ဖဲယမ့ၢ်ဖိသၣ်တဂၤအဆၢကတီၢ်န့ၣ်, ယထၢဖှိၣ်ပာ်ဖှိၣ် တၢ်ဆှၢလံာ်အတၢ်ဂီၤခိၣ်တဖၣ်န့ၣ်လီၤ. ဖဲယ အဲ(န)ကိ (angkong) {အခီပညီ မ့ၢ် ‘ဖု’ လၢ ဖူၣ်ကံန့ အကျိာ် (Fukienese)} နၢ်ဟူ ယတၢ်သးစဲအဂ့ၢ်အံၤဒီး, စးထီၣ်ပာ်ဖှိၣ် အဝဲၤလီၢ် အလံာ်ပရၢအတၢ်ဂီၤခိၣ်တဖၣ် ကိးနံၤဒဲးန့ၣ်လီၤ. ဖဲယလဲၤအိၣ်သကိး ယဖုယဖံတဖၣ်တဘျီလၢ်လၢ်န့ၣ်, ယဖုဟ့ၣ်လီၤယၤလံာ်ဒၢတဖျၢၣ် အိၣ်ပှဲၤဒီး တၢ်ဂီၤခိၣ်ဃံလၤ အကလုာ်ကလုာ်တဖၣ်န့ၣ်လီၤ. ဘၣ်တဘျီန့ၣ် အဝဲစံးဘၣ်ယၤလၢ “ယတၢ်မၤ အါထီဘိဒၣ်လဲာ်, ယတသးပ့ၤနီၣ်နၤဘၣ်” န့ၣ်လီၤ.
ယဖုန့ၣ် တဒုးနဲၣ် အတၢ်အဲၣ်ကဟုကယာ်တၢ်ပျီပျီဘၣ်ဆၣ် ယသးကလၢၢ်ဘၣ် အတၢ်အဲၣ် ဒိၣ်ဒိၣ်ယိာ်ယိာ်န့ၣ်လီၤ. ခီဖျိကျိၤကျဲလၢအဒိၣ်အယိာ်, ဒီးလၢတၢ်ထိၣ်ဒွးအီၤတသ့တန့ၢ်အပူၤ, ယွၤ ဒုးနဲၣ်ပာ်ဖျါအတၢ်အဲၣ်လၢပှၤအံၣ်စရ့လးဖိအဂီၢ်, ဒီးဘိးဘၣ်သ့ၣ်ညါဝဲလၢ ယရှါ ၄၉:၁၅ အပူၤ “ယတသးပ့ၤနီၣ်ဘၣ်နၤဘၣ်” န့ၣ်လီၤ. တၢ်အပူၤကွံာ်န့ၣ် အပှၤဂီၢ်မုၢ်တဖၣ် ဘါတၢ်ဂီၤတၢ်ဖီၣ် ဒီးတဒိကနၣ်ယွၤအဃိ, ဘၣ်တူၢ်တၢ်နးတၢ်ဖှီၣ် လၢကီၢ်ဘၤဘူၤလိၣ်အဆၢကတီၢ်န့ၣ်, အဝဲသ့ၣ် သူၣ်အုးသးအုး ဒီးစံးဝဲလၢ အဆၢဖိ ၁၄ အပူၤ “ကစၢ်န့ၣ် သးပ့ၤနီၣ်လံယၤလံ” န့ၣ်လီၤ. ဘၣ်ဆၣ် ကစၢ်ယွၤအတၢ်အဲၣ် အပှၤဂီၢ်မုၢ်တဖၣ်န့ၣ် တဆီတလဲဝဲဒၣ်ဘၣ်. အဆၢဖိ ၈-၁၃ အပူၤ ကစၢ်ယွၤအၢၣ်လီၤအီလီၤ အပှၤဂီၢ်မုၢ်တဖၣ်လၢ ကပျၢ်အတၢ်ကမၣ်, ဒီးကအုၣ်က့ၤခီၣ်က့ၤအဝဲသ့ၣ် တဖၣ်န့ၣ်လီၤ.
အဆၢဖိ ၁၆ အပူၤ ဒ်ယွၤစံးဘၣ်ပှၤအံၣ်စရ့လးဖိလၢ “ယကွဲးလံနၤလၢ ယစုညါသးအလိၤ,” အသိး, မုၢ်မဆါတနံၤအံၤ ကစၢ်ယွၤစံးဘၣ်ပှၤစ့ၢ်ကီးန့ၣ်လီၤ. ဖဲယကွၢ်ထံဆိကမိၣ် ယွၤစံးကတိၤ မၤဂၢၢ်မၤကျၢၤတၢ်တဖၣ်န့ၣ် ဒုးသ့ၣ်နီၣ်ထီၣ်က့ၤယၤ ကစၢ်ယ့ၣ်ရှူးအစု လၢအဘၣ်တၢ်ဆဲးဖျိတ့ၢ် အီၤလၢထး, စုလၢအသလၣ်ထီၣ်အသး မ့ၢ်လၢအတၢ်အဲၣ်ဘၣ်ပှၤ, ဒီးလၢပတၢ်အုၣ်က့ၤခီၣ်က့ၤ အဂီၢ်န့ၣ်ဖျါလၢ (ယိၤ ၂၀:၂၄-၂၇) အပူၤန့ၣ်လီၤ. ဒ်ယဖုဖု အတၢ်ဂီၤခိၣ်တဖၣ်, ဒီးအတၢ်ကတိၤ ကပုာ်လုးတဖၣ်အသိး, ယွၤယူာ်ဃီၤအစု လၢတၢ်ပျၢ်ပတၢ်ကမၣ် ဒ်အမ့ၢ်တၢ်အဲၣ်အပနီၣ်အထူ အယိာ်န့ၣ်လီၤ. မ့ၢ်လၢကစၢ်ယွၤအတၢ်အဲၣ်, လၢပဂီၢ်တဆီတလဲဘၣ်အဃိ, မ်ပကစံးဘျုးသကိး ယွၤန့ၣ်တက့ၢ်. ကစၢ်ယွၤ တသးပ့ၤနီၣ်ပှၤ နီတဘျီဘၣ်.
