ခိၣ်ရိနၣ် တၢ်ဆါအၢ(coronavirus) မၤကီမၤခဲတၢ်အကတီၢ်, ပှၤအါဂၤတူၢ်ဘၣ်ဝဲတၢ်လီၤမၢ်လၢ ပှၤလၢအအဲၣ်ဘၣ်ဝဲ တဖၣ်န့ၣ်လီၤ. ဖဲလါနိၣ်ဝ့ဘၢၣ် ၂၇ သီ, ၂၀၂၀ နံၣ်, ယမိၢ်, ဘံခရီးဒၣ်(Bee Crowder), လၢ အသးအိၣ် ၉၅ နံၣ်န့ၣ်, လဲၤပူၤကွံာ်ဟီၣ်ခိၣ်, ဒီးတမ့ၢ်လၢ ခိၣ်ဘ့း-၁၉ တၢ်ဆါအၢအဃိဘၣ်ဆၣ်ဒီး ပဟံၣ်ဖိဃီဖိတဖၣ် ပတူၢ်ဘၣ် တၢ်သူၣ်အုးသးအုး ဒ်ဟံၣ်ဖိဃီဖိအဂုၤအဂၤတဖၣ်အသိးန့ၣ်လီၤ. လၢတၢ်ကဆိးသီမိၢ်တဂၤအံၤ, တၢ်ကမၤလၤကပီၤမိၢ်တဂၤအံၤ, တဂၤဒီးတဂၤပကဟ့ၣ်ဂံၢ်ဟ့ၣ်ဘါလိာ်သကိးသးအဂီၢ် ဟံၣ်ဖိဃီဖိတဖၣ် ကပာ်ဖှိၣ်ထီၣ်အသးန့ၣ် တသ့ဝဲဒၣ်ဘၣ်န့ၣ်လီၤ. လၢတၢ်အံၤအလီၢ်န့ၣ် ပစူးကါကျဲအဂၤတမံၤလၢ တၢ်ကမၤလၤကပီၤ အတၢ်အဲၣ်တၢ်ကွံလၢ အလုာ်ဘၢဒိၣ်စိတၢ်, ဒီးပဒိးန့ၢ် တၢ်မၤမုာ်ထီၣ်က့ၤပှၤဒိၣ်ဒိၣ် မုာ်မုာ်, ခီဖျိအတၢ်ကတိၤတဖၣ်လၢ ကစၢ်ယွၤမ့ၢ်ကိးက့ၤအီၤဆူဟံၣ်မုာ်လၢထးန့ၣ်ဒီး, အိၣ်ကတဲာ်ကတီၤ ပာ်အသးလံအဃိ ဒီးကလဲၤဝဲလၢတၢ်သူၣ်ဆူၣ်သးဆူၣ်အပူၤန့ၣ်လီၤ. မိၢ်တဂၤအံၤအတၢ်အိၣ်မူအပူၤန့ၣ် တၢ်မုၢ်လၢ်အဂၢၢ်အကျၢၤအံၤ မ့ၢ်တၢ်အုၣ်သးလၢအဖျါဒိၣ်မး, ဃုာ်ဒီးလၢအတၢ်ကွၢ်ဆၢၣ်မဲာ်တၢ်သံန့ၣ်လီၤ.
တၢ်ကွၢ်ဆၢၣ်မဲာ်တၢ်သံသ့ၣ်သ့ၣ်အဂ့ၢ်န့ၣ်, ဖံးလံး ၁:၂၁, ၂၃-၂၄ အပူၤ စီၤပီလူး ကွဲးပာ်ဖျါဝဲ “လၢယဂီၢ်, ယမူန့ၣ် မ့ၢ်ခရံာ် ဒီးယသံန့ၣ် မ့ၢ်တၢ်ဘျုးလီၤ… တၢ်သနံးထီၣ်ယၤလၢ တၢ်ခံမံၤအဘၢၣ်စၢၤလီၤ. တၢ်မိၣ်က့ၤယသးဒီးအိၣ်ဒီးခရံာ်လီၤ. အန့ၣ်မ့ၢ် အဂ့ၤဒၣ်တၢ် ဒိၣ်ဒိၣ်ကလဲာ်လီၤ. ဘၣ်ဆၣ်ဒီး ယအိၣ်လၢ တၢ်ဖံးတၢ်ညၣ်အပူၤန့ၣ်, မ့ၢ်အဂ့ၤဒၣ်တၢ် လၢသုဂီၢ်လီၤ” န့ၣ်လီၤ. ဖဲလၢဘၣ်သးအိၣ်မူဒံးဒီး မၤစၢၤပှၤဂုၤပှၤဂၤဘၣ်ဆၣ်, တၢ်အိၣ်ဆိးဘၣ်ဒီး ကစၢ်ယ့ၣ်ရှူးခရံာ် လၢဟံၣ်မုာ်လၢထးန့ၣ် ထုးန့ၢ်ဝဲ စီၤပီလူးအသး န့ၣ်လီၤ.
တၢ်နာ်န့ၢ်လီၤသး ဒ်သိးအံၤန့ၣ် ဆီတလဲပတၢ်ထံၣ် အကတီၢ်ဖဲလၢ ပထွဲထီၣ်ပခီၣ်ကါ ဆူတၢ်အိၣ်မူ ခဲအံၤ, ဒီးဆူညါတပတီၢ်န့ၣ်လီၤ. ပတၢ်မုၢ်လၢ်ဒ်သိးအံၤန့ၣ် ဟ့ၣ်ထီၣ်တၢ်မၤမုာ်က့ၤသးဒိၣ်ဒိၣ်မုာ်မုာ် သ့ဝဲဒၣ်ဆူ ပှၤဂုၤပှၤဂၤ လၢတူၢ်ဘၣ်ခီၣ်ဘၣ်တၢ်လီၤမၢ်အကတီၢ်န့ၣ်လီၤ. ပှၤလၢပအဲၣ်အီၤကွံအီၤတဖၣ် လီၤမၢ်အဃိ ပအိၣ်ပှဲၤဒီးတၢ်သူၣ်အုးသးအုးဘၣ်ဆၣ်, ၁ သ့း ၄:၁၃ စံးဘၣ်ပှၤ ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် တၢ်သူၣ်အုးသးအုးတအိၣ် “ဒ်ပှၤဂၤလၢအတၢ်မုၢ်လၢ်တအိၣ်” အသိးဘၣ်န့ၣ်လီၤ. တၢ်မုၢ်လၢ်အမ့ၢ်အတီၤအံၤ မ့ၢ်တၢ်ထူးတၢ်တီၤလၢ ပှၤသ့ၣ်ညါကစၢ်ယ့ၣ်ရှူးခရံာ်တဖၣ်အဂီၢ်န့ၣ်လီၤ.
