ပှၤဟဲစိာ်ဆှၢတၢ်အီၣ် လၢနမၤလိာ်ဟဲတုၤမ့ၢ်စဲၤခံဧါ. နကဟ့ၣ်အီၤလၢဆၣ်တဖျၢၣ်အပတီၢ်အဂီၢ် နစူးကါ နကွဲၤဒီနၢ်သ့န့ၣ်လီၤ. မ့ၢ်ကျးကစၢ် မၤဘၣ်နၤအၢအၢသီသီဧါ. နကွဲးဖျါထီၣ် နတၢ်ထံၣ်လၢအဂ့ၢ်သ့ဝဲလီၤ. ဖဲစမး ကွဲဒီနၢ် မၤစၢၤပှၤလၢပကပှ့ၤတၢ်, မၤစၢၤပှၤလၢပကအိၣ်ဒီးတံၤသကိး, ဒီးအါန့ၢ်အန့ၣ် ဟ့ၣ်စ့ၢ်ကီးပှၤ တၢ်စိတၢ်ကမီၤလၢ ပကပာ်ပနီၣ် ပှၤတဂၤဘၣ်တဂၤအပတီၢ် ဒ်သိးပှၤအါဂၤကသ့ၣ်ညါအဂီၢ်န့ၣ်လီၤ. ဒီးတၢ်မၤအံၤ ကဲထီၣ်တၢ်ဂ့ၢ်ကီတမံၤသ့ဝဲဒၣ်န့ၣ်လီၤ.

မ့ၢ်လၢ တၢ်စံၣ်ညီၣ်တဲာ်ပှၤဂၤ လၢပတသ့ၣ်ညါတၢ်အဂ့ၢ်အခၢးလီၤတံၢ်လီၤဆဲးအပူၤအဃိ တၢ်ပာ်ပနီၣ် တၢ်အပတီၢ်လၢပှၤဂၤဒ်သိးအံၤန့ၣ် ကဲထီၣ်တၢ်ဂ့ၢ်ကီန့ၣ်လီၤ. တၢ်အိၣ်အသးမၤအသးတဖၣ်လၢပၢၤဝဲတန့ၢ် အဃိ ပှၤဆှၢတၢ်အီၣ်ဘၣ်တၢ်ပာ်ပနီၣ်အီၤလၢ တမၤတၢ်ဂ့ၤဂ့ၤဘၣ်န့ၣ်လီၤ. ခီဖျိလၢဘၣ်ကွၢ်အဖိဆံး, လၢအဆါတဂၤ ဒီနၤအဃိ ကျးကစၢ်န့ၣ် ဘၣ်တၢ်ပာ်ဖျါအဂ့ၢ် လၢအတဂ့ၤန့ၣ်လီၤ. တၢ်ပာ်ပနီၣ်ပှၤဂၤ အပတီၢ်လၢ တတီတလိၤဒီးအဝဲသ့ၣ်အဂီၢ်ဒ်သိးအံၤန့ၣ် မ့ၢ်ပကဟးဆှဲးဘၣ်ဒ်လဲၣ်.

ခီဖျိလၢတၢ်ကွၢ်ဒိ ပကစၢ်ယွၤအသကဲာ်ပဝးန့ၣ်လီၤ. လၢလံာ် ၂ မိၤရှ့ ၃၄:၆-၇ အပူၤ, ကစၢ်ယွၤပာ်ဖျါ ထီၣ်အသး ဒ်ကစၢ်ယွၤလၢ ‘အသးကညီၤတၢ်, ဒီးအဘျုးအဖှိၣ်အါဝဲ’ တဂၤ- အခီပညီမ့ၢ် တၢ်အိၣ်အသး, မၤအသး မ့ၢ်တအိၣ်လီၤလီၤဆီဆီဘၣ်န့ၣ်ဒီး ကစၢ်ယွၤတစံၣ်ညီၣ် ပတၢ်လီၤတူာ်လီၤကာ်ဘၣ်န့ၣ်လီၤ. ‘သးထီၣ်ကီ’ အခီပညီန့ၣ် ကစၢ်ယွၤတပာ်ပနီၣ် ပဂ့ၢ်ပကျိၤလၢအတဂ့ၤ ခီဖျိပတၢ်လဲၤခီဖျိအၢအၢသီသီ တမံၤမံၤအဃိဘၣ်. ‘လၢပှဲၤဒီး တၢ်အဲၣ်တၢ်ကွံ’ အခီပညီန့ၣ် လၢပတၢ်ဂ့ၤအဂီၢ် ယွၤဘှီလိၤဃၣ်လိၤပှၤန့ၣ် တမ့ၢ်လၢတၢ်ကမၤဆၢမၤကၣ်တၢ်အဂီၢ်ဘၣ်. ဒီး “တၢ်ပျၢ်ပတၢ်ဒဲးဘး” အခီပညီစံးတၢ်န့ၣ် ပတၢ်အိၣ်မူန့ၣ် တမ့ၢ်လၢ တၢ်ကဘၣ်ပာ်ပနီၣ် ဆၣ်တဖျၢၣ်အပတီၢ်ဘၣ်န့ၣ်လီၤ. ဒ် မး ၆:၃၃ ပာ်ဖျါဝဲအသိး လၢပဂီၢ် တၢ်ဂ့ၢ်အခီၣ်ထံးမ့ၢ် ကစၢ်ယွၤ အက့ၢ်အဂီၤသကဲာ်ပဝးအဃိ, ပကဟးဆှဲး တၢ်စူးကါ စမးကွဲၤဒီနၢ် လၢတၢ်ကတိၤအဆူၣ်အကိၤ, ဒ်ပကစၢ်မၤဝဲအသိး ပကစူးကါပကွဲၤဒီနၢ်, လၢတၢ်ဘၣ်ယွၤအသးန့ၣ်လီၤ.

လၢအီၣ်လဲ ‘online’ စိၤဆၢကတီၢ်အံၤ, ပဟ့ၣ်တၢ်ကတိၤထီဒါတၢ် ဆူၣ်ဆူၣ်ကိၤကိၤသ့ဝဲဒၣ် န့ၣ်လီၤ. တၢ်လၢမုၢ်တနံၤအံၤန့ၣ်, မ်ယွၤအသးစီဆှံ ကဟ့ၣ်ဂံၢ်ဟ့ၣ်ဘါပှၤလၢ ပကဟဲစိာ်ပာ်ဖျါထီၣ် တၢ်သးကညီၤတဆံးတက့ၢ်ဖိအဂီၢ်န့ၣ်တက့ၢ်.