တၢ်ကွဲးဖှိၣ်ရၤ “မ့ၢ်ယဖိခွါသ့ၣ်ညါနၤဧါ,” လၢအသဟီၣ်ဆူၣ်တယုၢ်အပူၤ ပှၤကွဲးတၢ်လိၣ်ခိၣ်လိၣ်ကွဲ အတၢ်ကစီၣ် ကၠီနသၣ်ခၠး(စ) ကွဲးဖျါထီၣ် အဂ့ၢ်အကျိၤ လၢအဘၣ်ဂုာ်ဂဲၤလိာ်ဝဲဒီး ခဲစၢၣ်တၢ်ဆါ, ဒီးဆၢမုၢ်လၢ်ဝဲ လၢပှၤဂုၤပှၤဂၤ ကကဟုကယာ်အမါဒီး အဖိခွါဆံးန့ၣ်လီၤ. ပှၤသၢဆံလွံၢ်နံၣ်တဂၤ တချုးသံဃုလါအကတီၢ်န့ၣ် ကွဲးတၢ်ဂ့ၢ်အံၤန့ၣ်လီၤ. ခၠး(စ) မ့ၢ် ပှၤစူၢ်က့ၤနာ်က့ၤကစၢ်ယ့ၣ်ရှူးခရံာ် ဒီးအပၢ်သံသဒၣ်အီၤ ဖဲအမ့ၢ်ပှၤသးစၢ်ဒိၣ်တုာ်ခိၣ်ပှဲၤသီတဂၤ အကတီၢ်န့ၣ်လီၤ. အဝဲဟ့ၣ်နီၤလီၤ လံာ်စီဆှံအဆၢ ( ၂ မိၤ ၂၂:၂၂, ယရှါ ၁:၁၇, ယၤ ၁:၁၇) လၢအပာ်ဖျါ တၢ်ကဟုကယာ် မုၣ်ကမဲဒီးဖိၣ်ဃဲ အဂ့ၢ်န့ၣ်လီၤ. ခၠး(စ) ကွဲးဝဲလိၤလိၤဆူ အတံၤသကိးတဖၣ်အအိၣ် “ဖဲယထံၣ်ဘၣ်သုလၢ မူခိၣ်ဘီမုၢ်န့ၣ်, ယအိၣ်ဒီးတၢ်သံကွၢ်ထဲတမံၤဧီၤ လၢယကသံကွၢ်သု- မ့ၢ်သုမၤဂ့ၤတၢ်လၢ ယဖိခွါဒီးယမါအလိၤဧါ… မ့ၢ်ယဖိခွါသ့ၣ်ညါနၤဧါ” န့ၣ်လီၤ.
၂ ရှမူၤ ၉:၁ အပူၤန့ၣ် စီၤပၤစီၤဒၤဝံး ဆိကမိၣ်ကွၢ်ဝဲလၢ မ့ၢ် “ပှၤအိၣ်လီၤတဲာ်ဒံးလၢစီၤစီလူးအပှၤ ဟံၣ်ဖိအကျါ, ဒ်သိးယကမၤအီၤလၢ တၢ်အဘျုးအဖှိၣ် လၢစီၤယိၤနၤသၣ်အဃိတဂၤဂၤန့ၣ်ဧါ” န့ၣ်လီၤ. အဆၢဖိ ၃ ပာ်ဖျါဝဲ စီၤမဖံဘိၤရှ့း မ့ၢ်စီၤယိၤနသၣ်အဖိခွါလၢ “အခီၣ်ဟးဂီၤ,” ခီဖျိလၢတၢ်ဘၣ်ဒိဘၣ်ထံး သတုၢ်ကလာ်တဂၤအံၤ (ကွၢ် ၄:၄) ဘၣ်တၢ်ဟဲစိာ်အီၤဆူ စီၤဒၤဝံအအိၣ်န့ၣ်လီၤ. ၂ရှမူၤ ၉:၇ အပူၤ စီၤဒၤဝံးစံးဘၣ်အီၤ “ယကမၤနၤလၢတၢ်ဘျုးတၢ်ဖှိၣ် လၢနပၢ်စီၤယိၤနၤသၣ် အဃိသပှၢ်တၢၢ်ဒီး ယကဟ့ၣ် က့ၤနၤလၢ နပၢ် စီၤစီလူးအဟီၣ်ခိၣ်ခဲလၢာ်, ဒီးနဘၣ်အီၣ်တၢ်အီတၢ်လၢ ယစီၢ်နီၤခိၣ်တထံၣ်ဃီလီၤ” န့ၣ်လီၤ. စီၤဒၤဝံး ဒုးနဲၣ်ဖျါထီၣ်တၢ်အဲၣ်တၢ်ကဟုကယာ်လၢ စီၤမဖံဘိၤရှးအလိၤ, အကတီၢ်ဖဲလၢ အဝဲသ့ၣ်ညါအီၤနီၢ်နီၢ် (ကွၢ် ၁၉:၂၄-၃၀)န့ၣ်လီၤ.
ယိၤ ၁၃:၃၄ အပူၤ ကစၢ်ယ့ၣ်ရှူးမၤလိာ်ပှၤလၢ ပကအဲၣ်ပှၤဂုၤပှၤဂၤ ဒ်အဝဲအဲၣ်ပှၤအသိးန့ၣ်လီၤ. ဒ်အဝဲမၤတၢ်လၢပပူၤ, ဒီးမၤတၢ်ခီဖျိလၢပှၤအဃိ, မ်ပကသ့ၣ်ညါပှၤဂုၤပှၤဂၤနီၢ်နီၢ်, ဒီးအဲၣ်အဝဲသ့ၣ် ဂ့ၤဂ့ၤဘၣ်ဘၣ်န့ၣ်တက့ၢ်.
