ပှၤအါဒံအါဂၤ စံၣ်ညီၣ်တဲာ်ဝဲလၢ ဖၣ်ရဲတ့ၣ် (Ferrante) ဒီး တ့ၣ်ကၣ် (Teicher) မ့ၢ်ပှၤဒ့တနၢ် အသ့ကတၢၢ်ဃံာ်ခံတဖု လၢတၢ်ဆၢကတီၢ်ကိးကတီၢ်ဒဲးန့ၣ်လီၤ. ပှၤခံဂၤ ပာ်ဖှိၣ်ဟ့ၣ်ထီၣ်တၢ်သံကျံအံၤ မ့ၢ်တၢ်လၢအလီၤတံၢ်လီၤဆဲးအဃိ, အဝဲသ့ၣ် အတၢ်ဟူးတၢ်ဂဲၤအံၤ ဘၣ်တၢ်ပာ်ဖျါထီၣ် ဒ်စုလွံၢ်ခီ လၢသးတဖျၢၣ်ဃီအပူၤန့ၣ်လီၤ. ဖဲပှၤတဂၤဂၤ ဒိကနၣ် အဝဲသ့ၣ် အတၢ်သံကျံန့ၣ်ဒီး, တၢ်သံကျံလၢ ကဟ့ၣ်ထီၣ်ဝဲတဖၣ် ကဖိးမံလိာ်သးအဂီၢ် အဝဲသ့ၣ် ဘၣ်ဂုာ်ကျဲးစၢးတၢ်အါမးလီၤန့ၣ် ပှၤသ့ၣ်ညါသ့ ဝဲဒၣ်န့ၣ်လီၤ.

ဘၣ်ဆၣ်, အါန့ၢ်အန့ၣ်, အဝဲသ့ၣ်မ့ၢ် ပှၤလၢအအဲၣ်ဘၣ်တၢ်လၢအမၤတဖၣ်န့ၣ်လီၤ. နီၢ်နီၢ်န့ၣ်, ဖဲ ၁၉၈၉ နံၣ်န့ၣ် အဝဲသ့ၣ်အိၣ်ဘှံးလၢတၢ်မၤအံၤဘၣ်ဆၣ်, ဖၢၣ်ရဲတ့ၣ် ဒီး တ့ၣ်ကၣ်န့ၣ် ဘၣ်တဘျီဘျီ အလီၢ်မ့ၢ်အိၣ် ဟ့ၣ်ထီၣ်တၢ်သံကျံတနၢ် လၢလီၢ်ကဝီၤ ပှၤဆါတနၢ်ကျးတဖၣ်အပူၤ လၢတၢ်ဒ့တၢ်အူအမူး အဂီၢ်န့ၣ်လီၤ. အဝဲသ့ၣ်ခံဂၤမ့ၢ် ပှၤကဆှီဒီဖိလၢ အအဲၣ်ဘၣ်တၢ်ဒ့သံကျံတနၢ်တဖၣ်န့ၣ်လီၤ.

စီၤပၤ စီၤဒၤဝံး မ့ၢ်စ့ၢ်ကီး ပှၤလၢအအဲၣ်တၢ်ဒ့တၢ်အူ/တၢ်သံကျံ ဘၣ်ဆၣ်, အဝဲပာ်ဖှိၣ်ထီၣ်အသးဒီး ကစၢ်ယွၤ ဒ်သိးကဟ့ၣ်ထီၣ် အတၢ်သးဝံၣ်တဖၣ် လၢတၢ်ပညိၣ်အထီကတၢၢ် တပတီၢ်အဂီၢ်န့ၣ်လီၤ. စီၤဒၤဝံးအထါစံးထီၣ်ပတြၢၤတဖၣ်န့ၣ် ပာ်ဖျါထီၣ် အတၢ်အိၣ်မူလၢအပှဲၤဒီး တၢ်ကျဲးစၢးဂဲၤလိာ်တၢ်တဖၣ်, ဒီးအဲၣ်ဒိးအိၣ်မူအိၣ်ဂဲၤ, သန့ၤလီၤသးဒိၣ်ဒိၣ်ယိာ်ယိာ် လၢကစၢ်ယွၤအလိၤ လီၤတံၢ်လီၤဆဲး န့ၣ်လီၤ. တၢ်ဘၣ်ကွၢ်ဆၢၣ်မဲာ်ဒီးအနီၢ်ကစၢ် အတၢ်လီၤတူာ်လီၤကာ် ဒီးတၢ်တလၢတပှဲၤအပူၤဒၣ်လဲာ် အတၢ်စံးထီၣ်ပတြၢၤယွၤန့ၣ် ပာ်ဖျါထီၣ် နီၢ်သး “တၢ်သ့တၢ်ဘၣ်ကံၢ်စီအလၢအပှဲၤ”န့ၣ်လီၤ. အတၢ်အိၣ်မူအကတီၢ် လၢအခံးသူကတၢၢ်အပူၤဒၣ်လဲာ် သ့ၣ်ညါပာ်ပနီၣ် ကစၢ်ယွၤ အတၢ်ဒိၣ်တၢ်ထီ, ဒီးအတၢ်ဂ့ၤအတၢ်ဝါတဖၣ်န့ၣ်လီၤ. တၢ်လၢအပာ်ဖျါထီၣ် စီၤဒၤဝံးအတၢ်ပာ်သူၣ်ပာ်သး လၢအသးဝံၣ်စံးထီၣ်ပတြၢၤ ကစၢ်ယွၤန့ၣ် ပကထံၣ်ဘၣ် ဖဲထါစံးထီၣ်ပတြၢၤ ၁၈:၁ အပူၤ “ယအဲၣ်နၤ, ယဂံၢ်ယဘါယွၤဧၢ” န့ၣ်လီၤ.

အဆၢဖိ ၃ န့ၣ် စီၤဒၤဝံးပာ်ဖျါကဒီးဝဲလၢ “ယကိးထီၣ်ယွၤ လၢအဂ့ၤ ဘၣ်တၢ်စံးထီၣ်ပတြၢၤ,” ဒီး အဆၢဖိ ၆ န့ၣ်စံးဝဲ “တုၤယဘၣ်တၢ်ကိၢ်တၢ်ဂီၤဒီး, ယကိးထီၣ်ယွၤ” န့ၣ်လီၤ. တၢ်အိၣ်အသး, မၤအသးတဖၣ်လၢပဂီၢ် ကမ့ၢ်ဒၣ်ဝဲ ဒ်လဲၣ်ဂ့ၤဒ်လဲၣ်ဂ့ၤ, မ်ပကယူာ်ထီၣ်ထီပသး လၢတၢ်စံးထီၣ်ပတြၢၤ ဒီးဘူၣ်ထီၣ်ဘါထီၣ် ပကစၢ်ယွၤန့ၣ်တက့ၢ်. ယွၤန့ၣ်ကြၢးဝဲဒီး တၢ်စံးထီၣ်ပတြၢၤကိးမံၤန့ၣ်လီၤ.”