မုၢ်တဂီၤစးထီၣ်အသးန့ၣ် လီၤဂာ်ဒ်တၢ်ဃ့ၢ်ပြၢန့ၣ်လီၤ. ဂဲၤဆၢထၢၣ်လၢလီၢ်မံခိၣ်ဝံၤ, စးထီၣ်မုၢ်တနံၤ အတၢ်ဖံးတၢ်မၤတဖၣ်န့ၣ်လီၤ. ယဆှၢယဖိတဖၣ်ဆူကၠိ, ဝံၤလံ. ယလဲၤဆူတၢ်မၤ, ဝံၤလံ. တၢ်လၢ “ယကဘၣ်မၤအစရီ” လၢအဘၣ်ထွဲဒီးနီၢ်တဂၤအတၢ်မၤ, ဒီးတၢ်ဖံးတၢ်မၤမူဒါ လၢယကဘၣ်မၤတဖၣ် ယကွဲးဖှိၣ်လီၤတပူၤဃီန့ၣ် လီၤဂာ်ဒ်မူခိၣ်ဖီကစၢၢ်လီၤပှီၢ်န့ၣ်လီၤ.
“တၢ်မၤနီၣ်ဂံၢ် ၁၃- တၢ်ဖးဘှီဘၣ်က့ၤဖှိၣ်ရၤတၢ်ကွဲး. ၁၄- မၤဆှဲမၤဆှီတၢ်မၤလီၢ်, ၁၅- တၢ်တိာ်လီၤ ကျဲၤလီၤကျဲကူၣ်နၢၤ, ၁၆- ကွဲးလီၤ တၢ်ဂ့ၢ်တၢ်ကျိၤ လၢခီၣ်ဖၠူထၢၣ်ပူၤ, ၁၇- မၤကဆှဲကဆှီ ဟံၣ်ဟီၣ်ခိၣ်လာ်ဒၢး, ၁၈ – ဃ့ထုကဖၣ်တၢ်” န့ၣ်လီၤ.
ယကွဲးလီၤတၢ်တုၤနီၣ်ဂံၢ် ၁၈ န့ၣ်ဒီး, ယသ့ၣ်နီၣ်ထီၣ်လၢ ယလိၣ်ဘၣ်ကစၢ်ယွၤအတၢ်မၤစၢၤန့ၣ်လီၤ. ဘၣ်ဆၣ်, ယဂုာ်ကျဲးစၢးဒုးအိၣ်ထီၣ်ယဂံၢ်အသဟီၣ် လၢယကစၢ်ဒၣ်ယဲ, ဒီးယလဲၤတၢ်မၤတၢ်ထဲဒၣ် ယၤတဂၤဧိၤလီၤန့ၣ် ယသ့ၣ်ညါလီၤက့ၤယသးဖဲလၢအကတီၢ်အံၤန့ၣ်လီၤ.
ကစၢ်ယ့ၣ်ရှူးသ့ၣ်ညါဝဲဒၣ်န့ၣ်လီၤ. အဝဲသ့ၣ်ညါ ပမုၢ်နံၤမုၢ်သီတဖၣ် ကလီၤပှီၢ်ဟးဂီၤဝဲလၢ ပီၣ်လဲၣ်လၢအပှဲၤဒီး တၢ်ဂ့ၢ်အကါဒိၣ်, ဒီးအဆၢတတဲာ်နီတစုဘၣ်န့ၣ်လီၤ. လၢတၢ်န့ၣ်အဃိ, မး ၆:၃၃ န့ၣ် ကစၢ်ယ့ၣ်ရှူးမၤလိာ်ပှၤလၢ “ဃုဆိယွၤအဘီအမုၢ် ဒီးအတၢ်တီတၢ်လိၤတက့ၢ်. ဒီးတၢ်ကပာ်ဖှိၣ်တၢ်န့ၣ်တဖၣ်ခဲလၢာ် လၢသုလီၤ” န့ၣ်လီၤ.
ပနၢ်ဟူဘၣ် ပကစၢ်ယ့ၣ်ရှူးအတၢ်ကတိၤတဖၣ် ဒ်သိးတၢ်မၤလိာ်န့ၣ် မ့ၢ်တၢ်လၢအကြၢးဝဲဘၣ်ဝဲ န့ၣ်လီၤ. ဒီးတၢ်အံၤ မ့ၢ်ဝဲတီဝဲ ဘၣ်ဆၣ်, အါန့ၢ်အန့ၣ်မ့ၢ်စ့ၢ်ကီး – တၢ်ကွဲမုာ်တမံၤန့ၣ်လီၤ. မး ၆:၂၅-၃၂ အပူၤ, ကစၢ်ယ့ၣ်ရှူးကွဲမုာ်ပှၤ လၢဟီၣ်ခိၣ်အတၢ်ဘၣ်ယိၣ်ဘၣ်ဘီတဖၣ်အလီၢ်န့ၣ်, ပကဆီတလဲအိၣ်မူ တနံၤဘၣ်တနံၤ လၢတၢ်နာ်သန့ၤသးလၢကစၢ်ယွၤ, ဒီးတချုးပသ့ၣ်နီၣ်ထီၣ်က့ၤ တၢ်လၢပကထံၣ် တၢ်အိၣ်မူအိၣ်ဂဲၤ ဒ်အဝဲအတၢ်ထံၣ်အသိး, ဒီးလၢပတၢ်ကွဲးနီၣ်စရီအပူၤ ပမ့ၢ်တုၤဆူနီၣ်ဂံၢ် ၁၈ ဒၣ်လဲာ် ခီဖျိလၢအဘျုးအဖှိၣ်န့ၣ်, ကစၢ်ယွၤကမၤစၢၤပှၤ လၢပမုၢ်နံၤမုၢ်သီကိးနံၤဒဲးအပူၤန့ၣ်လီၤ.
