ဖဲ ကိဘ့း -၁၉ (covid-19) တၢ်ဆါသံသတြိာ်အကတီၢ်, ဒ့း (Dave) ဒီး ကါလၣ်(Carla) လူၤဃု တၢ်အိၣ်ဖှိၣ်ဘါသကိးတၢ်လၢဟံၣ်န့ၣ်, ယံာ်ဝဲတဘျုးလါန့ၣ်လီၤ. တၢ်ပိာ်ထွဲတၢ်အိၣ်ဆူၣ်အိၣ်ချ့ အတၢ်နဲၣ်ကျဲတဖၣ်, လၢအထိၣ်ဃံး နီၢ်တဂၤဒီးတဂၤ ကထံၣ်လိာ်သးလၢကျဲအကလုာ်ကလုာ်န့ၣ်, မၤကီမၤခဲထီၣ်တၢ်အါန့ၢ်အန့ၣ်လီၤ. အဝဲသ့ၣ်ဆၢမုၢ်လၢ်ဝဲလၢ ကရ့လိာ်ဘၣ်ထွဲလိာ်သးဒီး ပှၤစူၢ်က့ၤနာ်က့ၤတၢ်ဖိတဖုန့ၣ်လီၤ. ကါလၣ် ဆှၢလီၤ လီလံာ်ပရၢဆူ ယအိၣ်ဒီးစံးဝဲ “အခဲအံၤ မ့ၢ်အကတီၢ်ကီခဲလၢ ပကဃုထံၣ်န့ၢ် တၢ်အိၣ်ဖှိၣ်တဖှိၣ်အဂီၢ်လီၤ” န့ၣ်လီၤ. ယနီၢ်ကစၢ်ဒၣ်ယဲ တၢ်ဆၢထံၣ်လိာ်က့ၤသးဒီး ယတၢ်အိၣ်ဖှိၣ်န့ၣ် မ့ၢ်တၢ်တမံၤဟဲအိၣ်ထီၣ်လၢ ယသးကံၢ်ပူၤန့ၣ်လီၤ.

ယကွဲးဆၢက့ၤအီၤလၢ, “အအံၤမ့ၢ် အကတီၢ်ကီခဲလၢ ပက‘မ့ၢ်’တၢ်အိၣ်ဖှိၣ်အဂီၢ်န့ၣ်လီၤ.” တၢ်ဆၢကတီၢ်ဒ်သိးအံၤန့ၣ်, ပတၢ်အိၣ်ဖှိၣ်ကဲထီၣ်လီၢ်ခၢၣ်သး လၢအနီၤဟ့ၣ်တၢ်အီၣ်တၢ်အီလၢ ခိၣ်ဃၢၤ လီၢ်ကဝီၤအပူၤ, ဒီးဒုးအိၣ်ထီၣ် တၢ်ဘူၣ်ထီၣ်ဘါထီၣ်ယွၤလၢအီၣ်လဲ (On Line), ဒီးကိး တၢ်အိၣ်ဖှိၣ်ဖိကိးဂၤ ခီဖျိလၢကွဲၤဒီနၢ်ဒီး ဟ့ၣ်ဂံၢ်ဟ့ၣ်ဘါ, ဃ့ထုကဖၣ်န့ၢ်တၢ်လၢအဝဲသ့ၣ်အဂီၢ် န့ၣ်လီၤ. ယဝၤသးဘိ ဒီးယၤ ပမၤသကိးဘါသကိးတၢ်, ဒ်သိးပကမ့ၢ် “တၢ်အိၣ်ဖှိၣ်” လၢဟီၣ်ခိၣ် လၢအဆီတလဲသးအပူၤ, ဒီးပဆိကမိၣ် တၢ်လၢပမၤသ့အါန့ၢ်ဒံးအလီၢ် တၢ်မနုၤတမံၤကအိၣ် ဒံးလဲၣ်အဂ့ၢ်န့ၣ်လီၤ.

ဧ့ၤဘြံၤ ၁၀:၂၅ န့ၣ်, ပှၤကွဲးလံာ် ဟ့ၣ်သဆၣ်ထီၣ်ပှၤဖးတၢ်ဖိတဖၣ်လၢ “ဟးဆှဲးပတၢ် အိၣ်ဖှိၣ်ရိဖှိၣ်, ဒ်ပှၤတနီၤနီၤအလုၢ်အလၢ်အသိးန့ၣ်တဂ့ၤ. ပသဆၣ်ထီၣ်လိာ်ပခံ…. တက့ၢ်” န့ၣ်လီၤ. အဆၢဖိ ၃၂-၃၄ စံးဝဲ ကမ့ၢ်လၢတၢ်နးတၢ်ဖှီၣ်သ့ၣ်သ့ၣ်အဃိ, မ့တမ့ၢ် ဧ့ၤဘြံၤ ၁၂:၃ ပာ်ဖျါဝဲလၢ တၢ်လီၤဘှံးလီၤတီၤအဃိ, လၢသီပှၤစူၢ်က့ၤနာ်က့ၤတၢ်ဖိတဖၣ် ဘၣ်ကျဲးစၢးဂဲၤလိာ်ဝဲ ဒီးလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ ဒ်သိးကမ့ၢ်ဒံးတၢ်အိၣ်ဖှိၣ် ဒ်အလီၢ်လီၢ်အဂီၢ်န့ၣ်လီၤ.

ဒီးမုၢ်မဆါတနံၤအံၤ, ယလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါယၤန့ၣ်လီၤ. နဲနလိၣ်ဘၣ်ဒံးဧါ. တၢ်အိၣ်ဖှိၣ်အတၢ်အိၣ်သး, မၤအသး လၢညီနုၢ်ပမၤအီၤတဖၣ် မ့ၢ်ဆီတလဲအသးန့ၣ်ဒီး, ဆူညါ ပကဘၣ် ‘မ့ၢ်’ တၢ်အိၣ်ဖှိၣ်ဒံးဧါ. ဒ်ယွၤနဲၣ်ဆှၢပှၤအသိး မ်ပကဟ့ၣ်ဂံၢ်ဟ့ၣ်ဘါ လိာ်သကိးပသးဒီး ပကမၤထီၣ်မၤထီလိာ်သကိးပသးန့ၣ်တက့ၢ်. ပကနီၤဟ့ၣ်သကိးတၢ်ဂံၢ်ထံး လၢအအိၣ်ဒီးပှၤ တက့ၢ်. ဆှၢလီၤတၢ်ကတိၤဟ့ၣ်ဂံၢ်ဟ့ၣ်ဘါတက့ၢ်. ဖဲပမၤသ့န့ၣ် အိၣ်ဖှိၣ် ရိဖှိၣ်သကိးတက့ၢ်. တဂၤဒီး တဂၤအဂီၢ်ဃ့ထုကဖၣ်တၢ်တက့ၢ်. မ်ပက ‘မ့ၢ်’ တၢ်အိၣ်ဖှိၣ်တက့ၢ်.