ကံၣ်စိၣ်ဘိၣ် (Kizombo) ဆ့ၣ်နီၤကွၢ်မ့ၣ်အူပူၣ်, ဒီးဆိကမိၣ်ဝဲ တၢ်သံကွၢ်ထံထံဆးဆး “ယတၢ်အိၣ်မူ အပူၤ ယမၤဝံၤတၢ်ဂ့ၤဂ့ၤဘၣ်ဘၣ် မ့ၢ်အိၣ်တမံၤမံၤဧါ,” လၢအတၢ်အိၣ်မူအဂီၢ် မ့ၢ်တၢ်သံကွၢ်အကါဒိၣ် တထံၣ်န့ၣ်လီၤ. တၢ်စံးဆၢဟဲထီၣ်ချ့မးလီၤ. တၢ်လီၤတိၢ်လီၤဆီတအိၣ်တၢ်နီတမံၤဘၣ်. ဟဲက့ၤကဒါဆူ တၢ်လီၢ်လၢအအိၣ်ဖျဲၣ်ထီၣ်ဝဲ, ဒီးနုာ်လီၤသိၣ်လိတၢ်လၢကၠိ, ကၠိလၢအပၢ်ဒုးအိၣ်ထီၣ်လၢပှၢ်မုၢ်ကနၢ သ့ၣ်ပှၢ်ယိာ်အပူၤန့ၣ်လီၤ. အဝဲဂုာ်ကျဲးစၢးကွဲး အပၢ်အဂ့ၢ်အကျိၤလၢအဂံၢ်သဟီၣ်ဆူၣ်, လၢအိၣ်မူအိၣ်ဂဲၤ ဒီးလဲၤခီဖျိဘၣ် ထံလီၢ်ကီၢ်ပူၤ တၢ်ဒုးတၢ်ယၤခံဘျီန့ၣ်လီၤ. အဝဲဆိကမိၣ်ဘၣ်ဝဲလၢ “ယကဂုာ်ကျဲးစၢးမၤ တၢ်မၤဒ်သိးအံၤခဲလၢာ်အဂီၢ် ယမ့ၢ်မတၤလဲၣ်” န့ၣ်လီၤ.

ကံၣ်စိၣ်ဘိၣ် အသးဒ့ဒီတၢ်န့ၣ် ဖျါလီၤဂာ်ဒီးစီၤမိၤရှ့န့ၣ်လီၤ. ၂ မိၤ ၃:၁၀ အပူၤ ယွၤဟ့ၣ်လီၤစီၤမိၤရှ့ တၢ်ဖံးတၢ်မၤတမံၤ- “ယကမၢလီၤနၤဆူဖၤရိၤအအိၣ်, ဒ်သိးနကဒုးဟးထီၣ်, ယပှၤဂီၢ်မုၢ်ပှၤအံၣ်စရ့လးဖိ, လၢအဲၤကူပတူးအပူၤ” န့ၣ်လီၤ. အဆၢဖိ ၁၁ န့ၣ် စီၤမိၤရှ့ စံးဆၢက့ၤ “ယဲဒၣ်အံၤ ယမ့ၢ်မတၤလဲၣ်” န့ၣ်လီၤ.

စီၤမိၤရှ့သံကွၢ်က့ၤတၢ်, လၢအတဂၢၢ်တကျၢၤအံၤဝံၤန့ၣ်, ၂မိၤ ၄:၂ ပာ်ဖျါဝဲ “ဒီးယွၤစံးဘၣ်အီၤ, တၢ်အိၣ်လၢနစုပူၤန့ၣ်မ့ၢ်မနုၤတမံၤလဲၣ်. ဒီးစံးဝဲဒၣ်, မ့ၢ်နီၣ်ထိးဘိလီၤ” န့ၣ်လီၤ. အဆၢဖိ ၃, ၄ ပာ်ဖျါဝဲလၢ ကစၢ်ယွၤစံးဘၣ်အီၤအသိး, စီၤမိၤရှ့ တ့ၢ်လီၤနီၣ်ထိးဘိ လၢဟီၣ်ခိၣ်လိၤ, ဒီးကဲထီၣ်ဝဲလၢဂုာ်တဘိန့ၣ်လီၤ. လၢတၢ်သးတဆူၣ်အပူၤ စီၤမိၤရှ့ဖီၣ်ဂုၢ်အမဲၢ်, ဒီးကဲထီၣ်က့ၤ နီၣ်ထိးဘိန့ၣ်လီၤ. ခီဖျိလၢယွၤအစိအကမီၤန့ၣ်ဒီး, စီၤမိၤရှ့လဲၤကွၢ်ဆၢၣ်မဲာ် ဖၤရိၤသ့ဝဲဒၣ်န့ၣ်လီၤ. ပမ့ၢ်စံးကတိၤလိၤလိၤဘျၢဘျၢန့ၣ်ဒီး, စီၤမိၤရှ့အစုပူၤန့ၣ်အိၣ်ဒီး အဲၤကူပတူးအကစၢ်အါထံၣ်အကျါတထံၣ် လၢအမ့ၢ်ဂုၢ်တဘိန့ၣ်လီၤ. အဲၤကူပတူးအကစၢ်တဖၣ် မၤပျံၤမၤဖုးဝဲ ကစၢ်ယွၤနီၢ်နီၢ်တဂၤတသ့ဘၣ်န့ၣ်လီၤ.

ကံၣ်စိၣ်ဘိၣ် ဆိကမိၣ်ထီၣ် စီၤမိၤရှ့အဂ့ၢ်ဒီး အသးပူၤကလၢၢ်ဘၣ်ဝဲ ကစၢ်ယွၤအတၢ်စံးဆၢ, လၢ “တၢ်လၢအအိၣ်ဒီးနၤန့ၣ် မ့ၢ်ယၤ ဒီးယကလုၢ်ကထါန့ၣ်လီၤ”. အဝဲဆိကမိၣ်ထီၣ်တၢ်လၢ အတံၤသကိး တဖၣ်စ့ၢ်ကီးဟ့ၣ်ဂံၢ်ဟ့ၣ်ဘါအီၤလၢ ကကွဲးအပၢ်အဂ့ၢ်အကျိၤ, ဒ်သိးပှၤဂုၤပှၤဂၤကမၤလိန့ၢ် ကစၢ်ယွၤ အစိကမီၤခီဖျိလၢအတၢ်အိၣ်မူန့ၣ်လီၤ. အဝဲတမ့ၢ် ပှၤလၢအဘၣ်အိၣ်ထဲဒၣ်တဂၤဧိၤဘၣ်န့ၣ်လီၤ.

လၢပကစၢ်ဒၣ်ဝဲ, ပဂုာ်ကျဲးစၢးအဂ့ၤကတၢၢ်တဖၣ်န့ၣ် တမ့ၢ်တၢ်အလၢအပှဲၤဘၣ်. ဘၣ်ဆၣ်, ပမၤဘၣ် ကစၢ်ယွၤ, ဒီးစံးဘၣ်ပှၤလၢ ၂မိၤ ၃:၁၂ အပူၤ “ယကအိၣ်ဒီးနၤ” တဂၤအံၤ အတၢ်မၤန့ၣ်လီၤ.