ဖဲ အဲရ့း (Eric) အသးအိၣ်အနံၣ်ခံဆံန့ၣ် နၢ်ဟူဝဲကစၢ်ယ့ၣ်ရှူးအတၢ်အဲၣ်အဂ့ၢ် လၢအဂီၢ်န့ၣ်လီၤ. အဝဲ စးထီၣ်လဲၤဘါတၢ်လၢသရိာ် ဒီးထံၣ်ပှၤတဂၤ လၢကမၤစၢၤအီၤ ဒ်သိးကဒိၣ်ထီၣ်လၢ တၢ်သ့ၣ်ညါအါထီၣ် ကစၢ်ယ့ၣ်ရှူးန့ၣ်လီၤ. တယံာ်ဘၣ်ဒီး သရၣ်လၢ အကွၢ်ထွဲအသူၣ်ဂ့ၢ်သးကျိၤန့ၣ် ဟ့ၣ်အီၤမူဒါလၢ ကသိၣ်လိ ဖိသၣ်ပိာ်ခွါကရူၢ်ဆံးဖိတဖု လၢတၢ်အိၣ်ဖှိၣ်အပူၤန့ၣ်လီၤ. လၢနံၣ်တဖၣ်အပူၤ, ကစၢ်ယွၤ ထုးန့ၢ်မိၤန့ၢ် အဲရ့း အသး လၢကမၤစၢၤ သးစၢ်တဖၣ် လၢဘၣ်ကွၢ်ဆၢၣ်မဲာ် သးသမူအတၢ်ဂ့ၢ်ကီ လၢဝ့ၢ်တဖျၢၣ်အံၤအပူၤ, ကလဲၤဟးအိၣ်သကိး ပှၤသူၣ်က့သးပှၢ်တဖၣ်, ဒီးကဒုးနဲၣ်ပာ်ဖျါ တၢ်မၤဂ့ၤမၤစၢၤ ပှၤအိၣ်လၢခိၣ်ဃၢၤတဖၣ်အဂီၢ်, ဒီးတၢ်မၤခဲလၢာ်န့ၣ် မ့ၢ်တၢ်မၤလၢကပီၤယွၤအဂီၢ်န့ၣ်လီၤ. ခဲကနံၣ်အံၤ အဝဲအသးအနံၣ်အလါ ဘူးထီၣ်လံလၢဃုဆံဒီး စံးဘျုးစံးဖှိၣ်ယွၤ မ့ၢ်လၢအသိၣ်လိနဲၣ်ယုၤအီၤလၢ ကမၤတၢ်ခ့တၢ်ပှ့ၤအတၢ်မၤ လၢသီလံလံအဃိ, ဒီးစံးဝဲဒၣ် “ယသးပူၤပှဲၤလုၢ်ကွံာ်ဝဲလၢ ယကဟ့ၣ်ခီဟ့ၣ်နီၤလီၤ တၢ်မုၢ်လၢ် လၢ ယဃုထံၣ်န့ၢ်ဘၣ်အီၤလၢ ကစၢ်ယ့ၣ်ရှူးအပူၤန့ၣ်လီၤ. တၢ်မၤဂ့ၤန့ၢ်ဒိၣ်န့ၢ် တၢ်မၤယွၤအတၢ်မၤန့ၣ် မ့ၢ်တၢ်မၤမနုၤကအိၣ်ဝဲဒၣ်လဲၣ်.
၂တံၤ ၁:၅ ပာ်ဖျါဝဲ, ဖဲလၢအမိၢ်ဒီးအဖံ လုာ်ဘၢဒိၣ်စိ အတၢ်စူၢ်တၢ်နာ်အကတီၢ်န့ၣ် စီၤတံၤမသ့း မ့ၢ်ဒံးဒၣ် ဖိသၣ်ပိာ်ခွါဖိတဂၤန့ၣ်လီၤ. ဖဲအထံၣ်လိာ်သးဒီး ပှၤတၢ်မၢဖိစီၤပီလူးန့ၣ် ဘၣ်သ့ၣ်သ့ၣ် အဝဲ ကမ့ၢ် ပှၤသးစၢ်ဒိၣ်တုာ်ခိၣ်ပှဲၤတဂၤ, ဒီးစီၤပီလူးထံၣ်ဝဲလၢ စီၤတံၤမသ့းအိၣ်ဒီးကံၢ်စီ လၢကမၤကစၢ်ယွၤ အတၢ်မၢအဃိ, မၤ ၁၆:၁-၃ ပာ်ဖျါ စီၤပီလူးကွဲမုာ်အီၤလၢကလဲၤသကိး တၢ်သးခုကစီၣ် အတၢ်လဲၤ န့ၣ်လီၤ. စီၤတံၤမသ့းအတၢ်အိၣ်မူ, ဃုာ်ဒီးလၢအမၤယွၤအတၢ်မၤအပူၤန့ၣ် စီၤပီလူးကဲထီၣ်ပှၤလၢ အသိၣ်လိနဲၣ်လိအီၤတဂၤန့ၣ်လီၤ. ၁ တံၤမသ့း ၄:၆-၁၆ အပူၤန့ၣ် စီၤပီလူးဟ့ၣ်ဂံၢ်ဟ့ၣ်ဘါအီၤလၢ တၢ်ဃုဖးလံာ်လဲၢ်, ဒီးမ့ၢ်ဘၣ်ကွၢ်ဆၢၣ်မဲာ် တၢ်သိၣ်ကမၣ်သီကမၣ်န့ၣ် ကအိၣ်ဒီးတၢ်သးဒူ, ဒီးကစူးကါ အတၤလၣ်တဖၣ် လၢယွၤအတၢ်မၤအဂီၢ်န့ၣ်လီၤ.
ဘၣ်မနုၤအဃိ စီၤပီလူးအဲၣ်ဒိးဝဲ စီၤတံၤမသ့းကအိၣ်ဒီးတၢ်သးတီၤလၢ ကစၢ်ယွၤအတၢ်မၤအပူၤ န့ၣ်လဲၣ်. အဆၢဖိ ၁၀ အပူၤ ကွဲးပာ်ဖျါ “ပမုၢ်လၢ်လံတၢ်လၢယွၤလၢအမူဝဲ, အဝဲဒၣ်မ့ၢ် ပှၤအုၣ်က့ၤခီၣ်က့ၤ ပှၤခဲလၢာ်” အဃိန့ၣ်လီၤ. ကစၢ်ယ့ၣ်ရှူး မ့ၢ်ပတၢ်မုၢ်လၢ်, ဒီး ကစၢ်လၢအုၣ်က့ၤခီၣ်က့ၤ ဟီၣ်ခိၣ် ဒီဘ့ၣ် န့ၣ်လီၤ. တၢ်မၤဂ့ၤဒိၣ်န့ၢ် တၢ်မၤကစၢ်ယ့ၣ်ရှူးအတၢ်မၤန့ၣ် မ့ၢ်တၢ်မၤမနုၤကအိၣ်ဝဲဒၣ်လဲၣ်.
