ပှၤအိၣ်ဒီးတၢ်သးကညီၤ, လၢအမၤမုာ်သးမၤကလီၤတၢ် (volunteer) တဂၤအံၤ ဘၣ်တၢ်ကိးအီၤလၢ “မူခိၣ်ကလူးအကဟုကယာ်ဒီတဒၢတၢ်” မ့ၢ်လၢဂုာ်ကျဲးစၢၤမၤတၢ်တမံၤမံၤ ဒ်ပှၤဒူပှၤဃိၤအဃိန့ၣ်လီၤ. ဖဲကၠဲး(ခ) မဲၣ်နၣ် (Jake Manna) ပာ်ဖှိၣ်ထီၣ်အသးဒီးပှၤဂၤ လၢတၢ်လူၤကွၢ်ဃု ဖိသၣ်ပိာ်မုၣ်ဖိ လၢအသးအိၣ်ဒံးဒၣ်ထဲ ယဲၢ်နံၣ်, လၢအဟါမၣ်ဝဲတဂၤန့ၣ် တၢ်ကဘၣ်ကွၢ်ဃုအဆိအချ့အဆၢကတီၢ်, အဝဲဆီလီၤပာ်လီၤပီးလီတဖၣ်, ဒ်သိးကထုးန့ၢ်ပာ်ဖှိၣ် မုၢ်အဂံၢ်သဟီၣ်, ဒီးထုးထီၣ်လီဂံၢ်သဟီၣ်, ဖဲလၢ တၢ်မၤလီၢ်တတီၤန့ၣ်လီၤ. ပှၤလၢခိၣ်ဃၢၤသ့ၣ်တဖၣ် လူၤကွၢ်ဃုဝဲဖဲပှၤပာ်သိလ့ၣ်ဒၢး ဒီးကရၢၢ်ပူၤ အဆၢကတီၢ်, မဲၣ်နၣ် လဲၤပိာ်ကျဲလၢအဆှၢအီၤဆူသ့ၣ်ပှၢ်ပူၤ, ဒီးသတူၢ်ကလာ်န့ၣ် ထံၣ်ဝဲဖိသၣ်မုၢ်ဖိန့ၣ် လီၤဘျၢလၢ လီၢ်ကဝီၤကပံာ်ကွံပူၤ တုၤလၢအယီၢ်ဒ့န့ၣ်လီၤ. လၢတၢ်ပလီၢ်သးအပူၤ အဝဲဂုာ်ဟးခီတၢ်လၢ ကပံာ်လၢအစဲဘူးအကျါ ဒ်သိးကထုးထီၣ်က့ၤပိာ်မုၣ်ဖိ လၢအဘၣ်ကီဘၣ်ခဲတဂၤန့ၣ်လီၤ. ဖိသၣ်မုၣ်အံၤ ဘၣ်အၢလၢကပံာ်ကနိဘၣ်ဆၣ် တၢ်ဘၣ်ဒိဘၣ်ထံးတအိၣ်ဘၣ်, ဒီးဘၣ်တၢ်ဟဲက့ၤစိာ်ဝဲဆူအမိၢ်အအိၣ် လၢအစံးဘျုးစံးဖှိၣ်အီၤန့ၣ်လီၤ.

ဒ်ဖိသၣ်ပိာ်မုၣ်ဖိအသိးန့ၣ်, စီၤဒၤဝံးစ့ၢ်ကီး လဲၤခီဖျိဘၣ်ဝဲ တၢ်မၤပူၤဖျဲးအီၤန့ၣ်လီၤ. စံး ၄၀:၁ အပူၤ ပှၤကွဲးထါ “အိၣ်ခိးကွၢ်လၢ်ဝဲ လၢတၢ်သူၣ်စူၤသးစူၤ” ဒ်သိးယွၤကစံးဆၢက့ၤ အတၢ်ကိးပသူ, ဃ့ကညးတၢ် လၢသူၣ်ဒီဖျၢၣ်သးဒီဖျၢၣ် လၢယွၤအတၢ်သးကညီၤအဂီၢ်န့ၣ်လီၤ. ဒီးကစၢ်ယွၤစံးဆၢအီၤန့ၣ်လီၤ. အဆၢဖိ ၂ ပာ်ဖျါဝဲ လၢတၢ်မၤစၢၤအဂီၢ် ကစၢ်ယွၤဒိကနၣ်အတၢ်ဃ့ကညး, ဒီးစံးဆၢဝဲ ခီဖျိထုးထီၣ်အီၤလၢကပံာ်ပှဲာ်, ဒီးကပံာ်ယိာ် လၢအတၢ်အိၣ်အသးအပူၤန့ၣ်လီၤ. ဒီးဟ့ၣ်လီၤခီၣ်တဃာ်အဂၢၢ်အကျၢၤလၢ စီၤဒၤဝံး အတၢ် အိၣ်မူအဂီၢ်န့ၣ်လီၤ. အဆၢဖိ ၃-၄ အပူၤစံးဝဲ တၢ်မၤပူၤဖျဲးလၢအတၢ်အိၣ်မူကပံာ်ယိာ်အပူၤန့ၣ် မၤဆူၣ်ထီၣ် စီၤဒၤဝံးအသး ဒ်သိးကသးဝံၣ်ထါလၢအစံးထီၣ်ပတြၢၤယွၤ, ဒီးဒုးကဲထီၣ်ယွၤလၢ အတၢ်သန့ၤသးအလီၢ် လၢခါဆူညါအတၢ်အိၣ်သးသ့ၣ်တဖၣ်အဂီၢ်, ဒီးဟ့ၣ်ခီဟ့ၣ်နီၤအတၢ်လဲၤခီဖျိ ဆူပှၤဂၤအအိၣ်န့ၣ်လီၤ.

လၢပသးသမူအပူၤ ပမ့ၢ်ကွၢ်ဆၢၣ်မဲာ်တၢ်တၤပှၤတဖၣ်, ဒ်အမ့ၢ် ကျိၣ်စ့အတၢ်ဂ့ၢ်ကီ, နီၣ်ဒီမိၤဝၤ အတၢ်သဘံၣ်ဘူၣ်, ပသးမ့ၢ်ကလၢၢ်ဘၣ်တၢ်တလၢတပှဲၤအကတီၢ်, မ်ပကကိးသတြီၤထီၣ်ဆူယွၤ ဒီးခိးကွၢ် အတၢ်စံးဆၢန့ၣ်တက့ၢ်. ကစၢ်ယွၤအိၣ်ဖဲန့ၣ်. အိၣ်ကတဲာ်ကတီၤပာ်အသးလၢ ကမၤစၢၤပှၤဖဲလၢပလိၣ်ဘၣ် တၢ်အဆၢကတီၢ်, ဒီးကဟ့ၣ်ပှၤ တၢ်လီၢ်လၢပကဆၢထၢၣ်ဂၢၢ်ကျၢၤအဂီၢ်န့ၣ်လီၤ.