“နတမ့ၢ်ပှၤလၢ ယကွၢ်လၢ်စိအသိးဘၣ်. ယဆိကမိၣ်လၢ ယကသးဟ့နၤလီၤ. ဘၣ်ဆၣ် ယတသးဟ့နၤဘၣ်.” ပှၤသးစၢ်တဂၤအံၤ အတၢ်ကတိၤတဖၣ် ဖျါဆူၣ်ဝဲဘၣ်ဆၣ် တၢ်နီၢ်နီၢ်န့ၣ် မ့ၢ်ဒၣ်အတၢ်ကျဲးစၢး မၤဂ့ၤတၢ်န့ၣ်လီၤ. ယလဲၤမၤလိတၢ် လၢအထံကီၢ်, ဒီးအပူၤကွံာ် နံၣ်လၢ အဆံတဖၣ်အဆၢကတီၢ်န့ၣ်, တၢ်ဒုးတၢ်ယၤကဲထီၣ်လၢအထံကီၢ်, ဒီးယထံကီၢ်အဘၢၣ်စၢၤန့ၣ်လီၤ. ဖဲကရူၢ်ဖိတၢ်စံးကတိၤလိာ်သး, လၢတၢ်မၤလိဒၢးအပူၤအကတီၢ်, ယပာ်သူၣ်ပာ်သး, ဒီးဖျါလၢ တအဲၣ်ဒိးမၤဘၣ်ထွဲလိာ်အသးန့ၣ်လီၤ. ဖဲယသံကွၢ်အီၤလၢ မ့ၢ်ယမၤကမၣ်ဘၣ်နၤလၢ ကျဲတမံၤမံၤဧၣ်န့ၣ်ဒီး. စံးဆၢဝဲ “တမ့ၢ်လ့ၤတက့ၤဘၣ်. ဖဲတၢ်ဒုးတၢ်ယၤကဲထီၣ်ဒီး နထံကီၢ်အဆၢကတီၢ်, ယဖုဘၣ်တၢ်မၤသံအီၤအဃိ, ယသးဟ့ နပှၤကလုာ်တဖၣ်, ဒီးနထံကီၢ်န့ၣ်လီၤ. ဘၣ်ဆၣ် ခဲကနံၣ်အံၤ ယထံၣ်တၢ်လၢ အဒ်သိးလိာ်သးဒီး ပှၤတဖၣ်အိၣ်အါမံၤ, အဃိဒီးကဲထီၣ် တၢ်မၢကမၣ် လၢယဂီၢ်. ဒီးလၢပကမ့ၢ် ဒီတံၤဒီသကိးအဂီၢ် တၢ်ဂ့ၢ်ကီတအိၣ်ဘၣ်န့ၣ်လီၤ.”

တၢ်တဘၣ်သူၣ်ဘၣ်သး ပာ်စၢၤဆိတခီတၢၤန့ၣ် ဒ်ပှၤကညီကလုာ်ဒူၣ်သ့ၣ်တဖၣ်အသိး အိၣ်ယံာ်တ့ၢ်မးလံန့ၣ်လီၤ. အပူၤကွံာ် အနံၣ်ခံကထိ, လၢသီန့ၣ် ဖဲစီၤနၤသန့ၤလးနၢ်ဟူ ကစၢ်ယ့ၣ်ရှူးအိၣ်ဆိးလၢ နစၤရ့းန့ၣ်ဒီး, အတၢ်ထံၣ်တခီတၢၤန့ၣ် အိၣ်ဖျါထီၣ်ဝဲတြၢၢ်ကလာ်န့ၣ်လီၤ. ယိၤ ၁:၄၆ အပူၤသံကွၢ်ဝဲ “တၢ်ဂ့ၤတၢ်ဝါတမံၤမံၤ ဟဲထီၣ်လၢ နစၤရ့းအပူၤ ဘၣ်ကသ့ဧါ” န့ၣ်လီၤ. ဒ်ကစၢ်ယ့ၣ်ရှူးအသိး စီၤနၤသန့လး အိၣ်ဆိးဝဲလၢ ကၤလံၤလါအဟီၣ်ကဝီၤန့ၣ်လီၤ. ဘၣ်သ့ၣ်သ့ၣ် အဝဲကဆိကမိၣ်လၢ ကစၢ်ယွၤအမ့းရှံအၤ လၢကအုၣ်က့ၤခီၣ်က့ၤတၢ်တဂၤန့ၣ် ကအိၣ်ဟဲလၢတၢ်လီၢ်အဂၤတတီၤန့ၣ်လီၤ. ပှၤကၤလံၤလါဖိ အဂုၤအဂၤတဖၣ်ဒၣ်လဲာ် ထံၣ်ဆိကမိၣ် နစၤရ့း, ဒ်အမ့ၢ်သဝီဆံးဖိလၢ တၢ်လီၤတိၢ်လီၤဆီတအိၣ်ဘၣ်တဖျၢၣ်န့ၣ်လီၤ.

စီၤနၤသန့လး သံကွၢ်ဆၢက့ၤတၢ်အံၤန့ၣ် တမ့ၢ်တၢ်လၢကမၤဆိကတီၢ် ကစၢ်ယ့ၣ်ရှူး အတၢ်အဲၣ်လၢအဂီၢ်ဘၣ်န့ၣ် ဖျါဆှဲဝဲဒၣ်အဃိ, အသးလဲလိာ်ကွံာ်ဝဲဒီး ကဲထီၣ်ကစၢ်ယ့ၣ်ရှူးအပျဲၢ်တဂၤန့ၣ်လီၤ. လၢခံအဆၢဖိ ၄၉ အပူၤန့ၣ်, စီၤနၤသန့ၤလး ပာ်ဖျါထီၣ်လၢ “နဲဒၣ်အံၤ နမ့ၢ်ယွၤအဖိခွါလီၤ” န့ၣ်လီၤ. တၢ်ထံၣ်ဆိကမိၣ်တခီတၢၤ လၢကအိၣ်ထီဒါယွၤအတၢ်အဲၣ် လၢအဆီတလဲတၢ်သ့န့ၣ် တအိၣ်နီတမံၤဘၣ်န့ၣ်လီၤ.