ဖဲ ၂၀၁၆ နံၣ်, ဖံဖံ ဝၣ်ဒၣ် ဒဲ(န)(ရှ) (Wanda Dench) ဖဲတယံာ်ဘၣ်ဒံးန့ၣ် မ့ၢ်လၢတသ့ၣ်ညါဝဲလၢ အလံၤခွါဆီတလဲ ကွဲၤဒီနၢ်အနီၣ်ဂံၢ်အဃိ ကွဲးဆှၢလီၤဘၣ်လံာ်ပရၢဖိဆူအလံၤခွါလၢ ကဟဲအီၣ်သကိး တၢ်စံးဘျုးစံးဖှိၣ်ဟါတၢ်အီၣ်အဂီၢ်န့ၣ်လီၤ. လၢတၢ်န့ၣ်အဃိ, တၢ်ကွဲမုာ်ဖိအံၤ လဲၤတုၤဆူ ပှၤအဂၤတဂၤ လၢအမ့ၢ် ကၠၣ်မဲ(လ) (Jamal) အအိၣ်န့ၣ်လီၤ. ကၠၣ်မဲ(လ) အတၢ်ရဲၣ်တၢ်ကျဲၤ တအိၣ်ဝဲနီတမံၤအဃိ, ဖဲအဝဲဒုးသ့ၣ်ညါအသးဝံၤ ကွဲးဆၢသံကွၢ်ဖံဖံ ဝၣ်ဒၣ် လၢအကဟဲ တၢ်စံးဘျုးစံးဖှိၣ်ဟါတၢ်အီၣ် ကသ့ဧါန့ၣ်ဒီး, ဖံဖံဝၣ်ဒၣ် စံးဆၢက့ၤလၢ “နဟဲသ့ဝဲသပှၢ်တၢၢ်” န့ၣ်လီၤ. ကၠၣ်မဲလ် လဲၤပာ်ဖှိၣ်အသး ဒီးဟံၣ်ဖိဃီဖိ တဒူၣ်အံၤဝံၤ, စးထီၣ်ဖဲန့ၣ် ကၠၣ်မဲလ်အဂီၢ် ကဲထီၣ်လုၢ်လၢ်တမံၤလၢ တနံၣ်တဘျီလဲၤပာ်ဖှိၣ်အီၣ်သကိး ဟါတၢ်အီၣ်န့ၣ်လီၤ. တၢ်ကွဲကမၣ်ဖိတမံၤအံၤ ကဲထီၣ် တနံၣ်တဘျီအတၢ်ဆိၣ်ဂ့ၤန့ၣ်လီၤ.
ဖံဖံဝၣ်ဒၣ် အတၢ်အဲၣ်သူၣ်ကညီၤသးကညီၤတၢ်, ကွဲမုာ်ဝဲ ပှၤကဟဲအီၣ်သကိးဟါတၢ်အီၣ်ဆူပှၤ လၢအတသ့ၣ်ညါတဂၤအံၤအဂ့ၢ်န့ၣ် ဒုးသ့ၣ်နီၣ်ထီၣ်က့ၤယၤ လၢကစၢ်ယ့ၣ်ရှူးဟ့ၣ်ဂံၢ်ဟ့ၣ်ဘါတၢ်အဂ့ၢ် လၢလံာ်လူၤကၣ်အပူၤန့ၣ်လီၤ. လူၤကၣ် ၁၄:၁ အပူၤပာ်ဖျါဝဲ တၢ်မၤဟါတၢ်အီၣ်တဘျီဖဲလၢ “ပှၤဖၤရံၤရှဲ အဒိၣ်” တဂၤအဟံၣ်န့ၣ်ဒီး, အဆၢဖိ ၇ စံးဘၣ်ပှၤ ကစၢ်ယ့ၣ်ရှူးထံၣ်ဝဲဒၣ် ပှၤလၢအဘၣ်တၢ်ကွဲမုာ်အီၤတဖၣ်, ဒီးပှၤသ့ၣ်တဖၣ်အံၤ ဃုထၢလီၢ်ဆ့ၣ်နီၤအဂ့ၤကတၢၢ်တဖၣ်န့ၣ်လီၤ. အဆၢဖိ ၁၂ အပူၤ ကစၢ်ယ့ၣ်ရှူးစံးဘၣ် ပှၤလၢအကိးအီၤတဂၤလၢ, တၢ်ကွဲမုာ်ပှၤလၢ ကမၤဆၢ, ဟ့ၣ်ဆၢက့ၤအီၤတၢ်န့ၣ် အခီပညီမ့ၢ် တၢ်ဆိၣ်ဂ့ၤအံၤ အိၣ်ဒီးအဒူၣ်အဆၢန့ၣ်လီၤ. လၢတၢ်အံၤအလီၢ်, အဆၢဖိ ၁၄ န့ၣ် ကစၢ်ယ့ၣ်ရှူးစံးဘၣ်အီၤလၢ မ့ၢ်ကွဲမုာ်ဝဲ ပှၤလၢအကဟ့ၣ်ဆၢ, မၤဂ့ၤဆၢအီၤတၢ် တအိၣ်နီတမံၤတဖၣ်န့ၣ်ဒီး တၢ်ဆိၣ်ဂ့ၤလၢကဒိးန့ၢ်ဝဲန့ၣ် ကအါန့ၢ်ဒံးတၢ်လၢအမၤခဲအံၤန့ၣ်လီၤ.
လၢဖံဖံဝၣ်ဒၣ် အတၢ်ကွဲမုာ် ကၠၣ်မဲ(လ) ဆူ အဟံၣ်ဖိဃီဖိ တၢ်စံးဘျုးစံးဖှိၣ် ဟါတၢ်အီၣ်အံၤန့ၣ် ကဲထီၣ်တၢ်ဆိၣ်ဂ့ၤ လၢအတမုၢ်လၢ်ဆိပာ်ဝဲ, တၢ်ကဲထီၣ်တံၤသကိးလီၤထူလီၤယိာ်, ဖဲလၢအဝၤသးဘိ လဲၤပူၤကွံာ်ဟီၣ်ခိၣ်ဝံၤ, လၢအဂီၢ်မ့ၢ်တၢ်န့ၢ်ဂံၢ်န့ၢ်ဘါဖးဒိၣ်န့ၣ်လီၤ. ဖဲပမၤဂ့ၤမၤစၢၤပှၤဂုၤပှၤဂၤန့ၣ်, တမ့ၢ် ပကဘၣ်ဆိကမိၣ်ဆိပာ်စၢၤလၢ ပကဒိးန့ၢ်က့ၤတၢ်တမံၤမံၤဘၣ်ဆၣ်, မ့ၢ်လၢကစၢ်ယွၤအတၢ်အဲၣ် အိၣ်ယွၤလီၤဝဲလၢပပူၤအဃိ, ပဒိးန့ၢ်ဘၣ်တၢ်ဆိၣ်ဂ့ၤ, ဒီးတၢ်န့ၢ်ဂံၢ်န့ၢ်ဘါဒိၣ်ဒိၣ်မုၢ်မုၢ်န့ၣ်လီၤ.
