ဘရဲး(ထ) (Brett) ကထီၣ် ခရံာ်ဖိခီလ့ၣ်ကၠိ, ဒီးမၤလိလံာ်စီဆှံန့ၣ် မ့ၢ်ခီၣ်ကါလၢကဘၣ်မၤဝဲတမံၤန့ၣ်လီၤ. ပစံးသ့လၢ အသးသမူဒီတစိၤန့ၣ် ပှၤလၢအသ့ၣ်ညါကစၢ်ယ့ၣ်ရှူး အိၣ်ဘူးဒီးအီၤ, လၢဟံၣ်လၢဃီ, လၢကၠိ, လၢတၢ်အိၣ်ဖှိၣ်အပူၤန့ၣ်လီၤ. တကးဒံးဘၣ်, ဖဲအထီၣ်ခီလ့ၣ်ကၠိကတီၢ်န့ၣ် မၤလိန့ၢ်ဝဲ ”ခရံာ်ဖိအတၢ်ဖံး တၢ်မၤ” ဒ်တၢ်လုၢ်အီၣ်သးသမူတၢ်မၤတမံၤအဂီၢ်န့ၣ်လီၤ.
ဘၣ်ဆၣ် ဖဲအသးအိၣ် ၂၁ နံၣ်န့ၣ်, ဆ့ၣ်နီၤဘါသကိးယွၤ, လၢဒူသဝီတၢ်ဘါသရိာ်လီၢ်လံဖိတဖျၢၣ် အပူၤ, ဒီးဒိကနၣ်တၢ်အိၣ်ဖှိၣ်သရၣ် စံၣ်တဲၤတဲလီၤဝဲ လံာ် ၁ ယိၤဟၣ်သိၣ်တၢ်အပူၤန့ၣ်ဒီး, အဝဲဃုထံၣ်န့ၢ် တၢ်လၢအလီၤကမၢကမၣ်တမံၤန့ၣ်လီၤ. ဘရဲး(ထ) နၢ်ပၢၢ်ဝဲဒၣ်လၢ အတၢ်သန့ၤထီၣ်သး လၢတၢ်သ့ၣ်ညါဒီး တၢ်ဘူၣ်တၢ်ဘါအပျံၤသကွီၤလီၤဘၣ်အီၤအဃိ, တဒိးန့ၢ်ဝဲ တၢ်အုၣ်က့ၤခီၣ်က့ၤနီၢ်နီၢ် လၢကစၢ်ယ့ၣ်ရှူး အပူၤနီတစုဘၣ်န့ၣ် သ့ၣ်ညါလီၤက့ၤအသးန့ၣ်လီၤ. တၢ်လၢမုၢ်တနံၤအံၤန့ၣ် အသးကလၢၢ်ဘၣ်ဝဲလၢ ကစၢ်ခရံာ် ထုးန့ၢ်အသးလၢတၢ်ကစီၣ်လီၤတံၢ်လီၤဆဲး, လၢအမ့ၢ် “နတသ့ၣ်ညါယၤဒံးဘၣ်” န့ၣ်လီၤ.
၁ ယိၤ ၅:၁ အပူၤ ပှၤတၢ်မၢဖိစီၤယိၤဟၣ် အတၢ်ကစီၣ်န့ၣ် ဖျါဆှဲဆှဲဖိ, “ဖဲဒၣ်ပှၤလၢအနာ်လၢယ့ၣ်ရှူး မ့ၢ်ခရံာ်, ကိးဂၤဒဲးန့ၣ် အိၣ်ဖျဲၣ်လံလၢယွၤလံ” န့ၣ်လီၤ. အဆၢဖိ ၄ အပူၤ စီၤယိၤဟၣ်ပာ်ဖျါထီၣ် “တၢ်မၤနၢၤ ဟီၣ်ခိၣ်” အံၤ သ့ဝဲဒၣ်ထဲလၢ ပတၢ်နာ်ကစၢ်ယ့ၣ်ရှူးန့ၣ်လီၤ. တၢ်မၤနၢၤဟီၣ်ခိၣ်အံၤ တမ့ၢ်လၢပသ့ၣ်ညါ ကစၢ်ယ့ၣ်ရှူးအဂ့ၢ်အကျိၤဧိၤန့ၣ်ဘၣ်, မ့မ့ၢ်, ပတၢ်စူၢ်တၢ်နာ်လၢအဒိၣ်အယိာ်, အတီအလိၤအပူၤ- လၢအလီၣ်ဖျါ ပတၢ်နာ်ကစၢ်ယ့ၣ်ရှူးလၢအမၤတ့ၢ်တၢ်လၢပဂီၢ်, လၢသ့ၣ်ဖျၢၣ်ထူၣ်စုညါလိၤန့ၣ်လီၤ. စးထီၣ်လၢမုၢ်တနံၤအံၤန့ၣ်, ဘရဲး(ထ) စူၢ်က့ၤနာ်က့ၤဒၣ်ထဲ ကစၢ်ယ့ၣ်ရှူးခရံာ်တဂၤဧိၤန့ၣ်လီၤ.
တနံၤအံၤ, ဘရဲး(ထ) အတၢ်သူၣ်ဆူၣ်သးဆူၣ်အဒိၣ်အယိာ် လၢကစၢ်ယ့ၣ်ရှူးအဂီၢ်, ဒီးအတၢ် အုၣ်က့ၤခီၣ်က့ၤအဂီၢ်, တၢ်ခူသူၣ်တအိၣ်လၢၤဘၣ်န့ၣ်လီၤ. တၢ်အံၤဟဲအိၣ်ဖျါကိးကတီၢ်ဒဲး, ဖဲလၢအဘၣ် ဂဲၤဆၢထၢၣ်လၢစီၢ်နီၤခိၣ်, ဒီးစံၣ်တဲၤတဲလီၤတၢ် လၢတၢ်ကလုၢ်ဒိၣ်ဒိၣ်သွါသွါ ဒီးဆှဲဆှဲ ဒ်တၢ်အိၣ်ဖှိၣ်သရၣ်- ယတၢ်အိၣ်ဖှိၣ်သရၣ်တဂၤအသိးန့ၣ်လီၤ.
၁ ယိၤ ၅:၁၁-၁၂ ပာ်ဖျါဝဲ “ယွၤဟ့ၣ်လီၤပှၤလၢတၢ်မူအထူအယိာ် ဒီးတၢ်လၢတၢ်မူန့ၣ် အိၣ်ဝဲလၢ အဖိခွါအပူၤလီၤ. ပှၤအိၣ်ဒီးအဖိခွါန့ၣ်အိၣ်ဒီးတၢ်မူ” န့ၣ်လီၤ. ကယဲၢ်ပှၤလၢ အဃုထံၣ်န့ၢ်တၢ်မူလၢ ကစၢ် ယ့ၣ်ရှူးအပူၤတဖၣ်အဂီၢ် ကမ့ၢ်တၢ်ဒုးသ့ၣ်နီၣ်မၤမုာ်တၢ်ဆံးဒိၣ်လဲၣ်တမံၤန့ၣ်လဲၣ်.
