ယၤဒီးယတံၤယသကိးတနီၤ ပလဲၤဟးဆူတၢ်လီၢ်လၢပှၤလိာ်ကွဲထံ (Water park) န့ၣ်ဒီး, ပကျဲးစၢးလဲၤခီဂာ် ကျိၤကျဲကီခဲ လၢအအိၣ်ထီၣ်ဖီအသးလၢထံဖီခိၣ်, ဘၣ်တၢ်မၤဃာ်အီၤဒီး ပိးလီတဖၣ်လၢပှၤဒၢနုာ်ဃာ်ကလံၤန့ၣ်လီၤ. တၢ်လီၢ်တၢ်ကျဲတဖၣ်စံၣ်ပီပု, ဒီးဘိၣ်ဘျ့ဝဲအဃိ ပလဲၤတၢ် လိၤလိၤဘျၢဘျၢတန့ၢ်ဘၣ်. ဖဲလၢပလဲၤခီတၢ်လီၤဘံတဖၣ်, တၢ်ထီၣ်ထီတဖၣ်, ဒီးတိၤတဖၣ် လၢတၢ်တကျၢၤတနူၤ, ဒီးဝးယဲၤယီၤအကတီၢ်န့ၣ်, ပလီၤတဲာ်ဆူထံကျါသတူၢ်ကလာ် အဃိဒီး ပကိးပသူတပျုာ်တပျီၤန့ၣ်လီၤ. ဖဲပလဲၤတၢ်အကျိၤဝံၤတဝီန့ၣ် ယသကိးမုၣ်တဂၤ လီၤဘှံး လီၤတီၤဝဲဒိၣ်မးအဃိဒီး, သန့ၤလီၤအသး လၢ “တၢးထီတဖၣ်” အကျါတခါအလိၤ, လၢကအိၣ်ဘှံး အိၣ်သါအဂီၢ်န့ၣ်လီၤ. တကီၢ်ခါန့ၣ်, မ့ၢ်လၢယသကိးမုၣ်အတယၢၢ်အဃိ တၢးထီအံၤလီၤတကူၢ်, ဒီးအဝဲဖျိးလီၤတဲာ်ဆူထံကျါန့ၣ်လီၤ.

မ့မ့ၢ်တၢးထီခၢၣ်သနၢၢ်လၢ လံာ်စီဆှံအပူၤတဖၣ်န့ၣ် တမ့ၢ်ဒ်တၢ်ထူၣ်တကျၢၤတနူၤတဖၣ် လၢတၢ်လိာ်ကွဲထံအလီၢ်အသိးန့ၣ်ဘၣ်. အဝဲသ့ၣ်မ့ၢ်တၢ်လီၢ်ခၢၣ်သနၢၢ်လၢ တၢ်ဒုးဆၢက့ၤတၢ်, တၢ်ဒီတဒၢတၢ်အဂီၢ်န့ၣ်လီၤ. စံၣ်ညီၣ်ကွီၢ် ၅:၅၀-၅၁ ပာ်ဖျါဝဲ ဖဲလၢစီၤအဘံၤမ့လ့းဟဲဒုး အဝဲသ့ၣ် အဝ့ၢ်န့ၣ်ဒီး ပှၤတ့ဘ့းဖိတဖၣ်ဃ့ၢ်ဆူ “တၢးထီခၢၣ်သနၢၢ်တဖျၢၣ်,” ဒ်သိးကအိၣ်ခူသူၣ်အဂီၢ် န့ၣ်လီၤ. လၢလံာ်တၢ်ကတိၤဒိ ၁၈:၁၀ န့ၣ်, ပှၤကွဲးတၢ်စူးကါ တၢးထီခၢၣ်သနၢၢ်အက့ၢ်အဂီၤ ဒ်သိးကပာ်ဖျါ ကစၢ်ယွၤ, ဒ်အမ့ၢ်ယွၤလၢကမၤပူၤမၤဖျဲး ပှၤလၢအသန့ၤသးလၢအီၤတဖၣ်န့ၣ်လီၤ.

ဘၣ်ဆၣ်, ဖဲပလီၤဘှံးလီၤဘှါမ့ၢ်ဂ့ၤ, ဖဲပဘၣ်တၢ်မနၢၤမၤဃၣ်ပှၤမ့ၢ်ဂ့ၤ, လၢတၢ်သန့ၤသး လၢယွၤအတၢးထီခၢၣ်သနၢၢ်အလီၢ်န့ၣ်, ပဃုထံၣ် တၢ်ဘံၣ်တၢ်ဘၢ, ဒီးတၢ်မၤစၢၤအဂုၤအဂၤ တဖၣ်, လၢအမ့ၢ် တၢ်ဖံးတၢ်မၤ, တၢ်ရ့လိာ်ဘၣ်ထွဲတဖၣ် မ့တမ့ၢ် နီၢ်ခိအတၢ်မၤမုာ်တဖၣ်အဂီၢ် န့ၣ်လီၤ. ဒ်အဆၢဖိ ၁၁ ပာ်ဖျါဝဲအသိး ပတလီၤဆီဒီး ပှၤထူးပှၤတီၤတဂၤ လၢအလူၤဃုကွၢ်တၢ်ဂံၢ် တၢ်ဘါ လၢအတၢ်ထူးတၢ်တီၤအသိးန့ၣ်လီၤ. ဘၣ်ဆၣ်ဒီး ဒ်တၢးထီလၢအဘၣ်တၢ်မၤပှဲၤဃာ်ဒီး ကလံၤန့ၣ် ဟံးဃာ်ပၢၤဃာ် ယတံၤသကိးမုၣ်တသ့ဝဲအသိးန့ၣ်, တၢ်ထူးတၢ်တီၤတဖၣ်န့ၣ် ဟ့ၣ်ပှၤ တၢ်လၢပလိၣ်နီၢ်နီၢ်တသ့ဝဲဘၣ်. ယွၤလၢ အလၢပှဲၤဒီးတၢ်စိတၢ်ကမီၤ, ဒီးပၢၤဃာ်တၢ်အိၣ်အသး ခဲလၢာ်တဂၤန့ၣ် ဟ့ၣ်ပှၤတၢ်မၤမုာ်ထီၣ်က့ၤပသး, ဒီးတၢ်ဘံၣ်တၢ်ဘၢနီၢ်နီၢ်န့ၣ်လီၤ.