ကပီၤထီၣ် သ့ၣ်တၢ်ဂီၤအမ့ၣ်အူသၣ်ဖိတဖၣ်န့ၣ်ဒီး, ယစံးအီၤလၢတၢ်ကလုၢ်ကသွံဒံအပူၤ ‘တၢ်ဘျုး’ န့ၣ်လီၤ. ယဖိခွါစံးဆၢဝဲ ‘န့ၢ်ကစီဒီလီၤ’ န့ၣ်လီၤ. ယစံးဘျုးကစၢ်ယွၤ လၢအစူးကါ မ့ၣ်အူသၣ်ဖိ အတၢ်ကပီၤပံၥ်လ့ပံၥ်လ့အံၤ, လၢအနဲၣ်ဆှၢ ယမဲၥ်ချံအတၢ်ထံၣ် ဆူတၢ်မုၢ်လၢ်အတၢ်ကပီၤ လၢတလီၤပံၥ်နီတဘျီ- လၢအမ့ၢ်ယ့ၣ်ၡူးအအိၣ်န့ၣ် ယဖိခွါတသ့ၣ်ညါဝဲဒၣ်ဘၣ်.
ၦၤကွဲးထါစံးထီၣ်ပတြၢၤ ၄၂ ပၥ်ဖျါ အနီၢ်သးတၢ်အိၣ်အသးတမုၥ်တလၤတဖၣ်ဆူယွၤအအိၣ်န့ၣ် ဖျါဖဲ အဆၢဖိ ၁-၄ န့ၣ်လီၤ. အဆၢဖိ ၅ အပူၤ တချုးဟ့ၣ်ဂံၢ်ဟ့ၣ်ဘါၦၤဖးလံၥ်ဖိတဖၣ်လၢ “ကွၢ်လၢ်ယွၤအကျဲတက့ၢ်. အဂ့ၢ်ဒ်အံၤႇ ယကစံးထီၣ်ပတြၢၤဒံးအီၤႇ ယမဲၥ်အတၢ်မၤစၢၤဒီး ယကစၢ်လီၤ” န့ၣ် ပှၤကွဲးထါပာ်ဖျါဝဲ တၢ်သ့ၣ်ညါလီၤအသး လၢအအိၣ်ဒီးတၢ်သးအုး, ဒီးတၢ်သးတံၥ်တၥ်တဖၣ်န့ၣ်လီၤ. အဆၢဖိ ၆-၁၀ အပူၤ ပကထံၣ်ဘၣ်လၢ တၢ်သးအုးအလပီလုၣ်ဘၢအီၤ, ဒီးတူၢ်ဘၣ်ခီၣ်ဘၣ်တၢ်ဘၣ်ဆၣ်, ၦၤကွဲးထါအတၢ်မုၢ်လၢ်ဟဲကပီၤထီၣ် ခီဖျိလၢတၢ်သ့ၣ်နီၣ်ကဒါက့ၤ အပူၤကွံၥ် ယွၤအတၢ်တီတၢ်လိၤတဖၣ်အဃိန့ၣ်လီၤ. အဆၢဖိ ၁၁ န့ၣ် အဝဲမၤကတၢၢ်က့ၤအတၢ်ကွဲး ခီဖျိသံကွၢ်က့ၤ အတၢ်သးဒ့ဒီတဖၣ်, ဒီးမၤဂၢၢ်မၤကျၢၤက့ၤ အတၢ်အိၣ်ဂၢၢ်ဆိးကျၢၤလၢ အတၢ်စူၢ်တၢ်နာ်, “ဘၣ်မနုၤလၢနသူၣ်ကၢ်သးလီၤလဲၣ်, ယသးဧၢ. ဒီးနသူၣ်ကိၢ်သးဂီၤလၢယပူၤ ဘၣ်မနုၤလဲၣ်. ကွၢ်လၢ်ယွၤအကျဲတက့ၢ်. အဂ့ၢ်ဒ်အံၤႇ ယကစံးထီၣ်ပတြၢၤဒံးအီၤႇ ယမဲၥ်အတၢ်မၤစၢၤ ဒီးယကစၢ်လီၤ” န့ၣ်လီၤ.
ပဝဲအါဂၤအဂီၢ်, ခရံာ်အိၣ်ဖျဲၣ်အကတီၢ် တၢ်သးခု, ဒီးတၢ်သးအုး အိၣ်ကျဲၣ်ကျီသးခံမံၤလိၥ် န့ၣ်လီၤ. ပတၢ်တူၢ်ဘၣ်တၢ်လၢ အဃါဃုၥ်သးတဖၣ်အံၤန့ၣ် ဘၣ်တၢ်မၤဘၣ်လိၥ်က့ၤ, ဒီးဘၣ်တၢ်ၦ့ၤက့ၤအီၤ ခီဖျိ ကစၢ်ယ့ၣ်ၡူး- တၢ်မုၢ်လၢ်အတၢ်ကပီၤအမ့ၢ်အတီ လၢအဘၣ်တၢ်အၢၣ်လီၤအီလီၤအဃိ မ့ၢ်အလီၢ်အိၣ်လၢ ပကစံးဘျုးစံးဖှိၣ်ကစၢ်ယွၤန့ၣ်လီၤ.
