တံၤသကိး လၢယအဲၣ်ဘၣ်အီၤတဂၤ လဲၤပူၤကွံာ်ဟီၣ်ခိၣ်ဝံၤ လၢစှၤနွံအတီၢ်ပူၤန့ၣ်, ယကတိၤဘၣ်တၢ်ဒီး အမိၢ်န့ၣ်လီၤ. ယကသံကွၢ်အီၤ, “လၢအဂီၢ် တၢ်အိၣ်အသးမ့ၢ်အိၣ်ဒ်လဲၣ်” အဂီၢ် ယသးပူၤထုးဃၢယၤ န့ၣ်လီၤ. ဖဲလၢအသူၣ်အုးသးအုးအဆၢကတီၢ်, တၢ်သံကွၢ်ဒ်သိးအံၤန့ၣ် တမ့ၢ်တၢ်လၢပကြၢးသံကွၢ်တၢ် အဃိန့ၣ်လီၤ. ဘၣ်ဆၣ် ယသံကွၢ်အီၤထဲဒၣ် မ့ၢ်အကွၢ်ဆၢၣ်မဲာ်တၢ်အံၤဒ်လဲၣ်န့ၣ်လီၤ. မိၢ်တဂၤအံၤ စံးဆၢက့ၤယၤ, “ကနၣ်, ယဃုထၢယဲ တၢ်သးခု” န့ၣ်လီၤ.
အတၢ်ကတိၤလၢမုၢ်တနံၤအံၤန့ၣ် ကဲဘျုးလၢယဂီၢ် မ့ၢ်လၢယနီၢ်ကစၢ်ဒၣ်ယဲ ယဘၣ်ဂုာ်ကျဲးစၢၤ ဂဲၤလိာ်ဆီၣ်ဖျဲးကွံာ် တၢ်အိၣ်အသးတမုာ်တလၢၤတဖၣ်လၢ ယတၢ်အိၣ်မူပူၤန့ၣ်လီၤ. အတၢ်ကတိၤတဖၣ် ဒုးသ့ၣ်နီၣ်စ့ၢ်ကီးယၤလၢ စီၤမိၤရှ့မၤလိာ် ပှၤအံၣ်စရ့လးဖိတဖၣ် ဖဲလၢ လံာ် ၅ မိၤရှ့ အကတၢၢ်န့ၣ်လီၤ. တချုးစီၤမိၤရှ့သံ, ဒီးတချုးနုာ်လီၤဆူကီၢ်တၢ်စံးပာ်န့ၣ်, ကစၢ်ယွၤအဲၣ်ဒိးလၢ အပှၤဂီၢ်မုၢ်ကသ့ၣ်ညါလၢ အဝဲသ့ၣ်အိၣ်ဒီး တၢ်ဃုထၢတမံၤန့ၣ်လီၤ. ၅ မိၤ ၃၀:၁၉ အပူၤ စီၤမိၤရှ့စံးဝဲ “ယပာ်လီၤလံ တၢ်မူဒီး တၢ်သံ…ဒီးဃုထၢတၢ်မူ” န့ၣ်လီၤ. အဆၢဖိ ၁၅ စံးဘၣ်ပှၤ ပှၤအံၣ်စရ့လးဖိတဖၣ် မ့ၢ်ဃုထၢတၢ်အိၣ်မူ လူၤပိာ်ထွဲကစၢ်ယွၤအတၢ်သိၣ်တၢ်သီန့ၣ်ဒီး ကအိၣ်မူအိၣ်ဂဲၤဘၣ်ဝဲဂ့ၤဂ့ၤဘၣ်ဘၣ်. မ့တမ့ၢ် ဃၣ်ကွံာ် အသးလၢကစၢ်ယွၤ, ဒီးဃုထၢ “တၢ်သံဒီးတၢ်အၢ” လၢကဟဲပိာ်ထွဲထီၣ်အခံသ့ဝဲဒၣ်န့ၣ်လီၤ.
ပအဲၣ်ဒိးအိၣ်မူအိၣ်ဂဲၤဒ်လဲၣ်န့ၣ် ပကဘၣ်ဃုထၢတၢ်ဒ်သိးအံၤန့ၣ်လီၤ. ပစူၢ်က့ၤနာ်က့ၤ ကစၢ်ယွၤ အတၢ်အၢၣ်လီၤတဖၣ်လၢပတၢ်အိၣ်မူအဂီၢ်, ဒီးပဃုထၢတၢ်သူၣ်ခုသးခု သ့ဝဲဒၣ်န့ၣ်လီၤ. မ့တမ့ၢ်ဘၣ်ဒီး ပဃုထၢကျဲလၢ ကမၤတံာ်တာ်, မၤကီမၤခဲပသးသမူအတၢ်လဲၤ, ဒီးကဂုာ်ဟံးန့ၢ်ဆူၣ် ပတၢ်သးခုတဖၣ် သ့ဝဲဒၣ်န့ၣ်လီၤ. တၢ်ကဃုထၢမၤတၢ်နီၢ်နီၢ်အဂီၢ် ပကဘၣ်ဟံးန့ၢ်တၢ်ဆၢကတီၢ်, ဒီးလၢတၢ်မၤစၢၤအဂီၢ် ပကဘၣ်သန့ၤပသးလၢသးစီဆှံန့ၣ်လီၤ. ဘၣ်ဆၣ် ဖဲပသ့ၣ်ညါဘၣ် ဒ်သိး ရိ ၈:၂၈ စံးဝဲ “သ့ၣ်ညါလၢ ပှၤလၢအအဲၣ်ယွၤ, ပှၤလၢ အဘၣ်တၢ်ကိးအီၤ, ဒ်တၢ်ကူၣ်ပာ်အသိးတဖၣ်န့ၣ် တၢ်ခဲလၢာ်မၤဃုာ်အသး လၢတၢ်ဂ့ၤအဂ့ၢ် လၢအဂီၢ်လီၤ” အံၤန့ၣ်ဒီး ပဃုထၢတၢ်သူၣ်ခုသးခုသ့ဝဲဒၣ်န့ၣ်လီၤ.
