အဲလဲၣ် (Ellen) ကျိၣ်စ့လၢကသူဝဲအဂီၢ် တအိၣ်ကဲာ်ဆိးလၢၤဘၣ်အဃိ ဖဲအဒိးန့ၢ် ခရံာ်အိၣ်ဖျဲၣ် စ့ဟ့ၣ်ကနၢၤန့ၣ်ဒီး သးခုဝဲဒၣ်န့ၣ်လီၤ. တၢ်အံၤလၢပှဲၤလံ, လၢအဂီၢ်ဘၣ်ဆၣ် ဖဲအလဲၤထၢနုာ်စ့အံၤ လၢစ့တၢးအကတီၢ်, တၢ်ကမၢကမၣ်လၢခံတမံၤ အိၣ်ကဲထီၣ်အသးလၢအဂီၢ်န့ၣ်လီၤ. စ့တၢးအပှၤ တူၢ်လိာ်စ့ စံးဘၣ်အီၤလၢ စ့တၢးထၢနုာ်န့ၢ်လံ စ့လၢကဘၣ်ဟ့ၣ်ကဒါက့ၤတၢ် (mortgage payment) ဆူအစ့စ့စရီ (checking account) အပူၤ, ဒ်အမ့ၢ်ခရံာ်အိၣ်ဖျဲၣ်ကတီၢ် တၢ်ဟ့ၣ်အဂီၢ် န့ၣ်လီၤ. ခဲကနံၣ်အံၤ, အဲလဲၣ် ဒီး ထရ့ (Trey) ဟ့ၣ်လီးက့ၤ စရီအဂၤ လၢကဘၣ်ဟ့ၣ်တဖၣ် သ့စ့ၢ်ကီးဝဲ, ဒီးဆိၣ်ဂ့ၤပှၤတဂၤဂၤ ခီဖျိလၢခရံာ်အိၣ်ဖျဲၣ်တၢ်ဟ့ၣ်တမံၤသ့လံန့ၣ်လီၤ.

ယွၤအိၣ်ဒီး တၢ်ဆိၣ်ဂ့ၤအကျိၤအကျဲလၢ အတလၢကွံာ် တၢ်လၢပမုၢ်လၢ်ပာ်န့ၣ်လီၤ. ရူၤသး ၁:၂၀-၂၁ ပာ်ဖျါဝဲ နီၢ်နၤဧမံ ဘၣ်လဲၤခီဖျိ တၢ်အိၣ်မူလၢအနး အခၣ်, ဒီးတၢ်သူၣ်ကၢ်သးလီၤ ခီဖျိလၢ အဝၤဒီးအဖိခွါတဖၣ် သံသဒၣ်အီၤအဃိန့ၣ်လီၤ. ရူၤသး ၄:၁၀ ပာ်ဖျါထီၣ် တၢ်အိၣ်အသး အကီအခဲ, ဒီးလၢအဂီၢ်တၢ်မၤစၢၤအကျဲတအိၣ်လၢၤဘၣ်အံၤန့ၣ် ဘၣ်တၢ်အုၣ်ခီၣ်က့ၤလၢ အဘူးအတံၢ် စီၤဘိၤဧး, လၢဟံးန့ၢ်အဒဲၣ်မုၣ်, ဒီးကတဲာ်ကတီၤဟံၣ်ဃီလၢအဂီၢ် ဒီးနီၢ်နၤဧမံအဂီၢ်န့ၣ်လီၤ.

တၢ်အံၤကမ့ၢ်တၢ်ထဲတမံၤဧိၤ လၢနီၢ်နဧမံ မုၢ်လၢ်သ့ဝဲသ့ၣ်သ့ၣ်န့ၣ်လီၤ. ဘၣ်ဆၣ်ဒီး ကစၢ်ယွၤဆိၣ်ဂ့ၤ နီၢ်ရူၤသးဒီးစီၤဘိၤဧး လၢဖိပိာ်ခွါဖိတဂၤန့ၣ်လီၤ. အဆၢဖိ ၁၅, (ခ့ခါ) အပူၤ ပကထံၣ်ဘၣ် ခဲကနံၣ်အံၤ နီၢ်နၤဧမံအိၣ်ဒီး အလံၤခွါဖိတဂၤလၢ “ကမၤသီထီၣ်က့ၤအတၢ်အိၣ်မူ, ဒီးကအံးထွဲကွၢ်ထွဲ(အီၤ) ဖဲလၢ (အ)သးပှၢ်အကတီၢ်န့ၣ်လီၤ.” “တၢ်အံၤ” တမံၤဧိၤန့ၣ် လၢပှဲၤဝဲလၢ အဂီၢ်လံ. အဆၢဖိ ၁၇ အပူၤ ဒ်ပိာ်မုၣ်လၢဝ့ၢ်ဘ့ၤသလ့ဃ့ၣ်တဖၣ် စံးဝဲအသိး “ဖိခွါတဂၤ အိၣ်ဖျဲၣ်ထီၣ်လၢနီၢ်နၤဧမံအဂီၢ်လံ.” လၢခံဒီး ဖိသၣ်စီၤဧိၤဘးဖိဒိၣ်ထီၣ်ဝဲ, ဒီးကဲထီၣ် “စီၤယံးရှဲ အပၢ်, စီၤယံးရှဲကဲထီၣ် စီၤဒၤဝံးအပၢ်” န့ၣ်လီၤ. နီၢ်နၤဧမံအဟံၣ်ဖိဃီဖိကဲထီၣ် ပှၤအံၣ်စရ့လးဖိ အစီၤလိၣ်စီၤပၤအစၢၤအသွဲၣ်, ပှၤပၢတၢ်အကါဒိၣ်ကတၢၢ် လၢတၢ်စံၣ်စိၤတဲစိၤအပူၤန့ၣ်လီၤ. ‘တၢ်အံၤ’ လၢပှဲၤတ့ၢ်လံ, ဘၣ်ဆၣ်, စီၤဒၤဝံးကဲထီၣ် ကစၢ်ယ့ၣ်ရှူးအထူးအထံးန့ၣ်လီၤ.

ပမ့ၢ်စူၢ်က့ၤနာ်က့ၤကစၢ်ခရံာ်န့ၣ်ဒီး, ပလီၢ်ပလၤ ကဒ်သိးလိာ်အသးဒီး နီၢ်နၤဧမံန့ၣ်လီၤ. တချုးလၢကစၢ်ခရံာ် ပှ့ၤက့ၤပှၤဒံးဘၣ်န့ၣ်, ပတအိၣ်ဒီးတၢ်နီတမံၤဘၣ်. မ့မ့ၢ် ခဲကနံၣ်အံၤ, ပဘၣ် တၢ်တူၢ်လိာ်ပှၤအလၢအပှဲၤ လၢပပၢ်ယွၤ, လၢအဆိၣ်ဂ့ၤပှၤ ဒ်သိးဒီးပှၤကလုာ်အဂၤတဖၣ် ကဘၣ် တၢ်ဆိၣ်ဂ့ၤအဂီၢ်န့ၣ်လီၤ. တၢ်အံၤမ့ၢ်တၢ်အါန့ၣ်ဒံး တၢ်လၢအလၢဝဲလီၢ်ဝဲန့ၣ်လီၤ.