ဖဲ ၂၀၀၁ နံၣ် ဖိသၣ်ဖိလၢ အမံၤမ့ၢ် ခရံးစတိၣ်ဖၢၣ် ဒၢးဖလ့ၣ် ( Christopher Duffley )အိၣ်ဖျဲၣ်ထီၣ် တဘၣ်ဆၢဘၣ်ကတီၢ် ဒီးမူဝဲအဃိ ကဲထီၣ်တၢ်ကမၢကမၣ်လၢ ကသံၣ်သရၣ်တဖၣ်အဂီၢ်န့ၣ်လီၤ. ဖဲအသးပှဲၤထီၣ်ယဲၢ်လါ, အဝဲဘၣ်အိၣ်လၢတၢ်ကဟုကယာ်လုၢ်ဖိ အတၢ်ရဲၣ်တၢ်ကျဲၤအပူၤ, တုၤအဘၣ်တၢ်လုၢ်ဖိအီၤလၢ အမုၢ်ဂၢ် အဟံၣ်ဖိဃီဖိတစုန့ၣ်လီၤ. ခရံးစတိၣ်ဖၢၣ်ဖိ, အသးအိၣ်လွံၢ်နံၣ်ဖိအံၤ အမဲာ်ချံတထံၣ်တၢ်, ဒီးမ့ၢ်ဖိသၣ် လၢအိၣ်ဒီး တၢ်အိၣ်သယုၢ်သညိသးအတၢ်ဆါ (Autism) ဘၣ်ဆၣ် အကလုၢ်အထီၣ်အလီၤဂ့ၤဝဲလိၤဝဲ ဒၣ်န့ၣ် အသရၣ်မုၣ်သ့ၣ်ညါဝဲဂ့ၤဂ့ၤန့ၣ်လီၤ. ဃုနံၣ်လဲၤပူၤကွံာ်ဝံၤန့ၣ်, ခရံးစတိဖၢၣ် ဆၢထၢၣ်လၢ တၢ်ဘါသရိာ်ပျဲၢ်စီၤခိၣ်, ဒီးသးဝံၣ်ဝဲ “အိးထီၣ်ယသး အမဲာ်ချံ” တၢ်သးဝံၣ်န့ၣ်လီၤ. တၢ်သးဝံၣ် အတၢ်ဂီၤမူအံၤ ပှၤကွၢ်အိၣ်ဝဲ အကကွဲၢ်အါမးန့ၣ်လီၤ. ဖဲ ၂၀၂၀ နံၣ်, ခရံးစတိၣ်ဖၢၣ် ဟ့ၣ်ခီဟ့ၣ်နီၤ အတၢ်ပညိၣ်တဖၣ် လၢအကမ့ၢ်ဝဲ ပှၤကမၤဂ့ၤမၤစၢၤ ပှၤနီၢ်ခိက့ၢ်ဂီၤဂံၢ်စၢ်တဖၣ်အဂီၢ်န့ၣ်လီၤ. အဝဲအိးထီၣ် အသးအမဲာ်ချံလၢ ကစၢ်ယွၤအတၢ်ရဲၣ်တၢ်ကျဲၤအပူၤအဃိ တၢ်လၢကကဲထီၣ်လိၣ်ထီၣ် အသးသ့ဝဲတဖၣ် အိၣ်ဝဲအါမးန့ၣ် အဝဲမ့ၢ်တၢ်အုၣ်အသးလၢပှၤဂၤအဂီၢ်န့ၣ်လီၤ.
အ့း ၁:၁၅-၁၆ အပူၤန့ၣ် ပှၤတၢ်မၢဖိစီၤပီလူး မၤလိာ်အ့းဖ့းစူးတၢ်အိၣ်ဖှိၣ်ဖိတဖၣ်လၢ ကအိၣ်ဒီး တၢ်စူၢ်တၢ်နာ်ဒူဒူဃိၤဃိၤန့ၣ်လီၤ. အဆၢဖိ ၁၇ န့ၣ် အဝဲဃ့တၢ်လၢကစၢ်ယွၤ ဒ်သိးအကဟ့ၣ်လီၤ အဝဲသ့ၣ် “တၢ်ကူၣ်သ့ကူၣ်ဘၣ် ဒီးတၢ်လီၣ်ဖျါလၢ ကသ့ၣ်ညါထံအီၤ” အဂီၢ်န့ၣ်လီၤ. အဆၢဖိ ၁၈ အပူၤန့ၣ် အဝဲဃ့ထုကဖၣ်လၢ အဝဲသ့ၣ် “အသးအမဲာ်ကကပီၤထီၣ်” မ့တမ့ၢ် ကအိးထီၣ်, ဒ်သိးအဝဲသ့ၣ် ကနၢ်ပၢၢ်တၢ်မုၢ်လၢ်, ဒီးတၢ်န့ၢ်သါ လၢကစၢ်ယွၤအၢၣ်လီၤအပှၤဂီၢ်မုၢ်န့ၣ်လီၤ.
အဆၢဖိ ၁၉-၂၃ ပာ်ဖျါဝဲ ပဃ့ကစၢ်ယွၤလၢကလီၣ်ဖျါထီၣ်အသး, ဒ်သိးပကသ့ၣ်ညါ အါထီၣ်အီၤ, ဒီးကိးသတြီၤဘိးဘၣ်သ့ၣ်ညါအမံၤ, အစိကမီၤ, ဒီးအတၢ်န့ၢ်စိန့ၢ်ကမီၤ လၢတၢ်စူၢ်တၢ်နာ် အဂၢၢ်အကျၢၤန့ၣ်လီၤ. ဖဲပဃ့လၢ ယွၤကအိးထီၣ်န့ၣ် ပသးအမဲာ်ချံ ကိးဆၢကတီၢ် ဒီးမူလၢ တၢ်စူၢ်က့ၤနာ်က့ၤ ကစၢ်ယ့ၣ်ရှူးဒီး တၢ်အဲၣ်ယွၤအပှၤဂီၢ်မုၢ်ခဲလၢာ်အဂီၢ်န့ၣ် ပမ့ၢ်တၢ်အုၣ်သးတမံၤ လၢ တၢ်လၢယွၤဒုးကဲထီၣ်သ့တဖၣ် အိၣ်ဝဲအါမးအဂ့ၢ်န့ၣ်လီၤ.
